Shɔnlie Ni Pe Shie Wuuhaa Wa
4
Kena ŋga Nyiɛkpɔɔ wuuhaa ŋga kee u yo mu tɛɛ kre wa tɛ ŋga, e ti mbe o u fiɛ, mbe wa kɔɔ wa gbun pimi ni, mbe wa le u wuuhaa kre nu.
2 Ŋgi na hin? O ketaan kre loo imi na pra ki loo kre, la, kee kre pra loo kre nsra pe tnu ni pe pan. Ŋga kra tia rɛ, pe nsra ki loo na shɔnlie ni.
3 La, wre mblɛ o shɔ mu li kre we le u wuuhaa wa, imi na u ki yo kre mbo,
“Ni krɔ na kun, a ndaa da na,
‘Pia le ni wuuhaa wa.’”a
La, Nyiɛkpɔɔ na u kee kro pe mu kɔ, nyjila ŋga ni wra waŋgra gbeele mu kɔ kre.
4 La, pe ki nyunɔ mu tɛɛ Nyiɛkpɔɔ hlɛ kre nu haka mbo, “Ŋga Nyiɛkpɔɔ na yirɛ kro gbeele ble kɔɔnanu ni mu kɔ kre, ki kɔɔnashin wo kre na wra wuu.”
5 A kee nunu kre u yuu mna mbo,
“Pia le ni wuuhaa kre nu fio.”b
6 A mblɛ pra klu mu ketaan kre loo pre nsra le Nyiɛkpɔɔ wuuhaa kre nu, ŋga pra ndikana pe kre ndra na. A na koloo wa mbe plɛ jaa le u wuuhaa kre nu tɛ,
7 kra tia Nyiɛkpɔɔ nyjila ka wɔ mu tɛɛ, a kre yi aŋga. Yɛlɛ tataara na tro, a Nyiɛkpɔɔ na chin mu yire ŋunu David na mu ki kee yo mbo,
“Aŋga, na e Nyiɛkpɔɔ mana loo,
yaa shia ndikana pe.”c
8 Na Joshua na ja mna leele pre ŋga wuo, kaa Nyiɛkpɔɔ wa na wuuble fɔŋgɔ ka kee yo na.
9 Kre ndra na, wuuble wa Nyiɛkpɔɔ leele pan tɛ.
10 Kena ŋmba we le Nyiɛkpɔɔ wuuhaa nu kre, u tnumu ŋga u tun wuo shɔhaa u sɛ, imi na Nyiɛkpɔɔ na tnumu tun mu kɔ, mna wuu kre.
Jaaraa
11 Kena kolo kro na, e ti mbe o gbeŋmba na oo le Nyiɛkpɔɔ wuuhaa kre nu. Mbe o wa waashia ndikana nunu kre ka pe, mbaa ki kolo la.
12 Nyiɛkpɔɔ nyu kee kre, ŋmaa wa ki nu, a faŋgaa wa ki nu, mu tna mu wɛ brɔfiɛn yiɛshiin na, kre ki kuun na lee lewo nu, mbe sɛ su na kie lewo lam kee kro chin, mu ja na lewo loloŋgo kee kro kpra kuun.
13 Yira ŋga wre Nyiɛkpɔɔ gbeele kro, ka n wa mbe jaa ndra u na, yi krɛrɛɛ wa u yiɛ wra yi le na nyiɛlɛ ni. Ki tia Nyiɛkpɔɔ yiɛ oo sɛ kee kro nyu wɔ.
Srawɔfun Lopom Titi Yesu O Fooro Chin
14 Kena ŋga o Nyiɛkpɔɔ Biblɔ Yesu wre ta, o Srawɔfun Lopom titi, a u sɛ tni mna Nyiɛkpɔɔ nyi ŋga, e ti mbe o shɔnlie ŋga o ta kre yii kɛ shiin.
15 O Srawɔfun lopom titi wre rɛ, u pe lewo ŋmba u o pɔlɛm chin. Nyu chaara ŋga nu o nyi kre, pra u nyu cha ma, la, u nsra sisaa pe.
16 Kena e ti mbe o gbun ta mbe sɛ Nyiɛkpɔɔ dumiɛ ŋujɔɔn kre jaara, mbe u o fooro le, mbe o dumi. Na kee ka o shian, mbe u ki pe mbe o ŋga.