John Hlɛ Taarɛwo
Shaaraa Na Mɛɛ Ŋgaa
1
Mi John ŋmba ni pe lopom wre pan hlɛ ŋga yiri na shie ni nunu Gaius ŋmba ni kori kpra ni wre pan.
2 Ni ŋmbrɔ ŋmba ni kori, ni nyiɛtali na kee kro ki nyu mbe mu ŋga, mbe mu pe gbaŋmba, imi na ni shɔ mu li na muu gbaŋmba kre.
3 O wolo plɛ na le, mna mu kee yo ni pan na, mu kpra kre yii kɛ shiin imi na mu nyi kpra kre nu kre, ki tia ni yiɛshɔ kpɔɔ.
4 Ŋga ki ni yiɛshɔ mu tro kuraa yi na, ni loo na ni biile kpra kre yii kɛ shiin.
Pe Gaius Ŋga Mɛɛ
5 Ni ŋmbrɔ ŋmba ni kori, tnumu ŋga mu tuni na mu ŋmbilɛ sumifɛɛnlɛ kaan, hali na pini na pe mblɛ pe pe fumblɔ pre kaan kre, mu kpra lii.
6 Pe pan mu mu koroo ŋga mu sumifɛɛnlɛ pre kori kre kee yo mna. Jande ta yaa pe na, mbe pe jaa pe kolo nyjɛ pe kuun yire kun, mbe ki Nyiɛkpɔɔ yiɛ nyi.
7 Ŋgi na hin? Na pe yili na shie Kristo tnumu kre tun haa, pra yaka shɔ leele mblɛ pe n shɔ mu li pre pan.
8 Kena wre Kristofɛɛnlɛ o fna mbra yaa pe na. Na ki pan ma, kena o kro pe kpra kre tnumutunfɛɛnlɛ.
Diotrephes Na Demetrius
9 Ndaa hlɛ fiɛn ka nyunɔ mu sɛ sumifɛɛnlɛ pre ŋga, la, Diotrephes ŋmba u chaa mbe uyɛ pe pe lopom wre nsraa chaa mbe ni kee ŋga ni yuu kre loo.
10 Kena na ndaa pan, mbe u kee nyjɛ u pini yire kro wɔ fimi na, kefuɛn nyjɛ u yuu na taari o na, na kee nyjɛ u fnɛ yire kro. Yire chiin ma u pini kple, o wolo mblɛ pe kila na tro kre, wraa ti mbe pe le u pan, a na sumifɛɛnlɛ pre plɛ yo pie pe shɔ mbe u je, mbra chaa mbe pe ni mbe yili sumifɛɛnlɛ pre nu.
11 Ni wolo mblɛ ni kori, yaa na kefuɛn sɛɛlɛ, la, e na kee chichie sɛɛlɛ. Ŋmba u chichie pini kre, Nyiɛkpɔɔ ndro wi. A ŋmba u sisaa pini kpan, u n Nyiɛkpɔɔ chin.
12 Ndro kro Demetrius kee chichie yuu. Kpra kre titi u chichie yuu. A o ki dansiɛrɛ li, a yire titi chin na kpra o yuu.
Shaaraa Haŋa
13 Kee wa tataara mbe ni yo e pan, la, ni n na chaa mbe yi nyunɔ na inki ni.
14 Ni kaan na kia mu, mbe e nya, mbe o kro tni mbe paara.
15 Yire na wejinyiŋge e tni. E nɔɔlɔ pre kro e shaari. E o nɔɔlɔ pre kro shaari o pan.