Kristo Wɛ Moses Na
3
Kena ni wolo shɔnlifɛɛnlɛ mblɛ Nyiɛkpɔɔ yeeri, e Yesu jawa, e u shɔ e li, wre Nyiɛkpɔɔ tun na u paan pe o Srawɔfun lopom titi.
2 A wra kpra kolo wru, mna li ŋmba wra u tun wre kee na, imi na Moses na li kee kre na Nyiɛkpɔɔ katoo kre.
3 Lewo ŋmba u katoo sin wre mɛɛ taa, mu wɛ katoo kre titi na, kre ki tia Yesu yɛnyiŋge wɛ Moses na kre.
4 La, katoo kro, lewo u ki siin, a nde Nyiɛkpɔɔ u yirɛ kro gbeele.
5 Moses rɛ, wra kpra kolo wru, mna sumi Nyiɛkpɔɔ katoo wa na tnu wi, mna kee nyjɛ Nyiɛkpɔɔ naa paan mbe yo mbakɔ yire krɛrɛ kee yo.
6 La, Kristo na kpra li Nyiɛkpɔɔ katoo, na Nyiɛkpɔɔ Biblɔ ŋmba u u Lɛ katoo le wi. Na o yira ŋga na o kaan kre yii kɛ shiin, na yɛshɔɔrɔ, na shɔnlie ni wala, kena wre lɛ Nyiɛkpɔɔ katoo.
Mblɛ Pe N Shɔ mu Li Pre Jaaraa
7 Kena imi na Kpra Ŋumu wre yo kre mbo,
“Na e Nyiɛkpɔɔ mana loo aŋga,
8 yaa shia ndikana pe,
imi na ni leele na ni hla,
mna ni penle nyjila ŋga ni praa wa tablɔ tra nu kre.
9 E tolɛɛlɛ na ni penle,
mna ni tnumu nya yɛlɛ fuloe shiin.
10 Pe ndra na,
krɔ na ni kun,
a ndaa yo pe pan na,
pe fun ni na kolo kro na,
a pe n na ni nɔɔ ndru,
a pe n ni chin.
11 Kra tia ni krɔ na kun,
a ndaa da mna pe ŋga,
na pe wa wa le ni wuuhaa kre nu.”a
12 Ni wolo, kena e eyɛ le chichie, mbe wa waa shia jawala sisaa le, mbe u shɔnlie wa, mbe laa Nyiɛkpɔɔ ŋmba uu wa blenyini wre kro.
Kpralie Sheli
13 Kena e na paara e na eyɛ gbeŋmba, mbe sisaa pee waashia wa fana mbe u ndikana pe.
14 A na o o shɔnlie jle kre yii kɛ shiin, mu sɛ su waŋgra kla ble kre, wre na Yesu we sɛ tni lawee nunu nu.
15 La, imi na Nyiɛkpɔɔ kee kre pe nyunɔ mu tɛɛ kre yo kre mbo,
“Na o waa u mana loo aŋga,
waashia ndikana pe,
imi na pra pe, mna u hla fa kre.”b
16 A mblɛ haa pra u mana loo mna je mu u hla kre hin? Leele mblɛ ni Moses na yiri Egypt tra nu pre lɛ.
Judae Fakee
17 Leele mblɛ haa ni Nyiɛkpɔɔ na krɔ wru yɛlɛ fuloe shiin kre hin? Leele mblɛ pra sisaa pe u na mna ku tablɔ tra kre nu pre na maa?
18 A mblɛ haa wra da mu ŋga, na wa ti pe le u wuuhaa kre nu kre hin? Mblɛ pra ndikana pe u kee kre na pre na lɛ.
19 Kena fuŋgaami ŋga, o chin na pre leele mblɛ nsra le u wuuhaa wa, ŋga pe nsra u shɔ mu li kre ndra na.