3
Ŋga kra pan na, na o n e nya waa jaa tni kre, kra tia o na jawa na oo tni Athens na,
2 Mbe o ŋmbrɔ Timothy ŋmba wre na wre Nyiɛkpɔɔ tnumu tuni, a wra Kristo ketaan kpali kre tun e pan. O na u tun mbe u paan faŋga le e nu, mbe ka ya e shɔnlie na.
3 Imi kie pe mbe e wa waa yila fiŋgee ŋga pe e fiŋge ŋga na mbe ndru kro. Yire titi chin na chaa Nyiɛkpɔɔ chaa mbe pe o fiŋge ma.
4 Nyjila ŋga ni o naa wa e jaara kre, o na klu mu yo e pan na, pie o fiŋge. A imi na e kro ki chin kre, pan kra pe yɛŋgɛ.
5 Kre na ni yila mu Timothy tun e pan kre. Ni nsra ja mbe tni e kee na, ki tia ndaa u tun mbe u paan e le, imi na e shɔnlie nyi. Ndaa fiɛ na aada Sutna wre we paan e nyu cha, mbe ki ti o tnumu ŋga o na pan mu tun kre pe waara.
6 La, Timothy yiri e pan wa mu pan mu e shɔnlie, na e koroo ŋga e ta kre ketaan yo o pan. U pan mu yo o pan na ee wa na o jawa nyjila kro nu, a o la e ta, imi na yire la o ta kre chɔɔ.
7 O wolo, o katala, na o kanyana nyjɛ o nyaa nu kre, e shɔnlie kre tia gbun nyjii o na.
8 Ŋgi na hin? Ŋga o loo na yire na O Tafun wree wa mu pe nunu tɛ ŋga, fuŋga o ŋmaa ta.
9 Fuŋga rɛ, oo jaa yila e ndra na mbe Nyiɛkpɔɔ ŋga mboo. O Nyiɛkpɔɔ kaan mboo na u tia o yire e na mu yɛshɔɔrɔ ta u yiɛ.
10 O lɛɛ wɔ na u tali lafo na blee, na u ti mbe o e nya nyini ni, mbe o jaa ya e na, mbe e shɔnlie yire.
11 O tali na o lɛ Nyiɛkpɔɔ wre titi, na o Tafun Yesu wre pe kolo gbeele o pan, mbe o jaa pan.
12 O Tafun wre u ti mbe e jaa eyɛ kori, mbe ndro kro kori kpɔɔ imi o e kori kre.
13 Kre kolo ŋga na we e ŋga faŋga, na o Tafun wre na u leele waa pan, a o yire o lɛ Nyiɛkpɔɔ wre yiɛ kre, mbe nɛɛrɛ ka wa pe e na, mbe e pe cheche, mbe ndro wa e sisaa ka ta mbe yo.