Wɔnyinakee
Hlɛ Kre Na Ki Nyunɔfun
1
Yesu Kristo kee nyjɛ Nyiɛkpɔɔ na u ŋga, mna tia wra yi wɔ mu u sumifɛɛnlɛ nyina, na yire kee yire wa mu kuraa mbe pan. A Yesu na u nyjeeri bituŋu tun, a wra pan mna kee yire krɛrɛ wɔ mna mi u sumifun John nyina.
2 A ndaa Nyiɛkpɔɔ, na Yesu kee nyjɛ ndaa nya, mna loo yire kro dansiɛrɛ li.
3 Kena ŋmba we kee nyjɛ tɔɔnri kpɔɔ mbe leele loo kre, we dwamu ta o Tafun wre pan. A mblɛ pie kee yire loo, mbe li yi na pre we dwamu ta. Ŋgi na hin? Nyjila kre mbra mna.
Shaaraa
4 Mi John, ni kee nyjɛ nyunɔi na paan mbe sumifɛɛnlɛ kɔɔnashin nyjɛ yii wa Asia tra nu yire ŋga. Ni wolo, yire na dumiɛ na wejinyiŋge ŋga ki yiri ŋmba wraa wa fa, mu wa aŋga, mu wa na paan na wre, na ŋumu kɔɔnashin pre pee wa u ŋujɔɔn kre yiɛ,
5 na Yesu Kristo ŋmba u pe kpra dansiɛlifun wre, bijlo ŋmba u ku mu nyi mu yili kuulo nu wre, na waŋgra ŋulo kro ŋunu wre e tni. U o kori, mna yire u kumu, na u nyimi nyjɛ wra kna mu wo yire na, mna o sisam laa o na,
6 mu o pe u ŋunumu kre lebiile, a o pe sɔfue, mu na u Lɛ Nyiɛkpɔɔ wre sumi. Kena Yesu wo yi yɛnyiŋge, na jaŋga nyjila kro nu. Ami.
Mɛɛ Ŋgaa
7 E le, u paan tloe nu,
ndro kro we u nya,
hali mblɛ pra u gbo pre kro.
Kpra yi na waŋgra leele kro,
we nyɛni fooro ni u yiɛ. Ami.
8 O Tafun Nyiɛkpɔɔ yo mbo, “Mi wi yɛklo, na kotɔŋu. Mi wi Jaŋgafun wre, Mi ndaa wa fa, mu wa aŋga, mu wa na paan baŋga na kre.”
Kee Kre
9 Mi wi e ŋmbrɔ John wre. Ŋga yire na Yesu pe nunu ŋga, kanyana nunu o kro nyaa, a o kro wo yi u ŋunumu kre, a frɔ nunu o kro frɔ. Ŋga ndaa Nyiɛkpɔɔ, na Yesu kekpra kre kpali kre ndra na, pra ni yii mna sɛ ni wa kuyɔɔsu ŋga pe yeeri Patmos kre na.
10 O Tafun sumi ble ka na to, a ndaa wa na sumi, a Kpra Ŋumu wre na pan ni nu, a ndaa mana kpɔɔ ka loo ni kro, a kraa tini na bnɔɛ yi, na yuu mbo,
11 “Kee nyjɛ mu nya ŋga nyunɔ mu le hlɛ nu, mu sɛ sumifɛɛnlɛ fnihɛɛ kɔɔnashin nyjɛ yii wa Ephesus, na Smyrna, na Pergamum, na Thyatira, na Sardis, na Philadelphia, na Laodicea na yire ŋga.”
Kee Nyjɛ Ndaa Nya Nyiɛlɛ Na
12 Ŋga ndaa mana kre loo mna kna mu le kre, swa nyiɛ kaniɛ taa yirɛ kɔɔnashin ndaa nya na yii wa mu yire,
13 a ndaa ndro wa nya yi lalaa na Lewo Biblɔ wre wi, a wra dodoŋgi titnɔŋɔ le, a kra da u jewrɛ na, mu swa nyiɛ greree pɔ gbun na.
14 U ndra, na u nyjure na fniŋge prupru na mbafiun yooro yi, mu pe na nyiɛsubie yi, a u nyiɛlɛ naa chiɛri na kanhun yi.
15 A u jeelee naa chiɛnri na pe swa nyiɛ fre le kanhun mu ki je, a u mana naa tini na chɔlɔjuu yi.
16 Wra wɔɛlɛɛ kɔɔnashin yii u kalie kɛ nu, a brɔfiɛn yiɛshiin ŋga nyu ki tna naa yilii u nyuu, a u yiɛ naa chiɛnri na lafo chrichri yila yi.
Ŋmaa Na Dankna
17 Ŋga ndaa u nya ma kre, a ndaa to u yiɛ mu sni na gboo wi, a wra u kalie kɛ kna mu taa ni ndra na mbo, “Maa fiɛ! Mi wi yɛklo, na kotɔŋu wre.
18 A mi wi ŋmba uu wa mu tni nyjila kro nu. Ndaa ku fa, la, ni ndru mu nyi, a mba ku na fio. Mi kɛɛ kumu, na kuulo ndoo safwa kre nyi.
19 Kena kee nyjɛ mu nya ŋga nyunɔ fuŋgaami, mu nyjɛ yii wa fuŋgaami, na nyjɛ yii wa kro na paan yire krɛrɛ nyunɔ mu ya.
20 Wɔɛlɛɛ kɔɔnashin nyjɛ mu nya ni kalie kɛ nu, na swa nyiɛ kaniɛ taa yirɛ kɔɔnashin nyjɛ mu nya yire, yi ndrandra kee yi kre. Wɔɛlɛɛ kɔɔnashin yire mu nya yire, sumifɛɛnlɛ fnihɛɛ kɔɔnashin yire bitumblɔ lɛ, a kaniɛ taa yirɛ kɔɔnashin yire mu nya yire, sumifɛɛnlɛ fnihɛɛ kɔɔnashin yire yi.”