E Nyiɛtali E O Ŋga
3
Ni wolo, ŋga ki kro tɔ yi na, e nyiɛtali e o ŋga, mbe o o Tafun wre kee kre kpali mbe sɛ yiɛ nyaanyaa, mbe yɛnyiŋge ta, imi na kra pe e nu kre.
2 E nyiɛtali mbe Nyiɛkpɔɔ wre o wɔ mbe yili ndrashelifɛɛnlɛ na sisampefɛɛnlɛ pre kɛɛ. Ŋgi na hin? Ndro kro ma u ketaan kre shɔ mu li.
3 La, o Tafun wre pe kprafun, we e ŋga faŋga, mbe kɛ tɔ e na, mbe e shɔ mbe yili Sutna wre kɛɛ.
4 O Tafun wre u ti mbe o dankna e na. O shɔ mu li na ee pe imi na o e nyina kre, mbe kro mbra pini ma nyjila kro nu.
5 O Tafun wre u e jawala nyaa mbe e Nyiɛkpɔɔ koroo kre nya, mbe e jaa frɔ mbe Kristo shie.
O Fna Mbe Tnumu Tun
6 O wolo, o o Tafun Yesu Kristo wre mɛɛ tɛɛ na yuu e pan na, e eyɛ kun e wolo sumifɛɛnlɛ mblɛ pe gbashia lii kre na. Kooloe nyjɛ o pe nyina kre, pe yi je.
7 Yire titi chin na imi o na pe kre, pan ki fna e pe. Nyjila ŋga ni o naa wa e jaara kre, o nsraa gbashia lii.
8 Ndro nsraa wa a o na u sro li finfin. Ŋga ndro we ya o na mbe waa u fun fɔlɔ tɔ kre ndra na, o na tnumu tun kpɔɔ, lafo na blee, imi kie pe mbe waa e wa gbun na fɔlɔ ni.
9 Ki n pe na kolo ki nsraa wa o pan, mbe o na tni e na, kre ki tia o na ma pe. O naa chaa mbe e o le mbe tuan, kre ki tia o na pe ma.
10 Ŋga o naa wa e jaara kre, o na yo e pan na, “Ŋmba u n na chaa mbe tnumu tun kre, yaa ti mbe u li.”
11 Ŋga ki tia o na yuu ma kre, o loo na leele plɛ wa e nu mu na gbashia lii. Pre leele pre n na yaka pini, la, leele kee nyjɛ nu pe n fna, pe yuu na tro.
12 O o Tafun Yesu Kristo mɛɛ tɛɛ na pre leele mblɛ jaari na, pe tni imi na ki fna, mbe tnumu tun mbe peyɛ le.
13 O wolo, yaashia fna chichie pee na.
14 Aada ndro waa wa e nu mbe wa li kee nyjɛ o e nyunɔi ŋga na, na ki pan ma kre, e u fun dɔɔta, e eyɛ kun u na, mbe ki ti mbe nyifɛɛrɛ u gbo.
15 La, yaa u pe na e loŋgo wi, la, e u jaari na e ŋmbrɔ sumifun wi.
Kee Hɛnyi
16 O Tafun ŋmba u o kaan wejinyiŋge kre, u e ŋga wejinyiŋge nyjila kro nu kolo kro na. Yire na, o Tafun e tni.
17 Mi titi kɛ nyu nyunɔmu yi nyjɛ. Mi Paul, e shaari. Na mi titi hlɛ nyunɔ, pan ni ki nyunɔi imi, mbe ni mɛɛ le ki jaara.
18 Yire na o Tafun Yesu Kristo dumiɛ e tni.