4
Ni yire Nyiɛkpɔɔ, na o Tafun Yesu Kristo ŋmba we leele mblɛ pe le, na mblɛ pe ku kro kpra kun wre yiɛ, ŋga u paan mbe ŋunumu li kre na, ni mu jaari,
2 yiɛnyina mna kee kre kpali nyjila kro nu, ta leele kna mna pe yiɛ kee yuu pe pan, mna pe leni gbeŋmbaa, mu frɔ tɛɛ mu pe nyina nyjila kro nu.
3 Nyjila ka paan mbe lewo wa ndie tɛɛ kpra kee kre nyinaa na, la, nyjɛ pre titi chaa na pie taa, pie nyinafɛɛnlɛ tataara haa cha, mbe pe kee nyjɛ pe chaa mbe loo yo pe pan.
4 Pia na chaa mbe kpra kre kee loo ndie ni, chalɛɛlɛ mbuura na pie ndie tɛɛ.
5 La, ŋu rɛ, gbeŋmba mu muyɛ yii kolo kro na, frɔ kanyana nu, pe ketaan kre kpalifun, mu tnumu tun na Nyiɛkpɔɔ sumifun wi.
6 Mi rɛ, nyjila da mbe pe ni tɛɛ mbe sra wɔ, ni nyjila da mbe ni yili tra mna.
7 Ni wiire ŋga ni wi kre, mna ki fna ni wi mbe sɛ su krɛrɛ, ni da wa, ni ni shɔnlie yii kɛ shiin.
8 Fuŋgaami ŋga ni wi mu yili, yira ŋga ki fna mbe lewo ŋmba u fraka ta kree wa na ni sri. O Tafun kpra kunfun ŋmba u fraka wre, we ni ŋga kre yira kre u pan ble kre nu, mi chiin ma we ŋga ki yi, la, mblɛ pe u kori na u sri mbe u pan pre kro.
9 Jande, gbeŋmba mu pan mu ni nya nyaanyaa.
10 Demas kna mu waŋgra ŋga yirɛ kori, mu fɛ mu laa ni kro. U fɛ mu sɛ Thessalonica na, a Crescens wre sɛ Galatia na, a Titus wre sɛ Dalmatia na.
11 Luke chiin uu wa ni jaara. Ŋu na Mark e pan, ŋgi na hin? We jaa ya ni na tnumu nu.
12 Ni Tychicus tun Ephesus na.
13 Na maa na paan, mna paan na ni dodoŋgi titnɔŋɔ ŋga ndaa ti Carpus pan Troas na kre ni, ta paan na hlɛ yire ni na, nyjɛ yi ni shian titi yi yurɛ hlɛ wee yire.
14 Alexander, tutuŋu wre ni pe sisaa kpɔɔ ka, o Tafun wre we ŋga u pe kre fɔlɔ tɔ u na.
15 Ŋu titi ta u dɔɔtaa, ŋgi na hin? U o toni kolo kee ŋga o kpali kre na.
16 Ŋga ndaa ni nyu woni jle kre, ndro nsra yire ni kro, pe kro na laa ni na. Nyiɛkpɔɔ waa shia ki jawa sisaa mbe pe ŋga.
17 La, o Tafun na ya ni na, mna ni le faŋga, a ndaa ja mna kee kre kpali a leele mblɛ pe n pe Judae pre kro na loo, a Nyiɛkpɔɔ na ni wɔ Jirae nyuu.
18 O Tafun wre, we ni wɔ mbe yili kefuɛn nyjɛ leele chaa ni pe kro nu. Mbe ni wru mbe sɛ u nyjeeri Ŋunumu kre nu. Wre wo yi yɛnyiŋge nyjila kro nu! Ami.
Shaaraa
19 Ni Priscilla, na Aquila shaari, pre na Onesiphorus sele ni kro.
20 Erastus na kro Corinth na, a Trophimus naa yaa, ki tia ndaa u ti Miletus na.
21 Gbeŋmba mu pan mbe weere nyjila kre chiin da.
Eubulus, na Pudens, na Linus, na Claudia e shaari, na o wolo shɔnlifɛɛnlɛ pre ni kro.
22 O Tafun wre na e ŋumu pe tni. A yire na Nyiɛkpɔɔ dumiɛ e tni.