Swafɛɛnlɛ Na Shianfɛɛnlɛ
2
Ni wolo, ŋga e o Tafun Yesu Kristo, ŋmba uu wa yɛnyiŋge kpɔɔ ni kre shɔnli ŋga, ki n fna mbe e na leele plɛ kaan kpɔɔmu mbe plɛ ti.
2 Na swafun na shianfun pan e fnindoo, a swafun wre u swanyiɛ kɛgbrɛ, na yirɛ chichiele le le, a shianfun wre u yirɛ wɔɛlɛɛ le le,
3 a e waa swafun wre yiɛ le, maa u ŋga kpɔɔmu lawee, maa kna mu yo shianfun wre pan na tni mnawa.
4 Kena e sisaa pe, na e sisam jawala teeri na eyɛ yɔɔlɛ.
5 Ni wolo, e loo, shianfɛɛnlɛ mblɛ pee wa waŋgra ŋga nu kre, pre Nyiɛkpɔɔ woni, mbe pe shɔnlie ta kpɔɔ, mbe yire ki na mbe le u ŋunumu ŋga nyu u yo mu tɛɛ mblɛ pe u kori kre pan kre nu.
6 La, shianfun wre, e wre le lewaa. A swafɛɛnlɛ pre ma pe e yiri pɔɔrɔ, na jaŋga na, na shie kala lifɛɛnlɛ yiɛ na kree?
7 Pre swafɛɛnlɛ mblɛ pre pe paara na Kristo mɛɛ chichie ŋga pe taa e na kre taanla kre.
8 Na e li Nyiɛkpɔɔ mbra na, imi na pe ki nyunɔ Nyiɛkpɔɔ hlɛ kre nu kre mbo, “Mu ŋmbrɔ kori na mu wejikaara yi kre.”a Kena e kee ŋga ki fraka pe.
9 La, na e leele yoori kena e sisaa pe, a e Moses mbra taan.
Mbra Kee
10 A ŋmba we taa Moses mbra yire na kre, na waa nunu chom taan, kena ufun to yi kro nu.
11 Nyiɛkpɔɔ ŋmba u yo na, “Yaashia leŋgeere kla” kre, wre chɔɔ u yo na, “Yaashia liiku.” Ki tia na mu n leŋgeere kla, a maa sɛ liiku kre, mu to mbra nu.
12 Kena e ti mbe e paaraa, na e kepele pe na leele mblɛ kpra Nyiɛkpɔɔ we kun mbe yire u kee ŋga ki tii mbe lewo uyɛ ta kre na lɛ.
13 Ŋgi ndra na hin? Na Nyiɛkpɔɔ ndro ŋmba u n foorochiɛn ni kpra kuun kre, wra ufun fooro chin, la, ŋmba u lewo fooro chin kre, we chin na, na Nyiɛkpɔɔ kpra kuun kre, u fooro chiɛn kpɔɔ.
Shɔnlie Ŋga Ki Ku
14 Ni wolo, na lewo yo na uu shɔnlie ni, a u kepele n na ki nyina, u shɔnlie kre we jaa u ŋga ŋmaa ra?
15 Pan ki nyi na, na waa wa e nu, a u n yoŋgo ni na toni, ndee u n sro ni na lii,
16 a e wa waa yo ufun pan na Nyiɛkpɔɔ we ya mu na, mbe mu ŋga yoŋgo na sro, a mu jaa u ŋga ka, a mu n u ŋga, kena kee ŋgi mu ta mu pe hin?
17 Pan Nyiɛkpɔɔ shɔnlie nyi na chɔɔ, na lewo yo na u Nyiɛkpɔɔ shɔnli, a u shɔnlie kre n na tnumu tuni kre, kena u shɔnlie kre ku.
Ŋumufuɛn Shɔnlie
18 A wa we jaa yo ki fun pan na, “Ŋuu shɔnlie ni, a mii wa na kepele chichie ni.” Mbe jaa mu nyina ni shɔnlie mbe yire ni kepele chiriri na, kena ŋu mu ni nyina mu shɔnlie ŋga nu kepele n chaa kre mbe ni le.
19 E shɔnli na Nyiɛkpɔɔ wree nunu chom, e ka pe, la, ŋumufuɛn kuraa chin na Nyiɛkpɔɔ nunu, mu na seeri u yiɛ.
Abraham Na Rahab Shɔnlie
20 Jijiele, e n chin na shɔnlie ŋga nu kepele chichie n wa kre shɔnlie waara yi ra?
21 Yira ŋgi kra tia Nyiɛkpɔɔ na yo o tolɛɛ Abraham pan na u pe lewo chiriri hin? Abraham na yire shɔnlie na mna Nyiɛkpɔɔ nyu kee loo, mna sɛ u pɔ Isaac tɛɛ mbe sra wɔ mbe Nyiɛkpɔɔ ŋga.
22 Kre imi ki nyina na Abraham na shɔnlie na ki kepele pe. Ŋga wraa shie sɛ pe kre na u shɔnlie chiriri nyina.
23 Ŋga ki tia kee kre pe nyunɔ Nyiɛkpɔɔ hlɛ kre nu mu tɛɛ kre pe kpra yi, mbo, “Abraham na Nyiɛkpɔɔ shɔnli, a u shɔnlie kre ndra na, Nyiɛkpɔɔ na u shɔ na u pe lewo chiriri, a praa u yeeri Nyiɛkpɔɔ nunu.”
24 Kena e nya na lewo kepele chiriri na u fraka Nyiɛkpɔɔ yiɛ na, la, u shɔnlie chiin na ma.
25 Pan chɔɔ Rahab tɛtiɛrɔɔ wre na nyi na. U kepele chichie na Nyiɛkpɔɔ na u shɔ na lewo chiriri wi. Wra Israel leele mblɛ pra tun yii mna pe le chiriri, mna ya pe na mna pe nyina kolo fɔŋgɔ, a pra tro ki na mna shɔ pe loŋgoolo kɛɛ.
26 Pan ki nyi, imi na, na ŋumu n wa wejiŋge nu mbe ki ku kre, pan chɔɔ na kepele chichie n wa shɔnlie nu kena shɔnlie kre ku.