John Hlɛ Shiinwo
Shaaraa
1
Hlɛ ŋga yiri mi John, e lopom wre pan, na shie chlɔ ŋmba Nyiɛkpɔɔ kori, mu u wɔ wre, na u biile mblɛ ni kori pre pan. Mi nunu ma ni e kori, mblɛ pe kpra kre chin pre kro e kori.
2 Ŋgi na hin? Kpra kree wa o nu nyjila kro nu, a kia jaa yili o nu fio.
3 O Lɛ Nyiɛkpɔɔ wre, na u Biblɔ Yesu Kristo wre pe o dumi, mbe o fooro chin, mbe o ŋga wejinyiŋge kpra na koroo nu.
Kpra Na Koroo
4 Ni yiɛ na shɔ kpɔɔ na ndaa nya na mu biile pre plɛ taa kpra kre kro, imi na o Lɛ Nyiɛkpɔɔ wre yo o pe kre.
5 Kena Maa, ni mu tali, e ti mbe o kro oyɛ kori. Mbra fɔŋgɔ ma ni e nyunɔi, la, mbra lɛɛ ŋga o na ta fa kre yi.
6 A kre koroo ŋga kee ni yuu ŋga, ki kro yi na oo li Nyiɛkpɔɔ mbra na. Mbra kre, imi na e kro ki loo mu yire jle kre, na ki fna mbe e kro tni koroo nu.
7 Fanafɛɛnlɛ pan waŋgra ŋga nu tataara. Leele mblɛ pe yuu na Yesu Kristo nsra pan na lewo wi kre, pre na ni nyi kre. Na ndro yo ma kre, mu chin na leele u fana, a ufun wre Kristo loŋgo wi.
8 Kena e eyɛ dɔɔta, mbe yira ŋga na o fnai kre, mbe yaa fna ki na waara, la, mbe e kɔɔ fɔtɔɔrɔ ŋga ki fna ta.
9 Ndro ŋmba u n taa kee nyjɛ Kristo wre nyina yire na, mu kee yire wa kro kre, ufun n Nyiɛkpɔɔ chin. Ŋmba we taa Kristo kee yire na kre, u o Lɛ wre, na u Biblɔ wre ta.
10 Na ndro pan mbe paan e nyina kee ka, a u n ki pe Kristo kee kre, yaa shia ti u tuu e katoo, a yaa shia u shaari kple.
11 Ŋgi na hin? Ŋmba we u shaari kre, kena wre na wre we pe nunu u sisam kee yire nu.
Kee Yire Hɛnyi
12 Nii wa na kee ni tataara mbe yo e pan, la, ni n na chaa mbe yi nyunɔ hlɛ na mbe paan e ŋga, ni kaan na mi titi we paan e shaari, mbe o kro fni mbe paara, mbe ki ti o kro yiɛshɔ.
13 E jaa ŋmba Nyiɛkpɔɔ wɔ wre biile pre e shaari kro.