Loplombo Tnumu
5
Yire sumifɛɛnlɛ pre loplombo pre, ni yuu e pan na mi chɔɔ, sumifɛɛnlɛ lopom wi mi na. Kristo kanyana kre dansiɛlifun wi mi, a yɛnyiŋge ŋga Nyiɛkpɔɔ we wɔ mbe nyina kre, mbe ki ka ta. Ni e tali na,
2 e Nyiɛkpɔɔ mbaala pre u le e kɛɛ pre le chichie. E lɛɛ wɔ e pe le imi na Nyiɛkpɔɔ chaa, ki n pe mbe pe yire e na pɔɔrɔ na tun. Yaa na tnumu ŋga Nyiɛkpɔɔ le e kɛɛ kre tuni mbra swa le, la, e ki tun na lɛɛ nunu ni.
3 Yaa na ŋunumu lii leele mblɛ pe le e kɛɛ pre na, la, e pe leele mblɛ pie jaa le mbe tuan.
4 Na mbaala lefun lopom wre waa pan kre, we e ŋga yɛnyiŋge ŋga kia jaa kla.
5 Pan chɔɔ yire yirifumblɔ fna mbe eyɛ nyjii mbe loplombo ŋga. E eyɛ nyjii e eyɛ ŋga. Ŋgi na hin? Nyiɛkpɔɔ kee kre pe nyunɔ mu tɛɛ kre yo mbo,
“Nyiɛkpɔɔ n na ndro ŋmba u uyɛ kpɔɔri kee chaa,
la, u mblɛ pe peyɛ nyjiri pre kaan dumiɛ.”a
6 Kena e eyɛ nyjii Nyiɛkpɔɔ jaŋga kre jaara, mbe wre titi e yire nyjeeri nyjila ŋga ki fna nu.
7 E e keshian kro wa u na, ŋgi na hin? Wre u e jawa.
8 E ti mbe e yiɛ to, mbe e na sri. E loŋgo Sutna wre, u kila na tro na blɛkpɔɔ wi, na wa chaa mbe ka.
9 E yire e shɔnlie nu gbiŋmbi, e u tɔ kolo. Ŋgi na hin? E chin na e wolo sumifɛɛnlɛ mblɛ pee wa waŋgra ŋga nu kro, pan pe kala nyaa.
10 La, na e kala nya nyjila chiɛri nu kre, Nyiɛkpɔɔ ŋmba u dumiɛ kro kaan kre, wre u e yeeri na e paan yire Yesu Kristo na, mbe u blenyini yɛnyiŋge kre ka ta. Wre we e gbeele chiriri, mbe ti e yire gbiŋmbi, mbe e ŋga faŋga, mbe e yire haa ta.
11 Wre wo yi faŋga nyjila kro nu. Ami.
Shaaraa Haŋa
12 O ŋmbrɔ Silas kprafun wre u ya ni na a ni hlɛ chiɛri ŋga nyunɔ na paan mbe e ŋga. Ni chaa mbe e le gbeŋmbaa, mbe e nyina na kre kolo ŋga, Nyiɛkpɔɔ kpra dumiɛ kolo yi. Kena e yire ki nu gbiŋmbi.
13 Sumifɛɛnlɛ mblɛ pee wa Babylon na, a Nyiɛkpɔɔ pe wɔ pre, pe e shaari. Pan chɔɔ ni pɔ Mark e shaari na.
14 E eyɛ shaari na Kristo koroo ni.
Yire mblɛ e pe Kristo wolo kre, e tni wejinyiŋge nu kro.