O Tafun Wre Paan
3
Ni wolo mblɛ ni kori, ni hlɛ shiin wo ŋga ni e nyunɔi yi kre. Hlɛ yire kro shiin nu, ni paara mu e jawala sɔɔnri yire kee nyjɛ ni paan mbe yo ŋga na.
2 Kee nyjɛ Nyiɛkpɔɔ kee nyanyofɛɛnlɛ pre na yo fa yire, ni chaa mbe e yi sɔɔnri, mbe o Tafun, na o ŋmaashɔfun wre mbra nyjɛ bitumblɔ pre na e nyina yire sɔɔnri na.
3 Ŋga ki yiɛklu yi na, ki fna e klu mbe chin na ble hɛnyi yire nu, leele plɛ we yiri, pe tnimu nu kro, pre titi niŋge kolo na pie taa. Pie na e pini mbra tɛɛ,
4 mbra yuu na, “Wra u nyu yo na we ndruu pan, pan ma wra yo kree, a sena u nyi hin? O tolɛɛlɛ ku ku fuŋga ma, a imi na yirɛ nyi, pan yi nyi mu yire nyjila ŋga nu Nyiɛkpɔɔ tra wa.”
5 La pe fɛɛ na Nyiɛkpɔɔ wra paara, mna yire u nyu kee na mna nyjeeri na tra wa. Nyumu nu wra tra wɔ mu yili.
6 A nyumu ni Nyiɛkpɔɔ na tɛɛ mna fa waŋgra kre kla.
7 Nyiɛkpɔɔ nyu kee nunu kre ni chɔɔ, u tɛɛ mu nyjeeri na tra ŋga yii mu tɛɛ, mbe sɛ su na we yi kla na kanhun ni. U yi yii mu tɛɛ mbe sɛ su na we leele mblɛ pe n li u kee na pre kpra kun, mbe pe kla.
8 Ni wolo mblɛ ni kori, kee nunu kaa wa, yaa shia kre fɛɛ. O Tafun wre, ble nunu pe u pan na yɛlɛ kagbeŋge yi, a yɛlɛ kagbeŋge pe u pan na ble nunu yi.
9 O Tafun wre nyu ŋga u yo kre, u n nyjii ki pee na, imi na plɛ jawa kre. La, frɔ u frɔ e na. Ŋgi na hin? U n na chaa mbe leele kla, la, u chaa mbe ndro kro laa u sisam kro.
10 La, o Tafun wre pan ble kre, we pan mbe o fo na juo wi. Kre ble kre, bibɛɛ kpɔɔ we yili nyjeeri, mbe nyjeeri fun. Yirɛ nyjɛ yii wa nyjeeri wa kro we shɔ mbe kla peii, mbe tra na yirɛ nyjɛ yii wa ki na kro nya mbe kla.
11 Kena ŋga yire yirɛ nyjɛ kro we kla, kre kolo ŋga na ŋga, leele mblɛ sembremu ki fna mbe e eyɛ pe hin? Ki fna e tnimu nu, mbe e pe cheche, mbe eyɛ wru mbe Nyiɛkpɔɔ ŋga,
12 mbe tni mbra ble kre sri, mbra chaa mbe u pan yaari. Kre ble kre, nyjeeri we shɔ mbe kla, mbe yirɛ nyjɛ yii wa wa kro nya mbe kla.
13 La, oo wa na Nyiɛkpɔɔ nyu ŋga u yo mu wru nyjeeri fɔŋgɔ, na tra fɔŋgɔ ŋga na leele mblɛ pe fraka chiin we tni kre sri.
14 Kena ni wolo mblɛ ni kori, ŋga ee wa na kre ble ŋga sri ŋga, e gbeŋmba na ee pe cheche, mbe nɛɛrɛ ka wa pe e na Nyiɛkpɔɔ yiɛ, mbe yire na wre sɛ tni wejinyiŋge nu.
15 E o Tafun wre frɔ ŋga u ta e na le, e chin na chaa u chaa mbe e ŋmaashɔ, imi na o nyjɔ Paul ŋmba o kori wre na yire kachindɛ ŋga Nyiɛkpɔɔ na u ŋga na, mna hlɛ nyunɔ mu pan mu e ŋga kre.
16 Na Paul chaa mbe yire kee nyjɛ hlɛ nyunɔ kre, yire kee nyjɛ chɔɔ wraa yuu. U hlɛ yire kee yɛ naa wa, a yi nɔɔloo na sheli, kra tia leele mblɛ pe nsra yaka chin pre, na mblɛ pe nsra yire gbiŋmbi pre naa yi kna, na yi nɔɔ nyina imi na yi n fna. Pan chɔɔ praa Nyiɛkpɔɔ kee yire pra nyunɔ mu tɛɛ yire kna kolo fɔŋgɔ na, na ndie tiniɛ chaa na peyɛ kaan.
17 La, yire ni wolo mblɛ ni kori, e yire kee nyjɛ chin, e eyɛ dɔɔta, mbe sisaapefɛɛnlɛ pre waashia yire pe kafinɛ kee yire na, mbaa e waa fun, mbe e waa yire, e yire haa kre nu mbe to.
18 La, e na lee e dumiɛ, na o Tafun, na o ŋmaashɔfun Yesu Kristo wre chiɛn nu. Wre wo yi yɛnyiŋge fuŋgaami, mu sɛ su nyjila kro nu. Ami.