Timothy Hlɛ Shiinwo
Sumifɛɛnlɛ Sumiɛ
1
Hlɛ ŋga yiri mi Paul, Yesu Kristo bituŋu ŋmba Nyiɛkpɔɔ wɔ u chaara na, na ni sɛ ŋmaa ŋga kee wre Nyiɛkpɔɔ yo mu tɛɛ, mbe o yire wre Yesu Kristo na mbe ki ta kre kee kpali.
2 Kre hlɛ ŋga shie ni bikoroo Timothy pan.
O lɛ Nyiɛkpɔɔ, na o Tafun Yesu Kristo pe mu dumi, mbe mu fooro le, mbe mu ŋga wejinyiŋge.
3 Ni jawala saan ni na, a ndaa Nyiɛkpɔɔ ŋmba ni sumi wre kaan mboo imi na ni tolɛɛlɛ na pe kre. Na ni nyiɛtali ni mu sɔɔnri na Nyiɛkpɔɔ kaan mboo mu ndra na lafo na blee.
4 Ni mu nyɛnɛɛ kre sɔɔnri, ki tia ni chaa mbe paan mu shaari nyaanyaa, mbe ki ti ni yiɛshɔ.
5 Ni mu kpra shɔnlie kre sɔɔnri, kre shɔnlie kre na mu lelɛɛ Lois, na mu lo Eunice na ta kre, a ni shɔ mu li na kre shɔnlie kree wa mu nu tɛ.
6 Kre ndra na, ni chaa mbe mu sɔɔnri na, ti mbe Nyiɛkpɔɔ wre kɛyira kre mna ta, nyjila ŋga ni ndaa kɛ taa mu na kre, mbe ki tnumu tun.
7 Ŋgi na hin? Kpra Ŋumu ŋmba Nyiɛkpɔɔ o ŋga wre wa o pe fiɛrɛfɛɛnlɛ, la, Kpra Ŋumu wre o kaan jaŋga, na koroo, mu tia o ja na oyɛ yiri kee na.
8 Kena maa ti mbe nyifɛɛrɛ na mu kuu na mu o Tafun wre dansiɛrɛ li, a maa ti mbe nyifɛɛrɛ na mu kuu na pe ni yii mu le nyuŋgo o Tafun wre ndra na. La, yila ketaan kre na mu kala nya, Nyiɛkpɔɔ we mu ŋga ki faŋga mbe mu ki pe.
9 Nyiɛkpɔɔ wre o shɔ, mu o yeeri na o paan pe u leele. Ki n pe kee ŋga o pe mu u ŋga ndra na yi, la, u chaara, na u dumiɛ na yi. Yesu Kristo na u yire mu o ŋga kre dumiɛ ŋga, u o ŋga ki yi mu chin mu yirɛ kro nɔɔhle.
10 La, fuŋga u yire o ŋmaashɔfun Yesu Kristo wre paan kre na mu ki wɔ mu o nyina. U kumu jaŋga gbo, mu yire ketaan kre na mu blenyini ŋmaa kre wɔ mu o nyina.
11 Nyiɛkpɔɔ ni wɔ bituŋu, na nyinafun, na ni ketaan kre kpali.
12 Kre ndra na ni kala nyaa kre. La, nyifɛɛrɛ n na ni kuu, ŋgi na hin? Ndro ŋmba ni shɔ mu li kre, ni u chin, a ni shɔ mu li na we jaa mblɛ ni le u kɛɛ kre le mbe sɛ su u pan ble kre nu.
13 Kpra kee ŋga ndaa mu nyina kre yii kɛ shiin, mu taa ki na, mu tni shɔnlie, na koroo ŋga o taa Yesu Kristo nu kre nu.
14 Kpra kee ŋga pe le mu kɛɛ kre le chichie, Kpra Ŋumu ŋmba uu wa mu nu kre jaŋga na Nyiɛkpɔɔ yire mu ki le mu kɛɛ.
15 Ŋu titi chin na leele mblɛ praa wa Asia tra nu kro na laa ni kro, hali Phygelus, na Hermogenes kro na chaa.
16 Ni tali na o Tafun wre u Onesiphorus, na u sele leele fooro chin, ŋgi na hin? Wra ya ni na nyjila tataara nu. U nsraa nyifɛɛrɛ pini na pe ni yii mu le nyuŋgo.
17 La, ŋga wra le Rome na to, ni lawee wraa chaa, wra ni cha chiin mna sɛ su nyjila ŋga ni wra ni nya.
18 O Tafun Nyiɛkpɔɔ wre u ti ŋga ble o Tafun Yesu Kristo wre we pan kre, mbe u mu fooro chin. Ŋu Timothy, mu chin imi na Onesiphorus na ni sumi Ephesus na mu da.