Paul Tnumu Ŋga U Tun Thessalonica Na
2
Ni wolo, yire titi chin na shaaraa ŋga o na pan mu e shaari kre nsra pe waara.
2 E chin imi na pra o fiŋge, mna o tɛɛlɛ Philippi na, a o na chin mu pan e pan Thessalonica na. Nde o Nyiɛkpɔɔ wre na o ŋga gbun, a o na ketaan ŋga ki yiri u pan kre kee yo e pan. La, na lenɛɛrɛ wa na o nyu kaanri.
3 Ŋga o naa chaa mbe e taa ketaan kre kro kre, o nsra e fana, ndee mna nɛɛrɛ kee ka pe, a o nsra tro na e ni dnumu kolo ka na.
4 La, imi na Nyiɛkpɔɔ naa chaa mbe o paara e pan kre, pan o na pe, ŋgi na hin? Wra o le na o nyu, mna ketaan kre le o kɛɛ. Chaa ma o naa chaa mbe o kee lewo yiɛ nyi, la, o naa chaa mbe Nyiɛkpɔɔ yiɛ nyi, wre u o lam kee chin.
5 Yire titi chin na nyu tnamu kee ma o na pan mu yo e pan, a o nsra pan mu paara e pan mbe yire ki na mbe yaka shɔ e pan jajaara kolo na. Nyiɛkpɔɔ wi o dansiɛfun.
6 O nsraa mɛɛ chaa mbe yiri lewo, ndee e wa pan.
7 Ŋga o pe Yesu Kristo bitumblɔ ŋga, kaa oo wa kolo ni na oo naa yaka le e pan. La, ŋga o naa wa e jaara kre, o na oyɛ nyjii, mna pe na bifiun lo wi.
8 Imi na o e kori kre ndra na, ketaan ŋga ki yiri Nyiɛkpɔɔ pan kre chiin ma o chaa mbe e loo, la, o chaa mbe ku e tlo. Ŋgi na hin? O na e kori kpɔɔ mu tro.
9 O wolo, e sɔɔnri na wre titi naa o kɛ nyu tnumu tuni e nu. O naa tnumu tuni lafo na blee, imi kie pe mbe waa yire ketaan ŋga ki yiri Nyiɛkpɔɔ pan kre kpalaa na, mbe e gbun na fɔlɔ ni.
10 Yire titi we jaa o dansiɛrɛ li, a pan chɔɔ Nyiɛkpɔɔ o dansiɛrɛ lii na. O kepele ŋga nu wre na yire shɔnlifɛɛnlɛ pre na tni kre na nyu, mna pe cheche, nɛɛrɛ ka nsraa wa o na.
11 E chin na pan o na oyɛ yii na ndro na u biile lɛ.
12 O na e le gbeŋmbaa, mna e gbunyiŋge, mnaa yuu e pan na e ti mbe e tnimu nyu, mbe tna Nyiɛkpɔɔ pan. Wre u e yeeri mu pan u Ŋunumu na yɛnyiŋge nu.
13 Kre kee ŋga ni paan mbe yo ŋga ndra na, ni Nyiɛkpɔɔ kaan mboo nyjila kro nu. Ŋga o na pan mu Nyiɛkpɔɔ kee kre yo e pan kre, e na ki loo, mna ki yii kɛ shiin. E nsra ki pe na lewo kee yi, la, e na ki yii na Nyiɛkpɔɔ kee yi, a Nyiɛkpɔɔ kee yi yɛŋgɛ. Yire mblɛ e shɔnli kre, Nyiɛkpɔɔ wa na tnumu tuni e nu.
14 O wolo, kee nyjɛ Judea sumifɛɛnlɛ mblɛ pe pe Yesu Kristo wolo pre nya yire yɛ yi e nyaa kre. Imi na Judae pre na pe fiŋge kre, pan yire titi leele e fiŋge kre.
15 Pre Judae pre pra O Tafun Yesu wre, na Nyiɛkpɔɔ kee nyanyofɛɛnlɛ pre gbo, mna wre fiŋge. Nyiɛkpɔɔ yiɛ n shɔ pre leele pre na, a pre na ndro wa na wa n tna.
16 Hali praa chaa mbe o tɔ kolo, mbe waa kolo ta mbe kee ŋga kie leele mblɛ pe n pe Judae pre ŋga ŋmaashɔmu kre kpali pe pan. Kre sisam ŋga tia nyjila kro nu sisaa pe pini. La, fuŋgaami ŋga Nyiɛkpɔɔ krɔkuɔn kre pan pe na.
Paul Naa Chaa Mbe Sɛ Pe Shaari Na
17 Ni wolo, wre rɛ, ŋga o na laa e na chiɛri kre, e la na o ta, a o naa e chaa mbe nya na. Kraa wa na wre titi nsraa wa e jaara, nde e kee naa wa o jawala nu.
18 O naa chaa mbe ndruu pan e pan wa. Mi Paul na gbeŋmba na mbe pan wa, kra wɛ gbee mni na, na Sutna o tɔ kolo.