Tnimu Ŋga Na Nyiɛkpɔɔ Yiɛshɔ
4
Ni wolo, ni kee haŋa yi kre, e na o le mu twan, mu chin imi sembremu ee tni mbe ki Nyiɛkpɔɔ yiɛ nyi, a kre tnimu kre nu e nyi kre. La, o e tali o Tafun Yesu mɛɛ ni, e pe mbe ki wɛ nyjɛ e pini yire na.
2 Ŋgi na hin? Kaalɛɛ nyjɛ o yire o Tafun Yesu jaŋga na mu e nyina kre, e yi chin kro.
3 Ŋga Nyiɛkpɔɔ chaa yi na ee pe cheche, mbe eyɛ wɔ tiɛrɛɛ nu.
4 Bilɛ pre kro fna mbe chin imi na blɔ na u chɔ jiin, mbe pe cheche, mbe peyɛ ŋga buuro,
5 ki n pe mbe tni niŋge sisaa kolo na, imi na leele mblɛ pe n Nyiɛkpɔɔ chin pini kre.
6 Kre kolo ŋga na kre, lewo n fna mbe u ŋmbrɔ sumifun pe sisaa kee ka na. O klu mu kre kee ŋga yo e pan, mu chin na e jaari na o Tafun we leele mblɛ pe yire sisam nyjɛ nyini pini kre ndie tini.
7 Nyiɛkpɔɔ nsra yo na o paan tni mbra tiɛri, la, wra yo o paan tni mbe pe cheche.
8 Kena ŋmba we je a u n li yire kee nyjɛ na kre, lewo kee ma u je, la, Nyiɛkpɔɔ ŋmba u e kaan Kpra Ŋumu wre kee u je.
9 Ki n shian na mbe e nyunɔ mbe yo e pan na e e ŋmbilɛ shɔnlifɛɛnlɛ kori, Nyiɛkpɔɔ wre titi e nyina imi na ki fna e eyɛ kori mbe da.
10 A e ja mu li ki na mu e wolo shɔnlifɛɛnlɛ mblɛ pee wa Macedonia na pre kori. Kena o e tali na e pe mbe ki wɛ imi na e pini kre na.
11 E tnimu nu kre, e eyɛ nyjii, e ti mbe e yiɛ nyina e tnumu na, mbe e jaa eyɛ le, imi na o klu mu yo e pan kre.
12 Na e pe ma kre, mblɛ pe n pe shɔnlifɛɛnlɛ pre we na e kaan buuro, a yaa eyɛ wru mbe taa ndro na na u e le.
O Tafun Wre Paan
13 O wolo, leele mblɛ pe ku kre, o chaa mbe e pe kee chin, mbe e yiɛ wa je na mblɛ pe n wa na kaan haa ni pre lɛ.
14 O shɔ mu li na Yesu na ku mu ndru mu nyi. Ki tia o shɔ mu li na mblɛ pe Yesu shɔ mu li mu ku kre, Nyiɛkpɔɔ we ti mbe pre na Yesu ndruu pan.
15 O Tafun wre u o nyina kee ŋga na o e nyina ki yi. Ŋga ble o Tafun wre we pan kre, wre mblɛ o le, a o n ta mu ku kre, waa yiɛklu mblɛ pe ku kre na.
16 Oo mana kpɔɔ tiŋge loo, mbe nyjeeri bituŋu lopom wre gblee kpɔɔ le, mbe Nyiɛkpɔɔ bnɔ tin, mbe o Tafun wre titi yiri nyjeeri mbe tii tra. Mblɛ pe Yesu wre shɔ mu li mu ku kre we klu mbe nyi.
17 Kena wre mblɛ oo wa na le, a o n ta mu ku kre, wre na mblɛ pie nyi kre kro we sɛ o Tafun fni nyiɛ yiɛ na. Kena mna o Tafun nyi kre, bawa oo pe nyjila kro nu.
18 Kena e yire kee nyjɛ tɛɛ e na eyɛ leni gbeŋmbaa.