Kafinɛ Kee Nyinafɛɛnlɛ
2
Kafinɛ Nyiɛkpɔɔ kee nyanyofɛɛnlɛ naa wa fawolo pre nu. Pan chɔɔ kafinɛ kee nyinafɛɛnlɛ yiri e nu. Pie kala fnɛ mbe leele nyina kee nyjɛ yi n fna, mbe pe yiri mbe pe Tafun ŋmba u pe lɔ wre je, mbe yire ki na mbe sɛ fun.
2 Lenɛɛrɛ we taa pe sisam kee yire na, a pe kee nyjɛ pie na pini yire we ti mbe lenɛɛrɛ paara, mbe kpra kolo kre taan.
3 Pie yire pe jajaara na, mbe kee tataara fnɛ, mbe yire yi na mbe tnu ta tataara. Pe kpra kunfun uyɛ kna mu tni fuŋga ma, a ŋmba we pe ndie tini wree wa mu tni na pe sri, wraa sni.
4 Nyjeeri bitumblɔ mblɛ pra sisaa pe kre, Nyiɛkpɔɔ nsra pe ti. Wra pe wa lawee ŋga nu pe kuulo ndie tinii kre nu, a bawa pe nyi wɔmu nu, a u jlɔnyi le pe na, pra Nyiɛkpɔɔ kpra kun ble kre sri.
5 Leele mblɛ praa wa waŋgra nu fa, a pe nsra Nyiɛkpɔɔ shɔ mu li pre, u nsra pe ti, wra tia nyumu na pan mu pe li peii. Leele mblɛ wra shɔ na lɛ Noah, na u leele kɔɔnashin pre, a Noah wra ketaan kre kpali.
6 Nyiɛkpɔɔ na Sodom, na Gomorrah leele gbun pimi ni, mna kanhun tɛɛ mu pe kla, mbe leele pe nya, mbe chin na leele mblɛ pe n na lii Nyiɛkpɔɔ kee na pre, na pan we pe pe.
7 Wra Lot shɔ. Lot na pe lewo ŋmba u fraka, a sisampefɛɛnlɛ pre na pe sisam kee tɛɛ mna u tɔɔra.
8 Wre blɔ ŋmba wra pe lewo chichuo, a wre na leele pre na chaa mu tni. Nyjila kro nu wraa pe sisam kee yire nyaa, na yi ndru, a pe sisam kepele yire na u shian mu tro.
9 A na Nyiɛkpɔɔ chin kolo ŋga na we tro, mbe u leele pre shɔ mbe yili penlee nu, mna chin kolo ŋga na we tro mbe sisaapefun ndie tini mbe sɛ su u kpra kun ble kre nu.
10 Leele mblɛ pe taa pre titi nɛɛrɛ kee, na wejiniŋge sisaa kee na, mu Nyiɛkpɔɔ jaŋga le kewaa pre na u nyi.
Kafinɛ kee nyinafɛɛnlɛ pre, pee gbun ni, a pe kee ka ma na ŋga kie pan ni. Pe n na fiɛ na pie yɛnyiŋgefɛɛnlɛ mblɛ pee wa nyjeeri wa pre tɛɛlɛ.
11 Nyjeeri bitumblɔ mblɛ faŋga ki kpɔɔ mu wɛ pre kafinɛ kee nyinafɛɛnlɛ pre na kuraa, pra pe gbun pimi ni o Tafun wre yiɛ na.
12 La, pre leele mblɛ jijiele lɛ. Pan pe nyi na nyaalam yurɛ mblɛ pe se, mbe pe pe yii mbe gbo lɛ. Leele mblɛ nɔɔ pe n na ndru, pre na pe kefuɛn yuu. Pie pe kla na nyaalam yurɛ lɛ.
13 Kanyana nyjɛ pe tia leele na nyaa kre, yire kanyana yire ni pie tɛɛ mbe pe fɔlɔ tɔ. Ŋga ki pe yiɛshio yi wejiniŋge sisam kee nyjɛ pe pini lafo na. Na yire na pre chaa na lii kre, pe niŋge sisam kee yire na pe jawala nyi, a pan pe nyi e nu na nɛɛrɛɛ wa mbɔfiŋge na.
14 Na mu pe nyiɛlɛ nya to, mu chin na tiɛrifɛɛnlɛ lɛ, nyjila kro nu sisam pe pini, na mblɛ pe n ta mu yire pre fana. Pe jajaara kpɔɔ mu tro, ki tia Nyiɛkpɔɔ pe sun.
15 Pe fun kpra kolo kre na, kolo ŋga Beor pɔ Balaam na wru kre, kre pe wru. Wre wra yila swa ŋga we ta na mna sisaa pe,
16 a wra u sisam kre yɛgbɔɔnrɔ ta. U Bubnɔ na paara u pan na ndro wi, mna u tɔ kee nyjɛ wraa shie mbe sɛ pe yire kolo.
17 Pre leele mblɛ pan pe nyi na bloe nyjɛ nu nyumu n wa yi, ndee na tloe nyjɛ fuflɛ gbuun na shie yi. Nyiɛkpɔɔ lawee cha mu tɛɛ pe pan wɔmu lawee jijuom kre nu.
18 Nyu kpɔɔmu, na jijiere kee pe yuu. Pe yire pe niŋge sisaa kee yire na, na leele mblɛ pe chaa mbe peyɛ kun sisampefɛɛnlɛ na pre fana.
19 Pe nyu yuu pe pan na, pie ti pe peyɛ ta, a pre titi pre tinlɛ lɛ, pe sisam nyjɛ na pie pe kla yire tinlɛ lɛ. Yira ŋga kɛɛ lewo we uyɛ wru mbe le kro, ki tnu wi.
20 Na lewo ja mu yire o Tafun, na o ŋmaashɔfun Yesu Kristo wre chiɛn na, mu uyɛ shɔ mu yili waŋgra kefuɛn nu, maa ndru mu sɛ uyɛ le yi nu na kre, kre ndro wre sisam weni u jle na.
21 Na kre leele pre nsra kofrakaa kre chin kuraa kre, kaa kre prɔ ŋga pe pan mu ki chin, mu ndru mu krɔ kna mu wa, mbra cheche nyjɛ pe pe ŋga yire na.
22 Pe kepele yire tia yomini ŋga pe gbuun kre pe kpra mbo, “Nyukuan ndru mu sɛ na u tuuroe lala. A prako ŋmba pe weli ndru mu sɛ gbila u frɛrɛ nu.”