Kristo Wi O Yafun
2
Ni biile, ni e nyunɔi yire kee nyjɛ imi kie pe mbe yaa sisaa pe, la, na wa sisaa pe kre, oo wa na Yesu Kristo ni, wre u fraka, a wre u o Lɛ Nyiɛkpɔɔ wre tali o pan.
2 A wre Kristo wre na ki yire a o na sisam tinkɛɛ taa, a ki n pe wre chiin, la, wre na waŋgra leele kro.
3 Na o li Nyiɛkpɔɔ mbra na, kena o chin na o u chin yɛŋgɛ.
4 Na ndro yo na, “Ni u chin,” la, na ufun n li u mbra na kre, ufun wre pe kafnu, a kpra n wa u nu.
5 La, ŋmba we li u kee kre na kre, wrefun wre nu Nyiɛkpɔɔ koroo nyi chiriri. Ŋga na oo yire mbe chin na wre na Nyiɛkpɔɔ pe nunu yi kre,
6 ŋmba we yo na Nyiɛkpɔɔ ndro wi kre, u tni imi Yesu na nyi kre.
Mbra Fɔŋgɔ
7 Ni wolo, mbra fɔŋgɔ ma ni nyunɔi, la, mbra lɛɛ ŋga e na ta jle kre yi. Mbra lɛɛ kre yi kee ŋga e da mu loo fa kre.
8 La, kolo ka na kre, mbra ŋga ni e nyunɔi kre pe mbra fɔŋgɔ, a ki kpra kro, yire na Kristo nu ki nyaa. Ŋgi na hin? Wɔmu kre troi mbe sɛ, a kpra nyisee kre na nyaa.
9 Ŋmba we yo na u nyaari nyisee kre na, la, mu u ŋmbrɔ pra kre, u fun wre wa wɔmu nu tɛ.
10 Ŋmba u u ŋmbrɔ kori wree wa nyisee kre nu, a kee ka n wa u nu, ŋga kie ti mbe ndro sisaa pe.
11 La, ŋmba u u ŋmbrɔ pra kree wa wɔmu nu, na nyaari ki nu, a u n chin mna u shie. Ŋgi na hin? Wɔmu kre tia u fun nyiɛlɛ na.
12 Ni biile, ni e nyunɔi hlɛ, ŋgi na hin? Kristo mɛɛ kre saara na, e sisam tinkɛɛ ta.
13 Ndoe, ni e nyunɔi hlɛ, ŋgi na hin? Ŋmba wraa wa a pra chin mna yirɛ kro gbeele kre, e u chin.
Nyanyjɛbɛɛlɛ, ni e nyunɔi hlɛ, ŋgi na hin? E Sutna wre ja.
14 Biile, ni e nyunɔi hlɛ, ŋgi na hin? E o Lɛ Nyiɛkpɔɔ wre chin.
Ndoe, ni e nyunɔi hlɛ, ŋgi na hin? E ŋmba wraa wa, a yirɛ kro na chin mu gbeele wre chin.
Nyanyjɛbɛɛlɛ, ni e nyunɔi hlɛ, ŋgi na hin? Faŋgaa wa e nu, a Nyiɛkpɔɔ kee kree wa e nu, a e Sutna wre ja.
Waŋgra Koroo Na Nyiɛkpɔɔ Koroo
15 Yaa waŋgra ŋga kori, na yirɛ nyjɛ yii wa ki nu ni. Na wa waŋgra ŋga kori kre, kena o Lɛ Nyiɛkpɔɔ wre koroo n wa u nu.
16 Yirɛ nyjɛ yii wa waŋgra ŋga nu a yi pe lewo niŋge sisaa yirɛ, na nyjɛ lewo nyaa mbra yi chaa, na nyjɛ ni lewo uyɛ kpɔɔri nyjɛ kro, yi ka n yiri Ndoo wre pan, yi krɛrɛ waŋgra ŋga nu yi yiri.
17 Waŋgra, na ki niŋge sisam yirɛ nyjɛ kro nyjila troi mbe sɛ, la, ŋmba u ŋga Nyiɛkpɔɔ wre chaa pini kre we tni blenyini.
Kristo Loŋgoolo
18 Ni biile, nyjila haŋa kre nu o nyi kre, a imi na e na klu mu loo na, Kristo Loŋgo wre paan kre, fuŋgaami ŋga u loŋgoolo pre yiri, ki tia o chin na nyjila kre dani.
19 Pre leele mblɛ nyini n chaa o nu, kre ki tia pe kun o na kre. Na pra chaa o nu kre, wre na pre oo na tni. La, pe n pan mu chaa o nu, ki nyina chasi na pe n wa o nu.
20 La, Kristo e ŋga Kpra Ŋumu wre, a ki tia e kro kpra kre chin.
21 Ni e nyunɔi hlɛ, ki n pe na ŋga e n kpra kre chin na ni e nyunɔi, la, ŋga e kpra kre chin kre na yi, a e chin na kafinɛ kee ka n wa kpra kre nu.
22 Kena ŋmbi wi kafnu hin? Kafnu wi ŋmba u yuu na Yesu ma Kristo wre. Wrefun wi Kristo loŋgo wre. Wrefun u o lɛ Nyiɛkpɔɔ, na u Biblɔ wre je.
23 Ŋgi na hin? Ŋmba we Biblɔ wre je kre, u u Lɛ wre je na, ŋmba we Biblɔ wre shɔ kre, u u Lɛ wre shɔ na.
24 E ti mbe ketaan ŋga e na klu mu loo jle kre tni e nu. Na e tia kee ŋga e na klu mu loo jle kre tni e nu kre, kena yire na Biblɔ wre, na u Lɛ wre we pe nunu.
25 Yira ŋga Kristo wre titi yo mu tɛɛ na we o ŋga yi blenyini ŋmaa.
Kristo Nɔɔlɔ
26 Leele mblɛ pe e fana pre kee ni e nyunɔi kre.
27 La, yire rɛ, Kristo e ŋga Kpra Ŋumu wre. Ŋga u Ŋumu wree wa e nu ŋga, e n ndro shian mbe u e nyina na. Ŋgi na hin? Kpra Ŋumu wre e nyina kee kro, a nyjɛ u e nyina yire pe kpra, kafinɛ n wa yi nu. E li kee nyjɛ Ŋumu wre e nyina yire na, mbe yire na Kristo tni.