James Hlɛ
Shaaraa
1
Mi James, Nyiɛkpɔɔ na o Tafun Yesu Kristo tnu wre, mi pan hlɛ ŋga yiri na shie Israel leele sele kɛmbɔshiin mblɛ e nyina waŋgra kro nu kre pan, ni e shaari kro.
Shɔnlie Na Tnimu
2 Ni wolo, na e kanyana nyininyini nyaa e tnimu nu kre, e ti ki pe e pan yɛshɔɔrɔ kee.
3 Ŋgi na hin? E chin na, na e shɔnli, a pra e pini na le, e tni penlee yire nu kre, kena ee frɔ ni.
4 A e le na e frɔ kre we sɛ na e ni yiɛ, mbe yaa pra kre ee nyu mbe yaka wa e shian.
Kachindɛ Ŋga Ki Yiri Nyiɛkpɔɔ Pan
5 La, na waa wa e nu a u n chin kolo ŋga na we tro kre, ufun u Nyiɛkpɔɔ tali. Ŋgi na hin? Mblɛ pe Nyiɛkpɔɔ tali pre u pe kaan tataara, a u krɔ wa kun na pe ni fio. A ŋmba u tali kre, we yira ŋga u tali kre ta.
6 La, u tali na shɔnlie ni, mbe wa u jawala pe shiin. Ŋgi na hin? Ŋmba u u jawala pini shiin nyjila kro nu kre, pan ufun nyi na, imi fuflɛ epo nyumu wru na shie na paan kre yi.
7-8 Lewo ŋmba u u jawala pini shiin nyjila kro nu na kna na le kokoo shiin kre, waa jawa na we yaka ta Nyiɛkpɔɔ pan fio.
Swafun Yirɛ Wa Kro Nyjila Kro Nu
9 Ki fna mbe ŋmba u shian e nu kuraa kre, mbe u ti u yiɛshɔ. Ŋgi na hin? Nyiɛkpɔɔ u kpɔɔ.
10 A ŋmba uu swa ni e nu kre, u ti mbe u yiɛshɔ na Nyiɛkpɔɔ u pe fiɛn, a wa mu, we ku na toto yi.
11 Ŋgi na hin? Na yila wɛɛri mu ki gbun to, na ki kun mu to mbe yuwa, mbe ki nyumu fun. Pan swafun we ku u tnimu nu.
Sisam Sɛŋgɛ
12 Ndro ŋmba u frɔ taa kanyana nu kre wo yi dwamu. Ŋgi na hin? Na u ja mu tni penlee yire nu kre, Nyiɛkpɔɔ wɛ u ŋga ŋmaa ŋga kee wra yo mu tɛɛ, na leele mblɛ pe u kori pre we pe ŋga ki yi kre.
13 Ndro waa shia yo na, na nyu chaara kee ka u da, na Nyiɛkpɔɔ u u nyu chaa. Ŋgi na hin? Yaka n wa mbe jaa Nyiɛkpɔɔ nyu cha.
14 La, lewo niŋge sisaa ŋga kii wa u nu, kre ki u nyu chaa.
15 Kena na niŋge sisaa siire ta, sisam ki sii, a na sisam lɛ, kumu ni ki paan.
Yira Chichie Kro Nyiɛkpɔɔ Pan Ki Yiri
16 Ni wolo, yaa shia ti mbe ndro e fana.
17 Yira chichie kro, Nyiɛkpɔɔ pan ki yiri nyjeeri, a wre u tia lawee na nyaa, a wra u kee pe wɔmu nu, a wra kna.
18 Nyiɛkpɔɔ wre titi chaara na u o wa, mbe o yire u kpra nyu kee kre na mbe pe u yirɛ nyjɛ u gbeele kre yɛklo.
19 Ni wolo, ki fna e kee ŋga le chichie. Lewo kro fna mbe ndiile tɛɛ chichie mbra ndru, mbe u nyu dɔɔ ta, mbe u krɔ wa na kuun nyaanyaa.
20 Ŋgi na hin? Lewo ŋmba krɔ ki kuun nyaanyaa kre, wa jaa kee ŋga ki fraka Nyiɛkpɔɔ pan pe.
21 Kena e sisam kee, na ndra shelee kepele wɔ e tnimu nu. E eyɛ nyjii Nyiɛkpɔɔ yiɛ, e u kee ŋga u le e lolonyi nu kre yii. Ŋgi na hin? U kee kre, kre kie jaa e ŋmaa shɔ.
Ndikana Tnu
22 La, e na kala ŋga kee kre yo e pe kre pini, yaa pe ki loofɛɛnlɛ chiin mbra eyɛ fana.
23 Ŋgi na hin? Na wa pe kee kre loofun, a u n na ŋga kee kre yo u pe kre pini kre,
24 pan ufun nyi na lewo ŋmba we u yiɛ le dwanle nu, na u ki tɛɛ, mu krɔ kna tɔ, mbe u imi nyini u nyi fɛɛ.
25 La, ndro ŋmba u Nyiɛkpɔɔ ŋga ki tii mbe lewo uyɛ lam le mbe taa ki na, a ufun n pe lewo ŋmba u kee kre ndru mbe ki fɛɛ, la, a ufun pe kee kre loofun, na ki kepele pini kre, Nyiɛkpɔɔ we u dwan kee kro nu.