Kristofɛɛnlɛ Kepele
3
Mu leele pre sɔɔnri mbe pe peyɛ nyjii mbe waŋgra loplombo, na jaŋgafɛɛnlɛ ŋga, mbra pe kee ndru, mbe peyɛ kna na pie kee ŋga ki nyu kro pe.
2 Yo pe pan na pia na kefuɛn yuu leele na, a pia na tuni. Pe peyɛ nyjii, mbe peyɛ pe komm mbe ndro kro ŋga.
3 Ŋgi na hin? Nyjila ka nu na jijiele lɛ wre na chɔɔ, a o na pe ndikambla, na tro mna ki n fna. O sisam niŋge, na o yɛshɔɔrɔ yirɛ na o pe tinlɛ. O naa linku kee pini, a keyira naa wa o nu, leele na o pra, a o na pe pra.
4 La, ŋga o na o ŋmaashɔfun Nyiɛkpɔɔ wre fooro chiɛn, na u koroo kre nya kre,
5 wra o shɔ. Ki n pe kee chiriri ka o na pe, la, wre titi wraa chaa mna o fooro chin, mna o sisam je mu laa o na, mna yire Kpra Ŋumu wre wra o ŋga wre na mna o ŋga ŋmaa fɔŋgɔ.
6 Nyiɛkpɔɔ na yire Yesu Kristo na mna o ŋga Kpra Ŋumu wre imi na ki fna,
7 mbe ki yire u dumiɛ kre na mbe o fraka Nyiɛkpɔɔ yiɛ, mbe paan blenyini ŋmaa ŋga na o kaan kre ta.
8 Kee nyjɛ ni yo ŋga krɛrɛ, yi pe kpra.
Ni chaa mbe mu yire kee nyjɛ yo chiriri mbe pe loo, mbe ki ti mbe mblɛ pe Nyiɛkpɔɔ shɔ mu li kre, mbe pe yi pe keshian, mbe yire yi na mbe ŋga ki fna pe. Yire kee nyjɛ nyu, mu pe tnu ni mu lewo ŋga.
9 La, ŋu rɛ, maa na jijiere kakra lii, a mblɛ pe pe tolɛɛlɛ mɛɛ yeerii na paaraa, na kakrɔ tuni Moses mbra yire na kre, mu yɛ kun pe na. Yire kee yire krɛrɛ tnu ka n wa yi nu.
10 Ndro ŋmba u leele lalaa klai kre, u jaari mbe ki da gbee shiin, na u je na pini ma tɛ kre, maa shia nyu kun na u ni na.
11 Na ndro pini ma kre, mu chin na sisaa pefun wi, a wre ndro wre fun kolo kre na, mu uyɛ gbun pimi ni.
Paaranyinaa Haŋa
12 Na ndaa Artemas, ndee Tychicus tun mu pan kre, gbeŋmba na mu pan ni pan Nicopolis na, ŋgi na hin? Ni ni jawala pe na zaara nyjila kre we ni da wa.
13 Gbeŋmba mu ya mbra twanfun ŋmba pe yeeri Zenas wre, na Apollos na, mbe pe jaa pe kolo kre kun. Le na pie yirɛ nyjɛ yi pe shian kro ta.
14 A o leele pre le mbe praa chichie pini, mbe jaa ya mblɛ pe shian pre na, pia na peyɛ leni kee nyjɛ nu tnu n wa nu.
15 Mblɛ mi na pree wa mna kre kro mu shaari. O wolo mblɛ wre na pre shɔnliee nunu kre shaari o pan.
Yire na Nyiɛkpɔɔ dumiɛ e tni nyjila kro nu.