Shɔnlie Na Ki Jaŋga Taara
5
Ŋmba we shɔ mbe li na Yesu wi ŋmaashɔfun ŋmba Nyiɛkpɔɔ wɔ kre, kena Nyiɛkpɔɔ pɔ wi. A ŋmba we o Lɛ Nyiɛkpɔɔ wre kori kre, mu chin na pan u u Biblɔ wre kori na.
2 Ŋga ni oo chin na o Nyiɛkpɔɔ biile kori yi na, oo Nyiɛkpɔɔ wre kori, mbe li u mbra na.
3 Ŋgi na hin? Nyiɛkpɔɔ koroo yi na, oo li u mbra na. A u mbra n sheli mu tro.
4 Ŋgi na hin? Ŋmba u pe Nyiɛkpɔɔ pɔ kpan, uu jaŋga ni waŋgra na. Ŋga ni o waŋgra ja yi o shɔnlie.
5 Ŋmbi we jaa jaŋga li waŋgra na hin? Fɔna ŋmba u shɔ mu li na Nyiɛkpɔɔ Biblɔ wi Yesu wre bɔkɔ.
Yesu Kristo Dansiɛrɛ Kee
6 Yesu Kristo wi ndro ŋmba wra pan, a pra u ndra je na nyumu ni, a wra ku, a u nyimi na wo, nyumu chiin ma kra yili u nu, la, nyumu na nyimi chaara yira yili u nu mu wo. A Kpra Ŋumu wre titi ki dansiɛrɛ li, ŋgi na hin? Kpra Ŋumu wre pe kprafun.
7 Yirɛ taarɛ yi u dansiɛrɛ li,
8 Kpra Ŋumu wre, na nyumu, na nyimi yire yi u dansiɛrɛ li, a dansiɛrɛ nunu yi kro taarɛ yire li.
9 Na lewo dansiɛrɛ li, o ki shio na lii, a dansiɛrɛ kee ŋga Nyiɛkpɔɔ o ŋga mu wru u Biblɔ wre haa kre, jaŋgaa wa ki nu.
10 Kena ŋmba u Nyiɛkpɔɔ Biblɔ wre shɔ mu li kre, mu chin na u dansiɛrɛ kee kree wa u loloŋgo nu, la, ŋmba u n Nyiɛkpɔɔ shɔ mu li kre, u Nyiɛkpɔɔ pe kafnu, ŋgi na hin? U fun n Nyiɛkpɔɔ dansiɛrɛ ŋga u li mu wru u Biblɔ wre haa kre shɔ mu li.
11 U dansiɛrɛ kee kre yi na, Nyiɛkpɔɔ o ŋga blenyini ŋmaa, a u Biblɔ wre nu blenyini ŋmaa kre nyi.
12 Kena ŋmba u Biblɔ wre ta kre, u ŋmaa kre ta, ŋmba u n Nyiɛkpɔɔ Biblɔ wre ta wre, u n ŋmaa ni.
Blenyini Ŋmaa
13 Ni e nyunɔi yire kee nyjɛ mbe e chin na ee blenyini ŋmaa ni, yire mblɛ e Nyiɛkpɔɔ Biblɔ wre shɔ mu li kre.
14 O gbun ta mbe yire Nyiɛkpɔɔ yiɛ, ŋgi na hin? O shɔ mu li na, yira ŋga o u tali kpan, u chaara na kre, u ndru o pan.
15 Na o u tali kpan, u ndru o pan, a o chin na kre kee ŋga pe kpra, ki tia o chin na ŋga oo u tali kpan, we ki pe mbe o ŋga.
16 Na wa u ŋmbrɔ nya, a u sisaa ŋga kia sɛ na u ni kumu nu pe kre, ufun u Nyiɛkpɔɔ tali u sisaa pefun wre ŋga, mbe Nyiɛkpɔɔ u ŋga ŋmaa. Mblɛ sisam kia sɛ na pe ni kumu nu pre na ni nyi. Sisaa ka shie na lewo ni kumu nu, la, ni n yo e Nyiɛkpɔɔ tali mbe kre sisam kre na.
17 Kee ŋga ki n fraka kro sisaa yi, la, sisam kro ma ki shie na ndro ni kumu nu.
18 O chin na Nyiɛkpɔɔ pɔ wa n wa mbe kro mbra sisaa pini, ŋgi na hin? Nyiɛkpɔɔ Biblɔ Yesu wre u shɔ mu yili sisam nu, a Sutna wre wa jaa u pe sisaa.
19 O chin na Nyiɛkpɔɔ wolo lɛ wre, a nde Sutna wi waŋgra ŋga ŋunu.
20 O chin na Nyiɛkpɔɔ Biblɔ wre pan mu tia o nɔɔloo ta, ki tia o Kpra Nyiɛkpɔɔ wre chin. O ŋmaa wa kpra Nyiɛkpɔɔ wre kɛɛ, ŋgi na hin? O pe nunu na u Biblɔ Yesu Kristo wre ni. Wre wi kpra Nyiɛkpɔɔ wre, a wre wi blenyini ŋmaa.
21 Ni biile, e eyɛ wɔ e yili sɛɛnlɛ kee nu.