Soja Kprafun
2
Ni pɔ, ŋu rɛ, faŋga ŋga o taa Yesu Kristo dumiɛ nu kre ka ta.
2 Kee nyjɛ mna loo na ni yire dansiɛfɛɛnlɛ tataara yiɛ na, na kpali yire yii, mu leele mblɛ mu shɔ mu li, mu chin na pie jaa leele nyina yi yi pre nyina kee yire.
3 Mu yɛ yii mu kala nya ka na, na Yesu Kristo Soja kprafun wi.
4 Soja titi wa n wa mbe uyɛ pe na lewaa ŋmba u n pe Soja wi, mbra kee nyjɛ yi n fna pini, ŋgi na hin? U chaa mbe u lopom yiɛshɔ u na.
5 Tafɛŋgɛfun wa jaa fɛ mbe yira ta, fɔna u li tafɛŋgɛ mbra na.
6 Falifun ŋmba u yiɛnyina mu tnumu tun kre, wre we klu mbe see yirɛ kun.
7 Kee nyjɛ ni yuu ŋga, yi jawa chiriri, ŋgi na hin? O Tafun wre we ti mbe mu yi kro nɔɔloo.
8 Yesu Kristo ŋmba wra nyi mu yili kuulo nu wre sɔɔnri, ketaan kre ndaa kpali kre nyina na, Ŋunu David sele nu wra yiri.
9 Ŋga ni ketaan kre kpali kre ndra na, ni kala nyaa, kre ndra na pe jlɔnyi le ni na, na linkufun wi. La, Nyiɛkpɔɔ kee kre na ma pe jlɔnyi yire le.
10 Ki tia ni yila Nyiɛkpɔɔ leele mblɛ u wɔ pre na, mu niyɛ yii kanyana kro nu, mbe ki ti mbe pre ŋmaashɔmu ŋga kii Yesu Kristo nu kre ta, mbe blenyini yɛnyiŋge kre ta.
11 Pe kee ka yuu, ki pe kpra, mbo,
“Na wre na wre chaa mu ku kre,
wre na wre we chaa mbe nyi.
12 Na o ja mu frɔ ta,
wre na wre we chaa mbe ŋunumu li.
Na o u sin,
we o sin na.
13 Na o n pe kprafɛɛnlɛ kre,
wre pe kprafun nyjila kro nu.
Ŋgi na hin? Pan u kepele nyi nyjila kro nu.”
Tnumutunfun Chiriri
14 Mu leele pre sɔɔnri, mu yire Nyiɛkpɔɔ yiɛ mu pe jaari na pia na kakra wɛɛ lii, tnu ka n wa ki nu, la, mblɛ pe yi ndru kre, kla yi pe klai.
15 Gbeŋmba na mu tnumu tun mbe Nyiɛkpɔɔ mu pni, pe na tnumutunfun chiriri ŋmba u n na nyifɛɛrɛ pini u tnumu na wi, mu pe na lewo ŋmba u Nyiɛkpɔɔ kekpra nyina chiriri wi.
16 Mu yɛ wɔ mu yili kewɛɛ, na jijiere kakra nu, yire kee nyjɛ krɛrɛ leele yi nini na laari Nyiɛkpɔɔ na.
17 Yire kee nyjɛ nyini, pan yi nyi na kla ŋga ki wejikaara lii yi. Leele mblɛ pe yire kee yire pini pre plɛ lɛ Hymenaeus, na Philetus.
18 Pre pe fɛ mu laa kpra kre kro, na shɔnlifɛɛnlɛ pre plɛ shɔnlie klai, na yuu na, kunnyiɛ ŋga kee o yuu kre pan mu tro.
19 La, Nyiɛkpɔɔ nyuŋgo ŋga nɔɔ u le kre wa jaa jɔŋgɔ, a kee nyjɛ pe nyunɔ ki na yi kre, mbo, “O Tafun Nyiɛkpɔɔ wre chin mblɛ lɛ u leele.”a A “ŋmba u yuu na o Tafun Nyiɛkpɔɔ wre wo wi kre, u fna mbe laa sisaa pee kro.”
20 Katoo ŋga ki kpɔɔ kpan, yirɛ nyininyini nɛɛ ki nu, swa fiŋge, na swa nyiɛ yirɛɛ wa ki nu, yɛɛ wa tinyi ni pe yi tɛ, a yɛɛ wa pooro ni pe yi faanri, yɛɛ wa kee chiriri pe pini na yi ni, a yɛɛ wa nyjila kro nu pe yi tɛɛ na tnumu tuni.
21 Na wa uyɛ pe cheche mu yili yire sisam kee nyjɛ krɛrɛ nu kre, o Tafun we u tɛɛ mbe tnumu ŋga ki shian titi tun, ŋgi na hin? U nyu, mu fna na u Tafun we u tɛɛ mbe tnumu chichie tun.
22 Laa mu yirifum nyjila niŋge yire kro, mu ti mbe mu yiɛ nyina kee nyjɛ yi fraka, na shɔnlie, na koroo, na wejinyiŋge na. Ti mbe ŋu na mblɛ pe lɛɛ nunu teeri na o Tafun wre yeeri mbe u ya pe na kre pe nunu.
23 La, flo mu yili jijiere na kakra wɛɛ lie yire nu, chin na kakrɔ ni yire kee nyjɛ paan.
24 O Tafun sumifun n fna mbe pe kakɔtuŋu. U fna mbe u lɛɛ tna na ndro kro ni, mbe nyjii, mbe pe nyinafun chichie ŋmba u frɔ.
25 Na u uyɛ nyjiri na paara na mblɛ pe u nyu kaanri kre nyina kre, aada Nyiɛkpɔɔ we ti mbe pe jawala chinɛ mbe paan kpra kre chin,
26 a pe jawala we nyaa, mbe pe fɛ mbe yili Sutna wre pɛɛlɛɛ nu, ŋgi na hin? Sutna wre u pe yii mu tia pe taa ŋga wre chaa na.