Kristo Wi Dnɛ Ŋga Ki Le Kre
2
Kena e eyɛ wɔ e yili sisam kee kro nu, yaa na kala fnɛ, ndee mbra yiɛnyumu kee pini, ndee mbe pe keyirafɛɛnlɛ, ndee mbra leele kro yuu.
2 E pe na bifimble lɛ, e ti mbe Ŋumu kee ŋga ki pe na nyinimi nyumu yi kre klo e ta, mbe ki ti na e ki ta mu ŋgɔɔri kre, mbe e lɛ mbe ŋmaa ta.
3 Imi na Nyiɛkpɔɔ kee kre pe nyunɔ mu tɛɛ kre yo kre mbo, “E pan mu nya na o Tafun wre lɛɛ tna.”
4 E pan o Tafun wre jaara, wre wi dnɛ ŋga nu ŋmaa nyi, a leele ki je, na ki le yira waa, la, Nyiɛkpɔɔ ki wɔ na ki kee tnu ni.
5 Kena e pe na dnɛ nyjɛ nu ŋmaa nyi yi, e ti mbe pe e tɛɛ mbe Ŋumu wre nyuŋgo sin, mbe e yire Yesu Kristo wre na mbe pe Srawɔfɛɛnlɛ mblɛ pe pe cheche, mbe tnumu tun suminyuŋgo kre nu, mbe sra ŋga ki pe Ŋumu wre wo, mu tna Nyiɛkpɔɔ pan wɔ.
6 Ŋgi na hin? Nyiɛkpɔɔ kee kre pe nyunɔ mu tɛɛ kre yo mbo,
“Mi Nyiɛkpɔɔ ni dnɛ teeri Zion na.
Mi ni ki wɔ a ki pe dnɛ ŋga kee ki pe tnu ni,
a ŋmba we u shɔ mbe li kre,
wa ti mbe nyifɛɛrɛ u gbo.”a
7 Kre dnɛ ŋga, ki tnu kpɔɔ mu yire mblɛ e shɔ mu li pre ŋga, la, mblɛ pe n shɔ mu li pre,
“Kre dnɛ ŋga nyuŋgo sinfɛɛnlɛ pre na je kre,
kre ki kɔ mu pe nyuŋgo kre ndra dnɛ.”b
8 A Nyiɛkpɔɔ kee ŋga pe nyunɔ mu tɛɛ kre yo lawee fɔŋgɔ ka nu na mbo,
“Kre dnɛ ŋga kie ti mbe leele gbro,
a kre kie ti mbe pe to.”c
Pra gbro, ŋgi na hin? Pe nsra kee kre shɔ mu li, a pan Nyiɛkpɔɔ naa chaa mbe pe pe.
9 La, yire lɛ leele mblɛ Nyiɛkpɔɔ wɔ, a e pe lebiile, mu pe srawɔfɛɛnlɛ, mu pe leele mblɛ e pe cheche, mu pan mu pe u leele. A wre u e wɔ mbe e paan u kawako kee nyjɛ u pe yire kee kpali. Wre u e yeeri mu yili wɔmu nu, mu pan na e ni u kawako nyisee kre nu.
10 Nyjila ka nu na Nyiɛkpɔɔ leele ma yire, la, fuŋgaami ŋga Nyiɛkpɔɔ leele lɛ yire. Nyjila ka nu na e n Nyiɛkpɔɔ foorochiɛn kre chin, la, fuŋga rɛ u e fooro chin.
Nyiɛkpɔɔ Tinlɛ
11 Ni wolo, ni e tali, ŋga e sɛ pe fumblɔ mblɛ ee wa mu tni waŋgra ŋga nu nyjila chiɛri ŋga, yaa eyɛ wru mbe wejiniŋge yirɛ ŋga, yire yi e toni kolo e ŋmaa lawee nyjila kro nu.
12 E ti mbe e kepele nyu leele mblɛ pe n Nyiɛkpɔɔ chin pre nu, kena na pe yuu na sisaapefɛɛnlɛ lɛ yire kuraa kre, pie kɔɔ e kee chiriri nyjɛ e pini yire nya, mbe yire yi na, na Nyiɛkpɔɔ wre waa pan, mbe pe u ŋga mɛɛ.
13 O Tafun wre saara na, e eyɛ nyjii e jaŋgafun kro ŋga, e eyɛ nyjii e waŋgra kro ŋunu wre ŋga,
14 wre na u loplombo mblɛ u tuni pra sisampefɛɛnlɛ ndie tini, na chichie pefɛɛnlɛ kaan mɛɛ kre kro.
15 Ŋga Nyiɛkpɔɔ chaa e pe yi na, ee kee chichie nyjɛ e pini tɛɛ mbe mblɛ pe n yaka chin, mu na jijiere paaraa paara kre kee tɔ kolo.
16 E ti mbe ndro kro e tnimu nya na e eyɛ ta, yaa e yɛtaara kre wru mbra e sisam toni, la, e tni na Nyiɛkpɔɔ tinlɛ lɛ.
17 E na ndro kro kaan buuro, e e wolo shɔnlifɛɛnlɛ pre kori, e na Nyiɛkpɔɔ fiɛ, e na waŋgra kro ŋunu wre kaan buuro.
Kristo Kanyana Ka
18 Sumifɛɛnlɛ, e eyɛ nyjii e e tafɛɛnlɛ ŋga, mbra pe kaan buuro ŋga ki fna, ki n pe leele mblɛ pe nyjii, a pe lɛɛ tna na e ni kre chiin ki fna e na kaan buuro, la, mblɛ pe e pini nyanya kre kro, e pe ŋga buuro.
19 Na ndro yila Nyiɛkpɔɔ na mu frɔ mu kanyana ŋga ki n fna na u ni nya kre, Nyiɛkpɔɔ we u dwan.
20 Na mu sisaa pe, a mu frɔ mu tia pe mu gbun gbɔɔn ŋga ki n fna na mu ni, mɛɛ ŋgi kii wa ki nu hin? La, na mu kee ŋga ki fraka pe, a mu frɔ mu kala nya ki tlo, Nyiɛkpɔɔ we mu dwan ki na.
21 Kre na Nyiɛkpɔɔ na e yeeri, ŋgi na hin? Kristo wre titi na kala nya e tlo, mbe e u le mbe tuan, mbe taa u dumble na.
22 “U nsra sisaa ka pe, a ndro nsra kafinɛ kee ka loo mu yili u nyuu.”d
23 Pra kefuɛn yo u na, nde u nsra nyu nyaa mu ndro tɛɛ. Wra kala nya, nde u nsra ndro piɛri na kee ka ni, la, Nyiɛkpɔɔ ŋmba u leele kpra kuun kpra kolo na wre, wre nu u dankna kro na nyi.
24 Kristo wre titi wra o sisam tio na u wejiŋge ni mna sɛ kanyana kumu kaan kre na, mbe ki ti mbe o o sisam ti, mbe ŋga ki fraka pe. E yire u klɛɛ tlo yire na mu saanla yira kɛɛ.
25 Pan e na nyi na mbaala mblɛ pe fun pe kolo na lɛ, la, fuŋga pe e kna mu pan mu taa mbaala lefun ŋmba u e le wre kro.