Kpra Ŋumu Na Kafinɛ Ŋumu
4
Ni wolo mblɛ ni kori, yaa na mblɛ pe yuu na Kpra Ŋumu wree wa pe nu pre kro shio mbra lii, la, e pe le chichie, na Ŋumu ŋmba uu wa pe nu wre, na Nyiɛkpɔɔ Ŋumu wi. Ŋgi na hin? Kafinɛ Nyiɛkpɔɔ kee nyanyofɛɛnlɛ tataara pan mu nyina waŋgra nu kro.
2 Kolo ŋga na ee yire mbe Nyiɛkpɔɔ Ŋumu wre chin yi kre. Ndro ŋmba we nyu nyaa mbe yo na Yesu Kristo na pan na lewo wi kre, mu chin na Nyiɛkpɔɔ Ŋumuu wa u nu.
3 A ŋmba we yo na Yesu Kristo nsra pan ma kre, mu chin na Nyiɛkpɔɔ Ŋumu ma uu wa u nu. Kre ŋumu kre yiri Kristo loŋgo wre pan. E na loo na wre loŋgo ŋmba paan, u le waŋgra nu fuŋga ma.
4 Ni biile, yire rɛ, Nyiɛkpɔɔ wolo lɛ yire, a kafinɛ Nyiɛkpɔɔ kee nyanyofɛɛnlɛ pre wa jaa e fana. Ŋgi na hin? Ŋumu ŋmba uu wa e nu wre, uu jaŋga ni mu wɛ ŋumu ŋmba uu wa waŋgrafɛɛnlɛ nu kre na.
5 Pre kafinɛ Nyiɛkpɔɔ kee nyinafɛɛnlɛ pre, waŋgra kee pe yuu, a waŋgra leele na ndru pe pan. Ŋgi na hin? Waŋgra wolo lɛ.
6 La, Nyiɛkpɔɔ wolo lɛ wre. Ŋmba u Nyiɛkpɔɔ chin kre, u ndie teeri o pan, a ŋmba u n pe Nyiɛkpɔɔ wo kre, wa ndie tɛɛ mbe loo o pan. Kena ŋga na oo yire mbe Kpra Ŋumu na kafinɛ ŋumu wre chin.
Nyiɛkpɔɔ Koroo
7 Ni wolo mblɛ ni kori, e ti mbe o oyɛ kori. Ŋgi na hin? Nyiɛkpɔɔ pan koroo yiri. Ndro ŋmba nu koroo nyi kre, Nyiɛkpɔɔ ndro wi, a u Nyiɛkpɔɔ chin.
8 Ŋmba nu koroo n wa kre, u n Nyiɛkpɔɔ chin. Ŋgi na hin? Koroo wa Nyiɛkpɔɔ nu.
9 Kolo ŋga na Nyiɛkpɔɔ u koroo nyina yi kre, wra u Biblɔ nunu chom wre tun a wra pan waŋgra nu, mbe o yire u na mbe ŋmaa ta.
10 Kre kee ŋga yi koroo, ki n pe na wre o Nyiɛkpɔɔ kori, la, wre u o kori, mu yila ki na mu u Biblɔ tun, mbe ki yire u na mbe o sisam tinkɛɛ ta.
11 Ni wolo mblɛ ni kori, na kre kolo ŋga na Nyiɛkpɔɔ o kori waa, kena ki fna mbe o oyɛ kori.
12 Ndro n da mu Nyiɛkpɔɔ nya tun. Na o oyɛ kori kre, kena Nyiɛkpɔɔ wa o nu, a o u koroo kre nyaa o nu.
13 Ŋga na oo yire mbe chin na oo wa Nyiɛkpɔɔ nu, a uu wa o nu kre yi na, u o ŋga u Kpra Ŋumu wre,
14 a o nya na yuu plɛ pan na, o Lɛ Nyiɛkpɔɔ wre wra u Biblɔ wre tun na u paan pe waŋgra ŋmaashɔfun.
15 Ŋmba we yo na Yesu wi Nyiɛkpɔɔ Biblɔ kre, kena Nyiɛkpɔɔ wa u nu, a uu wa Nyiɛkpɔɔ nu.
16 A o Nyiɛkpɔɔ koroo ŋga u o kori chin mu ki shɔ mu li. Koroo wa Nyiɛkpɔɔ nu, ki tia ndro ŋmba nu koroo nyi kre, uu wa Nyiɛkpɔɔ nu, a Nyiɛkpɔɔ wa u nu.
17 Na o oyɛ kori chichie, mu tni imi na Kristo na nyi kre, kie ti mbe o gbun ta mbe yire Nyiɛkpɔɔ kpra kun ble kre nu.
18 Mna koroo nyi kpan, fiɛrɛ n wa wa, koroo chiriri fiɛrɛ kro nini. Kena ŋmba nu fiɛrɛ nyi kre, u n koroo chiriri ni, ŋgi na hin? Fiɛrɛ na ndietiniɛ ki nyaari.
19 O Nyiɛkpɔɔ kori, ŋgi na hin? Nyiɛkpɔɔ u klu mu o kori.
20 Na ndro yo na, “Ni Nyiɛkpɔɔ kori,” la, mu u ŋmbrɔ pra kre, kena kala u fnɛ. Ŋgi na hin? Wa jaa Nyiɛkpɔɔ ŋmba u n nya wre kori, mbe u ŋmbrɔ ŋmba u nya wre pra.
21 Mbra ŋga Kristo na o ŋga yi kre mbo, “Ŋmba u Nyiɛkpɔɔ kori kre, ki fna mbe u u ŋmbrɔ kori na.”