Titus 1

Titus Hlɛ

Shaaraa

Mi Paul, Nyiɛkpɔɔ sumifun, na Yesu Kristo bituŋu wre pan hlɛ ŋga yiri. Nyiɛkpɔɔ na ni wɔ, mna ni tun na ni sɛ ka ya u leele mblɛ u wɔ pre shɔnlie na, mbe pe nyina kpra kee ŋga kii wa o sumiɛ kre nu.

2 Kre kpra kre, blenyini ŋmaa dankna ni ki paan. Nyiɛkpɔɔ ŋmba u n pe kafnu kre, wre wra kre ŋmaa ŋga kee nyu yo, mna chin mu yirɛ kro nɔɔhle.

3 Ŋga nyjila ŋga wra tɛɛ kre na da kre, wra ki wɔ mu nyina u ketaan kre nu. U ketaan kre, wra ki le ni kɛɛ, a ndaa yire o ŋmaashɔfun Nyiɛkpɔɔ wre nyu kee na mna ki kpali.

4 Ni kpra pɔ Titus, ŋmba mi na wree wa shɔnlie nunu nu kre, wre ni kre hlɛ ŋga nyunɔi mbe sɛ ŋga.

O lɛ Nyiɛkpɔɔ, na o ŋmaashɔfun Yesu wre pe mu ŋga dumiɛ, na wejinyiŋge.

Tnumu Ŋga Titus Tun Crete Na

5 Ndaa mu ti Crete na mbe mu kee nyjɛ yi fna mbe pe wa yire le mbe yi mbra nunu, mbe sumifɛɛnlɛ pre loplombo wɔ chia kro na.

6 Kee nyjɛ ni mu nyina yire sɔɔnri. Sumifɛɛnlɛ pre lopom n fna mbe pe u kee sisaa ka ta mbe yo. U chɔ fna mbe pe nunu, a u biile fna mbe pe shɔnlifɛɛnlɛ, a ki n fna mbe pe nyibie sheli, ndee mbe pe pe ndikambla.

7 Ŋga u Nyiɛkpɔɔ tnumu le kre ndra na, ki n fna mbe pe u kee sisaa ka ta mbe yo. U n fna mbra uyɛ kpɔɔri, ndee mbe u krɔ na kuun nyaanyaa, ndee mbe pe gbɔgbɔɔ, ndee mbe pe kakɔtuŋu, ndee mbe u yiɛ na nyinai swa na.

8 U fna mbe pe lewo ŋmba u ja na fumblɔ le, mu chichie kori. U fna mbe pe lewo jawalafun mbe fraka, mbe pe cheche, mbe pe lewo ŋmba we jaa uyɛ yii mbe kee ŋga ki n fna gbeele.

9 Ki fna mbe kpra kee ŋga pe u nyina kre, mbe u ki yii kɛ shiin, mbe jaa leele gbeŋmba, mbe pe nyina kee kre, mbe leele mblɛ pe paara na kee kre taanla pre nyina kee nyjɛ na pe punu.

10 Ŋgi na hin? Leele tataaraa wa na taanri, na plɛ fana na kewɛɛ ni, Judae mblɛ pe chaa shɔnlifɛɛnlɛ pre nu kre, pre pe yire kee yire pini.

11 Ki fna mbe mu ti mbe pe nyu tɔ, mbe kee yire pe yuu yire ti, ŋgi na, kee nyjɛ yi n fna mbe pe nyina kre, yire na pe yire mu na sele poponyi jawala klai, mu na troi yire nyifɛɛrɛ kooloe yire na na swa taa.

12 Pre Crete leele pre ŋmba wra pe pe kee nyanyofɛɛnlɛ pre wa, wre wra da mu yo mbo, “Crete leele pre, kafinɛfɛɛnlɛ bribri lɛ, pan pe nyi na yurɛ sisaala lɛ, pe gbashia kpɔɔ, a pan pe aliire sisaa lii.”

13 Kala ŋga wra yo kre na pe kpra. Kre kee ŋga ndra na, e pe yiɛ kee yo pe pan chichie, mbe ki ti pe sheli shɔnlie nu.

14 Mbe pia kro mbe Judae mbuura kee yire yii kɛ shiin, mbe ndie tɛɛ leele mblɛ pe kpra kee kre je kre pan.

15 Leele mblɛ pe pe cheche kre, yira kro pe pe pan cheche, la, leele mblɛ nu sisam nyi, a pe n shɔnli kre, yaka n wa mu pe cheche pe pan, ŋgi na hin? Pe jawala, na pe lɛɛ kee pe sisam bribri.

16 Pe yuu na pe Nyiɛkpɔɔ chin, la, pe kepele n na nyina ma. Pe Nyiɛkpɔɔ pra, mu pe ndikambla, pe n fna mbe jaa kee chiriri ka pe.