2 Foorochiɛn, na wejinyiŋge, na koroo yi tni e nu tataara.

3 Ni wolo mblɛ ni kori, ndaa gbeŋmba na mbe na ŋmaashɔmu ŋga o kro ta kre kee nyunɔ mbe paan e ŋga. A ni jawala ka ta na mbe nyunɔ mbe paan e le gbeŋmbaa, mbe e wi shɔnlie ŋga Nyiɛkpɔɔ u leele ŋga, a ka n wa mbe paan ya ki na kre na.

4 Ŋgi na hin? Leele plɛ ju fɛɛ mu pan mu chaa o nu, pre leele mblɛ, pra pe kee nyunɔ fa mu tɛɛ na pie pimi li. Pe n Nyiɛkpɔɔ chin, pre pe o Nyiɛkpɔɔ wre dumiɛ kee kre kna, mu yire ki na na sisaa nyjɛ yi n fna pini, mu o Tafun Yesu Kristo jaŋgafun wre je.

5 Kee nyjɛ mbe yo ŋga, e yi chin chɔ, chaa ni chaa mbe e sɔɔnri imi na o Tafun wre na Israel leele shɔ mna yili Egypt tra nu, la, ŋga wra pe shɔ mu kɔ kre kɔkro, wra mblɛ pe nsra u shɔ mu li kre kla.

6 E nyjeeri bitumblɔ mblɛ pe nsra pe jaŋga ŋga pe ta le chiriri kre sɔɔnri, pre pra fɛ mu pe tnihaa ti. Ki tia Nyiɛkpɔɔ na blenyini jlɔnyi tɛɛ mu pe pɔ, mna sɛ pe tɛɛ wɔmu kprikpri ndoo kre nu. Bawa Nyiɛkpɔɔ pe tɛɛ mu na u ble kpɔɔ kre sri, mbe pe gbun pimi ni.

7 E Sodom na Gomorrah na yi mbɛɛlɛ chiɛ yire sɔɔnri, pan yire chiɛ nyjɛ leele na pe na pre nyjeeri bitumblɔ mblɛ lɛ, mna tiɛrɛɛ ŋga ki n fna tiɛri, mna taa pe niŋge sisaa kro, a Nyiɛkpɔɔ na blenyini kanhun kre tɛɛ mu pe sro, a ki pe o kro pan jaaraa.

8 Pan chɔɔ pre leele mblɛ yire pe ŋunɛ nyjɛ pe ŋunu na, mu na sisam pini na pe wejinyi taanla. Pe Nyiɛkpɔɔ jaŋga kre le kewaa, mu na yɛnyiŋgefɛɛnlɛ mblɛ pee wa nyjeeri wa kre tɛɛlɛ.

9 Nyjeeri Bitumblɔ Ŋunu Michael wre kuraa nsra Sutna tɛɛ, nyjila ŋga ni wre na Sutna naa nyu knai Moses gboo na kre, pra kakra li tataara, nde Michael nsra nyu nyaa mu Sutna tɛɛ, ndee mna u gbun na pimi ni, la, wra yo u pan mbo, “O Tafun wre u mu yiɛ kee yo mu pan.”

10 La, pre leele mblɛ, kee nyjɛ nɔɔ pe n na ndru yire na pe kefuɛn yuu, a pan pe nyi na yurɛ lɛ, nyjɛ pre titi niŋge chaa kre, yire pe pini, a yira pe klai.

11 Pe atɛ, kolo ŋga na Cain na tro kre pe bali. Ŋgi na hin? Pe yila swa na, mu peyɛ le sisaa ŋga Balaam na pe kre ka nu. Pe yiri mu Nyiɛkpɔɔ taan imi na Korah na pe kre, a pan Nyiɛkpɔɔ we pe kla imi na wra Korah kla kre.

12 Na pe chaa e nu e na lii kre, pan pe nyi na gbronto dnɛ yi e nu, pe n na nyifɛɛrɛ pini, peyɛ kee ki pe shian. Pan pe nyi na tloe yi, mu yi nya, mbe fuflɛ yi wru mbe sɛ, yia jaa pan nyiɛ. Pan pe nyi na tinyi nyjɛ yiraa ja mu sɛ yi sɛ nyjila yi, a pe yi didinyi klɔ a yi ku.

13 Pan pe nyi na imi na fuflɛ epo nyumu wru na shie na paan tafɔkɔ ni kre yi, a pan pe nyifɛɛrɛ kee yire nyi na Epo nyu tafɔkɔ yi. Pan pe nyi na wɔɛlɛɛ nyjɛ yi klɔ yi, Nyiɛkpɔɔ lawee gbeele mu tɛɛ pe pan wɔmu lawee ŋga ki jio kre nu.

14 Mu yire Adam na, Enoch u taa o tolɛɛlɛ pre semu na kɔɔnashin wo. Wre Enoch ŋmba, wre wra pre leele mblɛ kee nya mu yo mbo, “E le, o Tafun wre na u nyjeeri bitumblɔ kagbenyi kagbenyi mblɛ pe pe cheche we pan,

15 mbe paan ndro kro kpra kun, we paan yire sisampefɛɛnlɛ mblɛ pe n li Nyiɛkpɔɔ kee na kre sisam kee nyjɛ pe pe na, mbe pe kro gbun pimi ni, kefuɛn nyjɛ pe yo mu Nyiɛkpɔɔ taan kre na pie pimi li kre.”

16 Pre leele mblɛ pe taanri nyjila kro nu, na baa leele na finfin, pre titi niŋge sisaa kolo na pe taa, na peyɛ kpɔɔri, nyutnam kee pe yuu leele pan, mbe yire ki na mbe yaka ta pe pan.

17 La, ni wolo, e o Tafun Yesu Kristo bitumblɔ pre kee yire pra yo e pan fa yire sɔɔnri.

18 Pra yo e pan na, “Na ble hɛnyi yire waa na dani kre, leele plɛ we yiri mbra e pini mbra tɛɛ, pre leele pre we taa pre titi niŋge sisaa kolo ŋga ki n pe Nyiɛkpɔɔ kolo na.”

19 Pre leele mblɛ pie paan e lalaa kla, waŋgra ŋga sisam kee na pe taa, a Kpra Ŋumu wre n wa pe nu.

20 La, ni wolo, yire rɛ, e ka ya e shɔnlie cheche kre na. E Kpra Ŋumu wre jaŋga tɛɛ e na nyiɛtali.

21 Ŋga ee wa na sri mbe o Tafun Yesu Kristo wre yire u foorochiɛn na, mbe paan e ŋga blenyini ŋmaa ŋga, e tni Nyiɛkpɔɔ koroo kre nu.

22 E mblɛ jawala yi pe pini shiin shiin pre fooro chin.

23 E plɛ tini e yili kanhun kre nu e pe shɔ. E Nyiɛkpɔɔ fiɛrɛ tɛɛ e plɛ fooro chin, la, nyjɛ krɛrɛ nu kre, e eyɛ dɔɔta pe nɛɛrɛ kee yire pe pini yire na, yaa shia eyɛ le yi nu.

24 Nyiɛkpɔɔ ŋmba we jaa e yii mbe yaa to, mbe ti e jaa paan yire yɛshɔɔrɔ ni u yɛnyiŋge kre yiɛ, mbe nɛɛrɛ ka wa pe e na kre,

25 wre wi Nyiɛkpɔɔ nunu chom, ŋmba wi o ŋmaashɔfun mu yire o Tafun Yesu Kristo na. Wre Nyiɛkpɔɔ wre wo yi yɛnyiŋge, na kpɔɔmu, na faŋga, na jaŋga, nyjila kro nu. Ami.