2 Ŋga e Nyiɛkpɔɔ, na o Tafun Yesu Kristo wre chini na yaa ŋga, Nyiɛkpɔɔ u e ŋga dumiɛ na wejinyiŋge tataara.

3 Nyiɛkpɔɔ faŋga ŋga ki kpɔɔ kre, ki o ŋga yirɛ nyjɛ o shian kro, mbe ki ti o jaa yire u chiɛn ŋga o u chin kre na, mbe tni mbe sumi imi na ki fna. Wre u o yeeri mbe o paan wre titi yɛnyiŋge, na u chichie kre ka ta.

4 U yire kre kee ŋga na mu o ŋga dwamu kpɔɔ, ŋga nyu wra yo kre, mbe o yire ki na mbe shɔ niŋge sisaa, ŋga ki lewo klai waŋgra ŋga nu kre kɛɛ, mbe paan wre Nyiɛkpɔɔ kepele wru.

5 Kre kee ŋga ndra na, e gbeŋmba kolo kro na, e ti mbe kepele chichie ya e shɔnlie na. E ti mbe Nyiɛkpɔɔ chiɛn ya e chichie pee na.

6 E Nyiɛkpɔɔ chiɛn nu kre, e eyɛ yii e niŋge na. A eyɛ yie nu kre, e frɔ ta. E frɔ nu kre, e na ŋga Nyiɛkpɔɔ chaa pini.

7 Na e ŋga Nyiɛkpɔɔ chaa pini kre, mbe e e wolo sumifɛɛnlɛ pre kori. Na e pre kori kre, mbe e ndro kro kori mbe ya.

8 Yire kepele nyjɛ, e yi shian. Na e yi taa na yaa kre, yie ti mbe e jaa ŋga ki fna pe, mbe sɛŋgɛ sɛ o Tafun Yesu Kristo chiɛn kre saara na.

9 La, ŋmba u n yire kepele nyjɛ ta kre, u n na nyaa lee, u fun nyiɛlɛ na, mu fɛɛ na u sisam nyjɛ wra pe fa kre, pe yi je mu laa u na.

10 Kena ni wolo, e gbeŋmba e ti mbe pe e nya yeeree ŋga Nyiɛkpɔɔ e wɔ, mu e yeeri kre nu. Na e pe ma, e shɔnlie wa to.

11 Kre kolo kre na ee yire, mbe kolo ta chiriri mbe le o Tafun, na o ŋmaashɔfun Yesu Kristo blenyini ŋunumu kre nu.

12 Kre ndra na, nyjila kro nu, pan mbe na e sɔɔnri yire kee nyjɛ. Kee yire, e yi chin fa, a ee wa mu yire Kpra ŋga e ta kre nu.

13 Ni jawa na ŋga nii wa ŋmaa ni tɛ ŋga, ki fna ndaa kanhun leni e nu, mbra e sɔɔnri yire kee nyjɛ.

14 Ŋgi na hin? O Tafun Yesu Kristo ni nyina na, ni ble kro chiɛri, mba mu mbe ku.

15 Kena mbe gbeŋmba, baŋga na ni ku kuraa, mbe e jaa yire kee nyjɛ sɔɔnri.

16 Mbuura kee yire na ma o yire mu e nyina Yesu Kristo faŋga, na u paan kee kre. O na u jaŋga ŋga kii wa u nu kre nya na nyini ni.

17 Nyjila ŋga ni o Lɛ Nyiɛkpɔɔ wre naa u kaan kpɔɔmu, na yɛnyiŋge kre, na oo wa wa. Ŋga mana kre na yili Yɛnyiŋge kpɔɔfun wre pan mbo, “Ŋmba wi ni Biblɔ ŋmba ni kori, a ni yiɛshɔ u na kre,” na oo wa mu yire wa.

18 Wre na wre kro o naa wa mu yire nyua cheche kre na, a o na mana kre loo, mna chin na nyjeeri ki yiri.

19 A ki tia o Nyiɛkpɔɔ kee nyanyofɛɛnlɛ pre kee yire pra yo yire le na, yi pe kpra. Na e ndie tɛɛ kee yire na, ee kee chiriri pe, ŋgi na hin? Pan kee yire nyi na kania ki nyini wɔmu lawee, mbe sɛ su na ndram we ndru mbe saan, mbe bnimi nyu wɔlɔ ŋga ki nyaa kre nya e lolonyi nu.

20 Ŋga ki yiɛklu yi na, e sɔɔnri na, ndro wa jaa u jawala tɛɛ, mbe Nyiɛkpɔɔ kee nyanyofɛɛnlɛ pre kee yire pe nyunɔ mu tɛɛ yire, ka nɔɔ nyina.

21 Ŋgi na hin? Nyiɛkpɔɔ kee nyanyofɛɛnlɛ pre kee yire ka n wa, mu yiri lewo jawala nu, la, Kpra Ŋumu wre u yire leele na, mu tia pe kee nyjɛ yi yiri Nyiɛkpɔɔ pan nya mu yo.