Chiɛlɛ Leŋgefɛɛnlɛ Na Pe Pilɛ
3
Pan chɔɔ ki fna mbe chiɛlɛ leŋgefɛɛnlɛ peyɛ nyjii mbe pe pilɛ ŋga, mbe ki ti na bilɛ pre plɛɛ wa a pe n Nyiɛkpɔɔ kee shɔ mu li kre, mbe pe jaa yire pe chiɛlɛ kepele na mbe kee kre shɔ mbe li, ki n pe mbe yire kee ŋga mu yo na.
2 Ŋgi na hin? Pie nya na e kepele pe cheche, a ee buuro ni.
3 Yaa ti mbe imi e e ndrɛ nyjure gbeele, na yirɛ nyjɛ e teeri na eyɛ sani, na dodonyi nyjɛ e leni yire e gbeele fimi na.
4 La, e ti mbe pe e nyumu nya e lolonyi nu, e nyumu ŋga pie nya kre e nyjiimu, na imi e pe brɛmm, kre nyumu kre ki nyu Nyiɛkpɔɔ yiɛ na, a kia jaa kla fio.
5 Pan fa chiɛlɛ mblɛ pra pe cheche, mnaa kaan Nyiɛkpɔɔ na pre kepele na nyu, ŋga praa peyɛ nyjiri na pe pilɛ kaan kre na.
6 Pan Sarah na nyi. Wra li Abraham kee na, mnaa u yeeri, “Ni tafun.” Fuŋgaami na e chichie pini, a e n na fiɛ wala, kena Sarah bichiɛlɛ lɛ yire.
7 A yire bilɛ leŋgefɛɛnlɛ chɔɔ, ŋga yire na e chiɛlɛɛ wa mu tni ŋga, ki fna e pe le mbe chin na pe n faŋga ni. Kena ki fna e pe ŋga buuro, ŋgi na hin? Yire na pre kro ee chaa mbe Nyiɛkpɔɔ ŋmaa ŋga we o ŋga kre ta. E na pe pini ma mbe kee ka wa e nyiɛtalaa tɔ kolo.
Chichie Pee Kanyana
8 Ni kee yire haŋa yi na, e kro fna mbe jawala nunu ta, mbe eyɛ kanyana chin, mbe eyɛ kori na ndro na u chunu wi. Mbe e eyɛ nyjii, mbe e lɛɛ tna na eyɛ ni.
9 Yaa sisaa tɛɛ mbe sisaa fɔlɔ tɔ, ndee mbra eyɛ suni, la, e na dwan e na eyɛ kaan. Ŋgi na hin? Ŋga Nyiɛkpɔɔ na e yeeri kre, dwamu wra yo we e ŋga.
10 Imi na Nyiɛkpɔɔ kee kre pe nyunɔ mu tɛɛ kre yo kre mbo,
“Ŋmba u chaa mbe ŋmaa li,
mbe ble tɛɛn nya kre,
u fun u u nyu wɔ mbe yili sisam kee yoo nu,
mbe kafinɛ kee yoo ti.
11 U uyɛ wɔ u yili sisam nu,
mbra chichie pini.
U wejinyiŋge haa cha,
mbe ti u yiɛ nyina ki na.
12 Ŋgi na hin? O Tafun yiɛ wa mblɛ pe fraka pre na,
a nyjila kro nu, u pe nyiɛtalaa ndru.
La, mblɛ pe sisaa pini pre,
u yiɛ woni pe na.”a
13 Na mu yiɛ nyina chichie pee na, ŋmbi we mu pe sisaa hin?
14 La, na mu kala nyaa chichie pee saara na kre, Nyiɛkpɔɔ we mu dwan. Yaa lewo fiɛ, a yaa ti mbe e gbun yɔ e na.
15 La, e Kristo chin e lolonyi nu na e Tafun wi. Nyjila kro nu, e eyɛ kna na ee ŋmba we e wie dankna ŋga nu e nyi kre kee kpan, mbe e jaa ki nyu wɔ.
16 La, e na paara, nyjiimu na buuro ni. E na kee ŋga ki fraka pini, kena mblɛ pe e tɛɛlɛ, na kee nyjɛ yi n fna yuu na taari e na kre, mbe nyifɛɛrɛ pe gbo e kepele chiriri nyjɛ e pini Kristo nu yire na.
17 Ŋgi na hin? Na chaa Nyiɛkpɔɔ chaa mbe e kala nya chichie pee nu kre, ki nyu mu wɛ ŋga mu kala nya sisaa pee na.
18 Ŋgi na hin? Kristo wre titi na ku e sisam ndra na gbee nunu, lewo ŋmba u fraka u ku mu leele mblɛ pe n fraka ŋga, mbe yire ki na mbe sɛ na e ni Nyiɛkpɔɔ jaara. Pra u gbo, la, Nyiɛkpɔɔ ŋumu na u nyi.
19 A wra yire ŋumu wre na mna sɛ paara mna ŋumu mblɛ pra yii mu le nyuŋgo kre nyina.
20 Leele mblɛ pe nsra li Nyiɛkpɔɔ kee na Noah nyjila pre ŋumu yiraa wa wa. Nyiɛkpɔɔ na frɔ pe na nyjila ŋga ni Noah naa krɔ kre gbeele kre, la, leele chiɛri plɛ, praa leele kɔɔnatarɛ, pre pra le krɔ kre nu, a Nyiɛkpɔɔ na pe shɔ mu yili nyumu kre nu.
21 Kre kolo ŋga, pan ki nyi imi na pe o ndrɛ jee ŋga yi. Pe o ndrɛ jee mbe ki nyina na Nyiɛkpɔɔ o shɔ mu yili kumu nu. O wejinyi nɛɛrɛ ma pe jee na laari o na, la, jawala chichie o teeri na Nyiɛkpɔɔ tali, mu yire Yesu Kristo kunnyiɛ kre na.
22 Wre u sɛ tni nyjeeri Nyiɛkpɔɔ kalie, na ŋunumu lii nyjeeri bitumblɔ kro na, pre na jaŋgafɛɛnlɛ, na faŋgafɛɛnlɛ mblɛ pee wa nyjeeri wa kro ni.