Tnimu Ŋga Ki Chinɛ
4
Ŋga Kristo na kala nya u wejiŋge nu kre ndra na, e eyɛ kna, e jawa na pan ee kala nya. Ŋgi na hin? Lewo ŋmba we kala nya kre kolo ŋga na kre, wa uyɛ le sisam nu na.
2 Kena mu yire fuŋgaami na shie kre, e tnimu nu tra mna kre, e tni Nyiɛkpɔɔ chaara nu, mbe yaa taa lewo niŋge yirɛ na na.
3 E na nyjila kla tataara, mna kee nyjɛ leele mblɛ pe n Nyiɛkpɔɔ chin chaa yire pe. E tnimu nu, kee nyjɛ e naa pini na yi, chachaara, na niŋge sisaa, na simi gbɔɔrɔ, na pnaa fuɛn, na ble yɛ woni na fni na simi gboo, na sɛɛn sumiɛ ni.
4 A fuŋgaami, ki leele mblɛ pe n Nyiɛkpɔɔ chin pre pe kawako na yire na pre n chaa na yire kefuɛn nyjɛ pini na, a ki tia pra e tɛɛlɛ.
5 La, pie sɛ pe kee nyu wɔ Nyiɛkpɔɔ ŋmba u uyɛ kna mbe gboolo, na mblɛ pe le kro kala li wre yiɛ.
6 Kre ki tia Yesu na sɛ ketaan kre kpali gboolo pan kre, la, ŋga praa wa na le kre, pimi ŋga lewo kro na li kre, pra ka li na, a kra tia pra ku, la, mbe pe yire ketaan kre loo na, mbe tni ŋumu nu imi na Nyiɛkpɔɔ chaa.
Yirɛ Kro Kla Nyjila Da
7 Yirɛ kro nyukɔɔrɔ dani. Kena e jawala ta, e eyɛ kna, e na nyiɛtali.
8 E eyɛ kori kpɔɔ, koroo ki wɛ kee kro na, ŋgi na hin? Koroo sisam tataara toni.
9 Na wa le u ŋmbrɔ pan fuŋu, u u le chichie, yaa na taanri.
10 Kpra Ŋumu wre kɛyira ŋga wa ta kpan, u ki tɛɛ mbe u ŋmbilɛ sumi, mbe pe nyina Nyiɛkpɔɔ dumiɛ kpɔɔ kre.
11 Na wa we kee kpali kre, u Nyiɛkpɔɔ kee kpali, na wa we sumi kre, u u faŋga ŋga Nyiɛkpɔɔ u ŋga kre tɛɛ mbe u sumi, mbe ki yire ki na mbe leele yire Yesu Kristo na mbe Nyiɛkpɔɔ ŋga mboo kee kro na. Wre wo yi yɛnyiŋge, na faŋga nyjila kro nu. Ami.
Kanyana Ŋga Kii Wa Kristo Sumiɛ Nu
12 Ni wolo mblɛ ni kori, yaa ti mbe ki e pe kawako na e kanyana penlee nyaa, yaa jawa na kee fɔŋgɔ ka ki e dani.
13 La, e ti mbe e yiɛshɔ na e Yesu kanyana yire yɛ nyaa, kena na Nyiɛkpɔɔ waa u yɛnyiŋge kre wɔ mu nyina kre, mbe e yɛshɔɔrɔ kpɔɔ ta.
14 Na pe yila Kristo na mu na e tɛɛlɛ kre, e wo yi dwamu. Na ki pan ma kena e chin na Nyiɛkpɔɔ Ŋumu wre, yɛnyiŋge Ŋumu wree wa e nu.
15 Na e wa kala nyaa kre, waa shia ti mbe ki yire linkuuro, ndee juuro, ndee kefɔɔn, ndee leele kee yoo na.
16 La, na mu pe Kristo ndro, a ki yire ki na mna kala nyaa kre, maa shia ti ki mu pe nyifɛɛrɛ ni, la, Nyiɛkpɔɔ ŋga mboo na Kristo mɛɛ taa mu na.
17 Nyiɛkpɔɔ kpra kun nyjila kre da, a Nyiɛkpɔɔ wre titi leele nu we klu mbe yire. Na Nyiɛkpɔɔ kprakuɔn kre we klu yire wre na, kena mblɛ pe n ketaan ŋga ki yiri wre Nyiɛkpɔɔ pan kre shɔ mu li kre, mni pre we taa hin?
18 Imi na Nyiɛkpɔɔ kee kre pe nyunɔ mu tɛɛ kre yo kre mbo,
“Na ki sheli mu leele mblɛ pe fraka ŋga,
na pie shɔ ndie tiniɛ kɛɛ kre,
kena sisampefɛɛnlɛ mblɛ pe n Nyiɛkpɔɔ chin pre,
mni pre waa taa hin?”a
19 Kena leele mblɛ pe kala nyaa, a ki pe Nyiɛkpɔɔ chaara kre, pra ŋga ki nyu pini, mbe pe yɛ wru mbe le pe gbeelefun kprafun wre kɛɛ.