Ndikana Ŋga Pe Pe Ŋmaashɔfun Wre Na
2
Nyjɛ krɛrɛ na ki fna mbe o ndie tɛɛ mbe o Tafun kee kre loo chichie, mbe waa laa ki kro.
2 Kena na Nyiɛkpɔɔ kee nyjɛ nyjeeri bitumblɔ pre na pan mu yo yire krɛrɛ na pe, a mblɛ praa punu yi na, ndee mna ndikana pe yi na kre, Nyiɛkpɔɔ na pe ndie tini imi na ki fna.
3 Kena na o ŋmaashɔmu kpɔɔ ŋga sembremu je, mni oo pe mbe shɔ hin? O Tafun wre titi na klu mna ŋmaashɔmu ŋga kee yo, a mblɛ pra ki loo pre, ki nyina o pan na kpra yi.
4 A Nyiɛkpɔɔ na ki dansiɛrɛ li, mna kawako kee, na kekpɔɛ nyini nyini pe, mna pe ŋga Kpra Ŋumu wre, imi na wre titi chaa.
Nyjeeri Bitumblɔ Pre Wɛ Yesu Na Nyjila Chiɛri Ka Nu
5 A waŋgra ŋga kie pan na kre, ŋga kee o yuu ŋga, ki n pe nyjeeri bitumblɔ kɛɛ Nyiɛkpɔɔ we ki le.
6 La, imi na pe ki nyunɔ mu tɛɛ kre mbo,
“Lewo wi ŋmbi kuraa,
mbe mna u kee jawa hin?
Ndee, lewo pɔ wi ŋmbi,
mbe mu kna mbe u le hin?
7 Ŋu Nyiɛkpɔɔ,
mu u wɔ nyjila chiɛri ka nu,
mbe nyjeeri bitumblɔ pre wɛ u na.
A mu chin mu u ŋga yɛnyiŋge,
na kpɔɔmu.
8 A mu tia u jaŋga ta yirɛ kro na.”a
Ki nyina chasi na Nyiɛkpɔɔ yira kro le lewo jaara. Kena yaka n wa, a u n lewo ŋga jaŋga ki na, a nde o n nya a lewo jaŋga ta yira kro na tun.
9 La, o Yesu nya, na kie pe nyjila chiɛri ka nu kre, bitumblɔ pre na wɛ u na, a kanyana kumu ŋga u ku mu lewo ŋga kre ndra na, a Nyiɛkpɔɔ u ŋga kpɔɔmu, na yɛnyiŋge, a u yire Nyiɛkpɔɔ dumiɛ ŋga u lewo dumi kre na, mu ku mu lewo kro ŋga.
U Kala Nya Mu Chin Mu Pe Cheche
10 Kra nyu mu fna, na Nyiɛkpɔɔ ŋmba wra yirɛ kro pe uyɛ pan wre, na tia Yesu na yire kanyana na, mu nyu kolo kro na, mbe yire ki na mbe pan Nyiɛkpɔɔ biile nɛɛrɛ ni u yɛnyiŋge nu. Ki tia Yesu wi ndro ŋmba na leele we tro mbe ŋmaashɔmu ta.
11 Yesu u sisam laari leele na, mbe pe pe cheche, a wre na mblɛ u pini cheche pre lɛɛ nunu. Ki tia Yesu n na nyifɛɛrɛ pini na we pe yeeri u chinlɛ.
12 Imi na wra yo kre mbo,
“Nyiɛkpɔɔ, mbe mu kee yo ni chinlɛ pre pan,
mna pie fni kpan,
mbe mu ŋga mɛɛ pe yiɛ na.”b
13 Yesu na paara na mbo,
“Mbe ni shɔnlie kro wru mbe taa Nyiɛkpɔɔ na.”
Wra ndru mu yo na mbo,
“Mi na biile mblɛ Nyiɛkpɔɔ ni ŋga pre lɛ kre.”c
Srawɔfun Lopom Titi Yesu Sra Wɔɔ
14 A ŋga biile pre pe leele, mu wejikaara, na nyimi ta kre, ki tia Yesu na pan na pre lɛ, mna wejikaara na nyimi ta, mbe yire u kumu na, mbe Sutna ŋmba kɛɛ kumu jaŋga nyi wre kɔ mbe wa.
15 Mbe mblɛ pra yila kumu fiɛrɛ na, mu kaari tinlɛ pe tnimu nu kre, mbe u pe shɔ mbe wa.
16 A ki pe kpra na nyjeeri bitumblɔ pre na ma Yesu na yila mu pan, la, Abraham sele leele pre na wra yila.
17 Ki tia kolo kro na, Yesu na pan na u wolo pre lɛ, imi kie pe mbe u pe pe Srawɔfun lopom titi, mbe pe foorochinfun, na kprafun Nyiɛkpɔɔ tnumu kre nu, mbe ki yire ki na mbe u wolo pre sisam tinkɛɛ ta.
18 A ŋga wre titi na pan mu kala nya, a Sutna na u nyu cha kre ndra na, ki tia u ja na yaa mblɛ nyu Sutna chaa pre na.