3 Ni chaa mbe mu tni Ephesus na, imi na ndaa yo mu pan ŋga ndaa shie Macedonia na kre. Leele plɛɛ wa wa na kee fɔnyi yɛ nyina, mbe mu pe jaari mbe pe yi nyinaa ti.

4 Yo pe pan mbe pe mbuura, na pe tolɛɛlɛ mɛɛ tataara yire kee yoo ti. Yire kee yire krɛrɛ kakra ni yi paan, yi n na Nyiɛkpɔɔ shɔnlie kolo kre nyina.

5 Ŋga ki tia ndaa kee nyjɛ yuu kro yi na, pie koroo ŋga ki yili loloŋgo cheche nu nya, mbe pe jawala saan pe na, mbe pe shɔnlie yire.

6 Leele plɛ fun yire kooloe nyjɛ na, mu kna mu sɛ taa jijiere kee na.

7 Pe chaa mbe pe Moses mbra nyinafɛɛnlɛ, la, pre titi kee nyjɛ yi yilii pe nyuu, ndee kee nyjɛ pe yii kɛ shiin kre, pe n yi nɔɔloo.

8 O chin na Moses mbra yire nyu, na mu li yi kolo na wala.

9 Ki fna mbe o sɔɔnri na Moses mbra yire, leele chichiele na ma pra yila mu yi le, la, mbra taanfɛɛnlɛ, na ndikambla, na mblɛ pe n na Nyiɛkpɔɔ sumi, na sisampefɛɛnlɛ, na mblɛ pe n pe cheche, na mblɛ pe Nyiɛkpɔɔ pini na tɛɛ, na mblɛ pe pe lɛɛlɛ, na pe loolo gbo, na mblɛ pe tuwi mu leele gbo,

10 na tiɛrifɛɛnlɛ, na bilɛ mblɛ pe sni na bilɛ ni, na mblɛ pe leele yiri na prɛ, na kafinɛfɛɛnlɛ, na mblɛ pe danyi wɛɛ dani, ndee mu na kee nyjɛ yi n fna nyina kre, pre na pra yila mu Moses mbra yire le.

11 Mbra yire pe nyina kre, yi kpra kee kroo wa Nyiɛkpɔɔ yɛnyiŋge ketaan ŋga nu dwamu nyi kre nu, a u ki le ni kɛɛ na ni ki kpali.

12 Ni O Tafun Yesu Kristo wre kaan mboo na u ni ŋga faŋga a ni tnumu ŋga u ni ŋga kre tun. Ni u kaan mboo na u le na ni fna mbe u ni wɔ mbe ni u sumi,

13 nde jle kre ndaa kefuɛn yo u na, mna u pra, mnaa u tɛɛlɛ. La, Nyiɛkpɔɔ na nyu ni na. Ŋgi na hin? Ni nsra shɔ mu li, a ni nsra chin kee ŋga ndaa pini.

14 A O Tafun Nyiɛkpɔɔ wre na ni dumi, mna ni ŋga shɔnlie, na koroo ŋga o taa Yesu Kristo nu kre.

15 Kre kee ŋga pe kpra kee ŋga lewo fna mbe yii, mbe ki shɔ mbe li. Yesu Kristo na pan waŋgra ŋga nu mna sisampefɛɛnlɛ shɔ. A mi Paul nsra prɔ sisampefɛɛnlɛ pre nu.

16 Kre ndra na Nyiɛkpɔɔ na yila mna ni fooro le, imi kie pe mbe Yesu Kristo u frɔ ŋga u ta ni na nyina, ndaa wɛ sisampefɛɛnlɛ mblɛ pee wa kro mbe paan u shɔ mbe li, mbe blenyini ŋmaa ta pre kro na.

17 Blenyini Ŋunu wre, wre ŋmba uu wa nyjila kro nu, a ndro na u nya nyini ni kre, wre wi Nyiɛkpɔɔ nunu chom ŋmba ki fna o ŋga kpɔɔmu, na yɛnyiŋge nyjila kro nu. Ami.

18 Ni pɔ Timothy, kre paara nyinaa ŋga ni chaa mbe mu yii kɛ shiin, yire kee nyjɛ, ŋu titi kee nyjɛ Nyiɛkpɔɔ kee nyanyofɛɛnlɛ pre yo mu tɛɛ yi. Ti mbe yire kee yire pe mu ŋunɔ wiyirɛ, mbe mu tɛɛ mbe wii sɛ yiɛ.

19 Mbe mu ti mbe mu jawala saan mu shɔnlie na. Leele plɛɛ wa, kee nyjɛ pe jawala yo pe pe kre, pe n li yi na. A ki tia pe shɔnlie shɔ mu to.

20 Pre leele pre plɛ lɛ Hymenaeus, na Alexander, pre leele mblɛ, ni pe wru mu le Sutna kɛɛ, mbe Sutna pe ndie tini mbe sɛ su nyjila ŋga ni pie chin na ki n fna mbe pe kefɔɔn yo mbe Nyiɛkpɔɔ taan.