John Hlɛ Jle
Ŋmaa Kee
1
Kee ŋga nu ŋmaa nyi kre kee o nyunɔi na e kaan. Kre kee ŋga naa wa, a pra chin mna yirɛ kro gbeele. O na kee kre loo, mu ki nya na nyini ni, mu ki yii na kɛ ni.
2 Ŋga pra kre ŋmaa ŋga wɔ mu o nyina kre, o na ki nya. Kre ki tia o na ki kee yuu na e nyina, kre blenyini ŋmaa ŋga na o Lɛ Nyiɛkpɔɔ wre praa wa, a u ki wɔ mu o nyina.
3 Ŋga o na nya, na ŋga o loo, kre kee o yuu e pan kre, mbe ki ti mbe wre na yire pe nunu, mbe o kro nyu nunu ŋga kii wa wre na o Lɛ Nyiɛkpɔɔ wre, na u Biblɔ Yesu Kristo pan kre ta.
4 O yire kee nyjɛ nyunɔi, imi kie pe mbe o kro yɛshɔɔrɔ ta kpɔɔ.
Nyiɛkpɔɔ Pe Nyisee
5 Ketaan ŋga o loo mu yiri u pan, na ki yuu e pan yi na, Nyiɛkpɔɔ pe nyisee, a wɔmu ka n wa u nu.
6 Kena na o yo na o pe nunu na u ni kre, mu je na nyaari wɔmu nu kre, kena kala o fnɛ, a o n taa kpra kre na.
7 La, na o nyaari nyisee kre na, imi na uu wa nyisee kre nu kre, kena wre na wre pe nunu, a u Biblɔ Yesu nyimi o weli, a o yili sisam kro nu.
8 Na o yo na o n sisaa pe kre, kena o oyɛ fana, a kpra kre n wa o nu.
9 La, na o nyu nyaa mu o sisam yo Nyiɛkpɔɔ pan kre, we li u kee ŋga u yo mu tɛɛ kre na, mbe ŋga ki fraka pe, mbe o sisam ti mbe o kɛ, mbe o weli mbe yili o sisam kro nu.
10 Na o yo na o n sisaa pe, kena o tia Nyiɛkpɔɔ pe kafnu, a u ketaan kre n wa o nu.