2 O lɛ Nyiɛkpɔɔ wre na e chin fa, mna chin mu e wɔ, mna yire u Kpra Ŋumu wre na mu e pe u biile mblɛ e pe cheche, mbe e ndie tɛɛ Yesu Kristo wre pan, mbe u u nyimi yire tɛɛ mbe e weli.

3 E ti mbe o Nyiɛkpɔɔ, o Tafun Yesu Kristo lɛ wre ŋga mboo. Ŋgi na hin? U foorochiɛn kpɔɔ, a u yire Yesu Kristo nyiɛ ŋga u u nyi mu yili kuulo nu kre na, mu o ŋga ŋmaa fɔŋgɔ. Mu tia o dankna ŋga nu ŋmaa nyi ta.

4 Ki tia o yiɛ wa na yirɛ nyjɛ Nyiɛkpɔɔ tɛɛ u biile pan yire sri. U yire yirɛ yire tɛɛ e pan nyjeeri, na yii wa bawa yia kla, ndee mbe fɔɔn, ndee mbe lɛ.

5 E wee yi, yire mblɛ e shɔ mu li, a Nyiɛkpɔɔ yire u jaŋga na mu na e le, mbe sɛ na e ni ŋmaashɔmu nu. Kre ŋmaashɔmu ŋga, we ki wɔ mbe e nyina ble haŋa kre nu.

6 E ti mbe e yiɛshɔ kee nyjɛ ni yo ŋga na, la, aada penlee kanyana nyjɛ yi e dani fuŋgaami yire we ti mbe e yiɛ je chiɛri.

7 Yire penlee kanyana yire yi nyina na e shɔnlie yire. Imi na pe swanyiɛ leni kanhun mbe ki chin mbe nyu kre, pan chɔɔ pie yire penlee kanyana na mbe e shɔnlie ŋga ki kpɔɔ Nyiɛkpɔɔ pan mu wɛ swanyiɛ na kre pe mbe le. Na e waa ja mu frɔ mu yire kre, ŋga ble Nyiɛkpɔɔ we Yesu Kristo wɔ mbe nyina kre, ee mɛɛ, na yɛnyiŋge, na kpɔɔmu ta.

8 E u kori, nde e n da mu u nya tun. E n ta mu u nya, nde e u shɔ mu li, mu yɛnyiŋge yɛshɔɔrɔ ta, hali ndro wa jaa e yɛshɔɔrɔ kre nyini nyina ndro pan.

9 Ŋgi na hin? Yira ŋga na e yila mu shɔnlie ta, a ki pe e ŋmaashɔmu kre, e ki ta.

10 Kre ŋmaashɔmu ŋga, Nyiɛkpɔɔ kee nyanyofɛɛnlɛ na ki lawee wie, mna ki haa cha, mna dumiɛ ŋga ee ta kre kee nya mu yo.

11 Kristo wre Ŋumu wre wraa wa pe nu kre na klu mu wre Kristo wre kanyana yire, na u yɛnyiŋge ŋga kie pan u kanyana yire kro kee yo pe pan, a praa chaa mbe nyjila, na kolo ŋga na yire kee yire we yire mbe pe chin.

12 Nyiɛkpɔɔ na u kee nyanyofɛɛnlɛ pre nyina na, tnumu ŋga pe tuni kre, pre titi nyumu na ma pe ki tuni, la, yire nyumu na yi. Yire kee nyjɛ e ta mu loo fuŋgaami mu yiri ketaan kre kpralifɛɛnlɛ pan kre, pre pe yire Kpra Ŋumu ŋmba Nyiɛkpɔɔ pe ŋga mu yiri nyjeeri wre jaŋga na mu yi kpali e pan. A yire kee nyjɛ nyjeeri bitumblɔ yi chaa mbe yi nɔɔloo.

13 Kena e eyɛ kna, e ti mbe e yiɛto, mbe e ti mbe e dankna kro pe dumiɛ ŋga ee ta kre na, na Nyiɛkpɔɔ waa Yesu Kristo wɔ mu nyina kre, ee dwamu ta.

14 E li Nyiɛkpɔɔ kee na, yaa ti mbe e niŋge ti mbe e tnimu pe na nyjila ŋga e nsra chin kre yi.

15 La, e pe cheche kee ŋga e pini kro nu, imi na Nyiɛkpɔɔ ŋmba u e yeeri wre pe cheche kre.

16 Nyiɛkpɔɔ kee kre pe nyunɔ mu tɛɛ kre yo mbo, “Ki fna e pe cheche, ŋgi na hin? Ni pe cheche.”

17 Na e Nyiɛkpɔɔ tali kre, e u yeeri Ndoo, wre u ndro kro kpra kuun imi na u kepele nyi, a wra ndro yiɛ le. Kena nyjila ŋga ni ee wa tra ŋga nu ŋga, e Nyiɛkpɔɔ fiɛ e tnimu nu.

18 Ŋgi na hin? Yire titi, e yira ŋga Nyiɛkpɔɔ kla e na, a e chin mu e yɛ ta mu yili e tolɛɛlɛ kewɛɛ yire krɔ e li yire kɛɛ. Swanyiɛ, ndee swa fiŋge nyjɛ yie jaa kla yire ka ni ma Nyiɛkpɔɔ na tɛɛ mu e lɔ.

19 Yesu Kristo sra kpɔɔ ŋga wra wɔ kre na e na yire mu eyɛ ta. Wre wra pe na mbɔɔ pɔ ŋmba na tlo, ndee nɛɛrɛ ka nsraa wa.

20 Nyiɛkpɔɔ na u wɔ mna chin mu waŋgra gbeele mu yila e na mu u wɔ mu nyina ble hɛnyi nyjɛ nu.

21 Wre na ee yire mbe Nyiɛkpɔɔ shɔ mbe li. Nyiɛkpɔɔ wra u nyi mu yili kuulo nu, mu u ŋga yɛnyiŋge, mbe ki ti e yire u na, mbe e shɔnlie na e dankna kro pe Nyiɛkpɔɔ nu.

22 Ŋga e ndie tɛɛ kpra kre pan ŋga, e eyɛ pe cheche, mu yire ki na mu pan mu e ŋmbilɛ sumifɛɛnlɛ kori na kpra ni, E e ŋmbilɛ sumifɛɛnlɛ kori kpɔɔ na e lolonyi kro ni.

23 E yire Nyiɛkpɔɔ nyu kee ŋga kii wa mu tni blenyini kre na, a Nyiɛkpɔɔ e se fɔŋgɔ, na biile mblɛ lɛ wa ku wi.

24 Imi na Nyiɛkpɔɔ kee kre pe nyunɔ mu tɛɛ kre yo kre mbo,