3 O lɛ Nyiɛkpɔɔ, na O Tafun Yesu Kristo wre pe e ŋga dumiɛ na wejinyiŋge.

4 Philemon, na ni nyiɛtali kpan, ni mu sɔɔnri, na ni Nyiɛkpɔɔ kaan mboo mu ndra na.

5 Ŋgi na hin? Ni mu koroo ŋga mu Nyiɛkpɔɔ leele pre kro kori kre, na mu shɔnlie ŋga mu ta o Tafun Yesu Kristo nu kre loo.

6 Ni nyiɛtalaa yi na, ŋga o kro pe shɔnlifɛɛnlɛ, mu pe nunu ŋga, mbe kra yire ki na mbe mna dwamu ŋga o na ta o tnimu nu Kristo nu kre, nɔɔloo kpɔɔ.

7 Ni ŋmbrɔ ŋmba ni kori, mu koroo kre tia ni yɛshɔɔrɔ kpɔɔ ta, mu ni le gbeŋmbaa. Mu tia Nyiɛkpɔɔ leele pre kro yiɛshɔ.

8 Kre kee ŋga ndra na, mbe na gbun ta, ŋga ni pe mu ŋmbrɔ Kristo sumifun kre ndra na, mbra yo mu pan na mu kee ŋga ki fna pe.

9 La, koroo ŋga ni mu kori kre ndra na, ki fna mbe ni mu tali, mbe jaa tro kolo ka na mbe ki paara mu pan, ŋgi na hin? Mi Paul blɛlɔɔ ŋmba nyini, pe yila Yesu Kristo na mu ni yii mu le nyuŋgo.

10 Ni tali na Onesimus kaan, ni pɔ wi Kristo nu, ŋgi na hin? Ŋga ndaa wa nyuŋgo kre, ndaa pe u lɛ.

11 Nyjila ka nu, na u kee n tnu ni mu mu ŋga, la, fuŋgaami ŋga u kee tnu ni mu mi na ŋu kro ŋga.

12 Ni u tuni mbe u ndruu pan mu pan wa, u pe ndro ŋmba ni kori.

13 Ŋga pe ni yii mu le nyuŋgo ketaan kre ndra na kre, ni chaa mbe wra tni ni jaara, mbra yire mu jeelee na, mbraa yaa ni na.

14 La, ni n na chaa mbe mu ya ni na jaŋga na, ni chaa mbe ŋu titi mu chaara tɛɛ mbe ki pe. Ki tia ni n na chaa mbe kee ka pe, fɔna mu li ki na tun.

15 Aada kre kee ŋga kra tia Onesimus na laa mu na chiɛri, mbe ndruu paan tni mu jaara.

16 Fuŋgaami u n pe na tnu wi na, u wɛ tnu na. Fuŋga u pe o ŋmbrɔ Kristo sumifun ŋmba ni kori. U nyu mu ni ŋga, pan ni chin na we nyu mbe mu ŋga kpɔɔ. Tnu wi chɔ, nde mu ŋmbrɔ Kristo sumifun wi.

17 Kena na mu ni jawa na tnumu nunu mi na ŋu tuni kre, imi na mna ni le kre, u le ma.

18 Na wra mu pe sisaa, ndee na u mu fɔlɔ ka li kre, ki nyu gbun mu pan mu ni ŋga.

19 Mi Paul titi kɛ nyunɔmu yi kre, fɔlɔ ŋga u li kpan, mbe ki tɔ mbe mu ŋga. Mba jawa na mu ŋmaa ŋga mu yire ni na mu ta kre na, mbe fɔlɔ kre wa mu na.

20 Kena jande, o Tafun wre saara na, kre kee ŋga pe ni pan, ti mbe ni yiɛshɔ na ni ŋmbrɔ Kristo sumifun wi ŋu.

21 Ŋga ni kre kee ŋga nyunɔi ŋga, ni shɔ mu li na mu kee ŋga ni mu tali kre pe mbe ni ŋga. A ni chin na mu pe mbe ki wɛ ma na.

22 Ŋga ki taa yi na, ni chaa mbe mu nyuŋgo gbeele mbe tɛɛ ni pan, ŋgi na hin? Ni dankna na Nyiɛkpɔɔ we e nyiɛtalaa yire kro loo, mbe ni wɔ mbe e ŋga.

23 Epaphras ŋmba pe yii mu le nyuŋgo Yesu Kristo ndra na, na mi wi kre mu shaari.

24 Pan chɔɔ ni ŋmbilɛ tnumutunfɛɛnlɛ Mark, na Aristarchus, na Demas, na Luke kro mu shaari.

25 Yire na o Tafun Yesu Kristo dumiɛ e tni.