3 Chiɛlɛ loplombo pre chɔɔ, yo pe pan na pe peyɛ pe na chiɛlɛ mblɛ pe pe cheche lɛ. Pia na leele kro yuu, ndee mbe kaari gbɔgbɔɔlɔ. Pra kee nyjɛ yi nyu nyina,

4 mbe ki ti pe jaa bichabɛɛlɛ pre nyina mbe pe pe pilɛ kori, mbe pe biile kori,

5 mbe jawala ta, mbe pe cheche, mbe jaa pe katoo lefɛɛnlɛ mblɛ pe pe pilɛ kee ndru, mbe ki ti mbe ndro wa Nyiɛkpɔɔ kee kre kee sisaa ka ta mbe yo.

6 Yirifumblɔ pre chɔɔ, yo pe pan na pe jawala ta.

7 Ŋu titi, kolo kro na, ti mbe pe mu kepele chichie le mbe mu tuan. Ta koroo nyina, mu ti mbe mu yiɛ nyina kee nyjɛ mu nyina yire na.

8 Ta kee nyjɛ yi fna yuu, mbe ndro wa jaa mu nyu kaanri, mbe ki ti mbe nyifɛɛrɛ mu loŋgoolo pre gbo, ŋgi na hin? Pe n o kee sisaa ka ta mbe yo.

9 Tinlɛ fna mbe li pe tafɛɛnlɛ kee na. Pe ti mbe pe tafɛɛnlɛ yiɛshɔ pe na kolo kro na. Pia na nyu kna na pe ni,

10 ndee mbra pe juu. Ki fna mbe pe pe tafɛɛnlɛ pre nyina na pe kepele nyu, mu pe kprafɛɛnlɛ, mbe ki ti mbe o ŋmaashɔfun Nyiɛkpɔɔ wre kee kre pe niŋge ni.

11 Ŋgi na hin? Nyiɛkpɔɔ u dumiɛ kre wɔ fimi na, mbe ndro kro yire ki na mbe ŋmaashɔmu ta.

12 Kre dumiɛ ŋga ki o nyina mbe o o kepele nyjɛ yi n fna yire, na waŋgra niŋge yirɛ yire ti, mbe jawala ta, mbe fraka, mbe jaa Nyiɛkpɔɔ kolo wru waŋgra ŋga nu.

13 Ŋga o tni mu na o dwan ble ŋga na o kaan kre sri ŋga, kre ble kre oo Nyiɛkpɔɔ, na o ŋmaashɔfun Yesu Kristo wre yɛnyiŋge nya.

14 Wre wra uyɛ tɛɛ mu sra wɔ mu o ŋga, imi kie pe mbe u o shɔ mbe yili o sisam kro nu, mbe o pe leele cheche, mblɛ o pe u wolo, mu na chaa mbe ŋga ki fna pe.

15 Ta Leele nyina yire kee nyjɛ, mu pe le gbeŋmbaa, mu mu jaŋga ŋga mu ta kro tɛɛ mu pe yiɛ kee yo pe pan. Maa ti mbe ndro mu le fiɛn.