Hebrews Hlɛ
Nyiɛkpɔɔ Yire Yesu Na Mu Paara
1
Nyiɛkpɔɔ na yire u kee nyanyofɛɛnlɛ na, mna paara gbee tataara, na kooloe nyini nyini na, mna o tolɛɛlɛ pre nyina fa.
2 A fuŋgaami, ble hɛnyi nyjɛ nu o nyi ŋga rɛ, u Biblɔ wre na u yire na paara o pan. Wre u wɔ, mu yirɛ kro wru mu le u kɛɛ. Wre na wra yire mna yirɛ nyjɛ yii wa waŋgra nu kro wa.
3 Imi na Nyiɛkpɔɔ yɛnyiŋge nyi kre to, pan u Biblɔ wre yɛnyiŋge nyi na. Imi na Nyiɛkpɔɔ sembremu nyi to, pan u Biblɔ wre nyi na. U Biblɔ wre u u jaŋga nyu kee kre tɛɛ mu waŋgra ŋga yii. Ŋga wra o sisam pɔ mu laa o na kre, a wra sɛ tni Yɛnyiŋge Kpɔɔfun wre kalie nyjeeri.
Nyiɛkpɔɔ Biblɔ Wre Wɛ Nyjeeri Bitumblɔ Na
4 Nyiɛkpɔɔ Biblɔ wre pan mu wɛ bitumblɔ pre na, imi na u mɛɛ na wɛ pe na kre.
5 A nyjeeri bitumblɔ pre ŋmbi haa pan Nyiɛkpɔɔ na da mu yo na,
“Ni Biblɔ wi ŋu, a mu lɛ wi mi.”a
Ndee, ŋmbi haa pan wra yo na,
“Mbe pe mu Lɛ,
mbe mu pe ni Biblɔ hin?”b
6 A ŋga Nyiɛkpɔɔ na u bijlo wre tun mbe u pan waŋgra nu kre, wra yo na u bitumblɔ pre kro pe u sumi.c
7 La, kee ŋga wra yo bitumblɔ pre haa na yi na, we pe kaari u fuflɛ bitumblɔ, na u kanhun ndile.d
8 A u Biblɔ wre rɛ, wra yo u pan mbo,
“Ŋu Nyiɛkpɔɔ,
mu ŋunumu kree wa nyjila kro nu.
A mu ŋunumulie kolo pe kpra kolo,
mu fraka.
9 A mu kpra kori,
mu sisam fun.
Kre ki tia Nyiɛkpɔɔ,
a mu Nyiɛkpɔɔ mu wɔ,
mu mu fa simi,
mu mu ŋga yɛshɔɔrɔ
mu wɛ mu ŋmbilɛ na.”e
10 A wra ndru mu yo u pan mbo,
“Ŋu waŋgra Tafun,
jle gbamm kre,
ŋu mna nyjeeri na tra wa,
a mu kɛ nyu tnumu yi kro.
11 A yi krɛrɛ we kɔ,
la, muu wa nyjila kro nu.
Yie lɛ na yokunumɛɛ yi,
12 mbe mu yi ka na yonyi yi,
mbe yi chinɛ fɔŋgɔ.
A ŋu rɛ, imi na mu nyi,
pan mu kro,
mu yɛlɛ wa kɔ fio.”f
13 A nyjeeri bitumblɔ pre, ŋmbi haa pan Nyiɛkpɔɔ na da mu yo na,
“Tni ni kalie mu sɛ su nyjila ŋga nu,
mbe mu loŋgoolo yii,
mbe le mu jaŋga jaara hin?”g
14 Bitumblɔ pre krɛrɛ, pe pe ŋumu mblɛ pe Nyiɛkpɔɔ sumi, a wra pe tuni pra paan na yaa mblɛ ŋmaa u shio pre na.