Nyiɛkpɔɔ Loŋgo Wre
2
Ni wolo, mu wru o Tafun Yesu Kristo wre panhaa, na imi we o wru mbe pan u jaara kre, ni e tali,
2 yaa ti mbe pe e jawala kla ki na, ndee mbe ti mblɛ pe yuu na o Tafun wre ble kre pan mu tro kre e jawala kna, ndee mbe ti mblɛ pe yuu na Nyiɛkpɔɔ kee pe nyaa na yuu kre, ndee na u kee kpali kre, ndee na yuu na wre o yire kee nyjɛ hlɛ nyunɔ mu pan mu pe ŋga kre, mbe pia e le fiɛrɛ.
3 Yaa shia ti mbe pe wa e fana kolo ka na. Ŋgi na hin? Kristo pan ble kre wa da, fɔna nyjila ŋga nu leele we yiri mbe Nyiɛkpɔɔ taan kre da, ki nyjila kre Nyiɛkpɔɔ loŋgo wre we yiri. Wre Nyiɛkpɔɔ we kla kre.
4 We paara mbe Nyiɛkpɔɔ sumiɛ, na sumiɛ ŋga mu chin ŋga kro taan. We uyɛ kpɔɔ mbe wɛ ndro kro na, a Nyiɛkpɔɔ Suminyuŋgo we sɛ tni mbra yuu na wre wi Nyiɛkpɔɔ.
5 E sɔɔnri na nyjila ŋga ni ndaa wa e jaara kre, ndaa yire kee nyjɛ krɛrɛ yo e pan.
6 Yire titi e chin ŋga ki u tɔ kolo a u n pan tun. Nyjila ŋga ni ki fna kre, kre nu Nyiɛkpɔɔ loŋgo wre we pan.
7 Ndra shelee kee nyjɛ yi ndra kree wa na tnumu tuni, la, kee ŋga kie pe kre n ta mu pe tun, fɔna ŋmba u ki tɔ kolo kre Nyiɛkpɔɔ u wɔ wa.
8 Kre nyjila kre nu oo Nyiɛkpɔɔ loŋgo wre nya, na o Tafun Yesu Kristo wre waa pan, we u gbo na u nyu fuflɛ ni, mbe u kla na u yɛnyiŋge ni.
9 Nyiɛkpɔɔ loŋgo wre, Sutna jaŋga ni we pan, mbe paan kawako kee nyininyini pe, mbe kafinɛ kee tataara pe.
10 We yire kafinɛ, na ndra shelee kooloe tataara na mbe mblɛ pe shie mbe sɛ kla kre fana. Pie kla, ŋgi na hin? Pe n kpra kre le mu nya, a pe n ki kori, mbe yire ki na mbe ŋmaa ta.
11 Kre kee ŋga ndra na Nyiɛkpɔɔ pan na jaŋga ka ni pe nu mbe praa punu, mbe ki ti mbe pe kafinɛ kee shɔ mbe li.
12 Ŋga kie pe yi na, leele mblɛ pe n kpra kre shɔ mu li, la, mu tia pe yiɛshɔ sisam na kre, Nyiɛkpɔɔ we pe gbun pimi ni.
Nyiɛkpɔɔ E Wɔ Mbe E Ŋmaashɔmu Ta
13 O wolo, ki fna o na Nyiɛkpɔɔ kaan mboo nyjila kro nu e ndra na, o Tafun e kori, ŋgi na hin? U e wɔ mbe klu mbe e ŋmaashɔ. Kpra Ŋumu wre jaŋga tia e pe cheche, mu e pe Nyiɛkpɔɔ wolo, mu yire e shɔnlie ŋga e ta kpra kre nu kre ndra na.
14 Ketaan ŋga o kpali e pan kre, kre na Nyiɛkpɔɔ yire mu e yeeri. Wra e yeeri mbe e paan o Tafun Yesu Kristo yɛnyiŋge kre ka ta.
15 Kena ni wolo, e yire gbiŋmbi, e kpra kee ŋga o na e nyina kre yii. Kpra kee kre o na ki kpali e nu, mna e nyunɔ ki yi.