Ble Hɛnyi Yire
3
Ja mu chin na, nyjila shelee kaa wa na paan ble hɛnyi yire nu.
2 Kre nyjila kre leele we pe jajaarafɛɛnlɛ, mbe pe swa nyibinyiɛfɛɛnlɛ, mbra peyɛ kpɔɔri, mbra lopom chaa, mbra nyu kpɔɔmu kee yuu, pia na pe sefɛɛnlɛ kee ndru, pia ayɛ chin, a pia pe cheche Nyiɛkpɔɔ yiɛ.
3 Pia peyɛ kori, pia peyɛ fooro chin, pie pe kabaarafɛɛnlɛ, pia jaa frɔ pe niŋge sisaa na, pe ndra we sheli, pia na ŋga ki nyu chaa,
4 pie na peyɛ woni mbra kaan, mbra fiɛlɛ kala na, pie na pini na pe kee kro chin, pie yɛshɔɔrɔ yirɛ kori mbe wɛ Nyiɛkpɔɔ na.
5 Pie peyɛ pe na Nyiɛkpɔɔ pe sumi kpra kolo na, nde jaŋga ŋga kii wa kpra sumiɛ nu kre, pe ki je. Mu yɛ wɔ mu yili pre leele mblɛ nu.
6 Pre leele pre plɛ pe tro na lee kalonyi nu, na chiɛlɛ mblɛ sisam yi wɛ pe na, a pra tro pe niŋge nyininyini kooloe na kre yiri, na pe jawala klai.
7 Pre chiɛlɛ mblɛ nyini, nyjila kro nu pe chaa mbe tuan, la, pe n ja mbe kpra kre chin.
8 Imi na Jannes na Jambres na Moses nyu kaanri kre, pan pre leele mblɛ kpra kre nyu kaanri, pe jawala n wa, ki tia pe shɔnlie kolo wa.
9 La, pia da haka, ndro kro we pe jijiere nya, imi na leele na Jannes na Jambres nya kre.
Paaranyinaa Haŋa
10 La, ŋu Timothy, mu ja mu taa ni kee nyjɛ ni mu nyina na, na ni kepele, na ni jawala, na ni shɔnlie, na ni frɔ, na ni koroo, na imi na ni niyɛ nyjii,
11 na ni fiŋgee, na ni kanyana, yi krɛrɛ mu li yi na kro. Kee nyjɛ yira ni da Antioch, na Iconium, na Lystra na yire kro mu yi chin, imi na pra ni fiŋge, a ndaa frɔ, la, o Tafun wre na ni shɔ mu yili yi krɛrɛ nu.
12 Leele mblɛ pe chaa mbe tro Nyiɛkpɔɔ kolo na, mbe pre na Yesu Kristo pe nunu kre, pie pe fiŋge.
13 La, sisampefɛɛnlɛ na fanafɛɛnlɛ we kro mbra sisam pini, suwi mbra leele fana, ŋgi na hin? Sutna pre titi fana.
14 La, ŋu rɛ, tni shɔnlie ŋga ndaa mu nyina, a mna ki shɔ mu li kre nu. Leele mblɛ na lɛ mu nyinafɛɛnlɛ pre, mu pe chin,
15 a mu chin na mu bimi mu yire mu Nyiɛkpɔɔ kee nyjɛ pe nyunɔ mu tɛɛ yire chin, yire yie jaa mu ŋga jawala mbe yire Yesu Kristo shɔnlie na, mbe sɛ na mu ni ŋmaashɔmu nu.
16 Nyiɛkpɔɔ kee nyjɛ pe nyunɔ mu tɛɛ yire kro, wre Nyiɛkpɔɔ pan yi yiri, a yi nyu mbe pe yire yi na mbe o nyina kpra kre, mbe yi tɛɛ mbe o yiɛ kee yo o pan, mbe o yi tɛɛ mbe oyɛ fraka, mbe yi tɛɛ mbe o nyina kolo chiriri ŋga na ki fna o tro.
17 Imi kie pe mbe Nyiɛkpɔɔ sumifun kro nyu, mbe jaa kee chichie pe.