Nyiɛkpɔɔ Biile
3
E le imi o Lɛ Nyiɛkpɔɔ wre o kori mu da, imi u o kori kre tia pra o yeeri Nyiɛkpɔɔ biile, a u biile lɛ wre yɛŋgɛ. Ŋga ki tia waŋgra leele n o chin yi na, pe n Nyiɛkpɔɔ wre chin.
2 Ni wolo, fuŋgaami ŋga Nyiɛkpɔɔ biile lɛ wre, la, o n ta mu nya chasi imi sembremu oo pe tun, la, o chin na, na o waa Kristo nya kre, oo pe na wre wi, ŋgi na hin? Imi na u nyi kre pan oo u nya.
3 Ŋmba u kaan Kristo na kre kee ŋga na kre, u uyɛ pini cheche, imi na Kristo pe cheche kre.
Sisam Kolo Na Kefrakaa Kolo
4 Ŋmba we sisaa pe kre, u pimi li na u Nyiɛkpɔɔ mbra taan. Ŋgi na hin? Sisam kro Nyiɛkpɔɔ mbra taan.
5 E chin na Kristo na pan mu lewo sisam kro laa u na, a sisam ka n wa u nu.
6 Ki tia ŋmba na Kristo pie tni kre wa kro mbra sisaa pini. Kena ŋmba we kro mbra sisaa pini wre n Kristo wre nya, ndee mu u chin tun.
7 Ni biile, yaa ti mbe ndro e fana, ŋmba u ŋga ki fraka pini kre fraka, imi na Kristo fraka kre.
8 Ŋmba we kro mbra sisaa pini kre pe Sutna wo, ŋgi na hin? Sutna wre u sisaa pe mu yire jle kre. Kre ndra na Nyiɛkpɔɔ Biblɔ wre yila mu pan, mbe paan Sutna wre tnumu kla.
9 Ŋmba u pe Nyiɛkpɔɔ pɔ wre wa kro mbra sisaa pini. Ŋgi na hin? Nyiɛkpɔɔ kepelee wa u nu, a ŋga Nyiɛkpɔɔ pe u Lɛ kre ndra na, wa jaa kro mbra sisaa pini.
10 Kee ŋga ki Nyiɛkpɔɔ biile na Sutna biile nyina yi kre. Lewo ŋmba u n na ŋga ki fraka pini, ndee mu u ŋmbrɔ kori kre, ufun n pe Nyiɛkpɔɔ pɔ.
E Eyɛ Kori
11 Ketaan ŋga e na loo mu yire jle kre yi na, ki fna mbe o oyɛ kori.
12 Ki n fna o pe na Cain wi. Cain na pe Sutna wo, mna u chunu gbo. Ŋgi kra tia wra u gbo hin? Kee nyjɛ Cain naa pini yire na pe sisam kee bribri, a kee nyjɛ u chunu wre naa pini yire na fraka.
13 Kena ni wolo, na waŋgra leele e pra, yaa ti mbe ki e pe kawako.
14 O chin na o yili kumu nu mu pan ŋmaa nu, o ki chin, ŋgi na hin? O o ŋmbilɛ kori. Ndro ŋmba u n koroo ni wree wa kumu jaŋga jaara.
15 Lewo ŋmba u u ŋmbrɔ pra wre pe linkufun, a e kro chin na linkufun n wa blenyini ŋmaa ni.
16 Kolo ŋga na o yire na koroo chini yi kre, Kristo na yila o ndra na mna ku. Kena o fna mbe ku o ŋmbilɛ tlo.
17 Na lewo ta, a u u ŋmbrɔ nya na yaka u shian, a u n ya u na, mni we pe mbe yo na Nyiɛkpɔɔ koroo wa u nu hin?
18 Ni biile, o koroo n fna mbe pe nyu kee yoo, na paaraa chiin. Ki fna mbe pe kpra koroo, ŋga ndro kro we nya o kepele nu.
Gbun Ŋga Oo Ta Nyiɛkpɔɔ Yiɛ
19 Kena yire kee nyjɛ yie ti o chin na o pe kpra kre wolo, mbe gbun ta Nyiɛkpɔɔ yiɛ.
20 La, na o jawala o gbun pimi ni kre, wre Nyiɛkpɔɔ ki chin. Ŋgi na hin? Nyiɛkpɔɔ wre kpɔɔ mu wɛ o jawala na, mu kee kro chin.
21 Kena ni wolo mblɛ ni kori, na o jawala n o gbun pimi ni kee ka na kre, oo gbun ta mbe yire Nyiɛkpɔɔ yiɛ.
22 Ŋga o tali u pan kre o taa, ŋgi na hin? O lii u kee na, na kee ŋga ki tna u pan pini.
23 Kee ŋga u yo o pe yi kre, na oo u Biblɔ Yesu Kristo mɛɛ kre shɔ mbe li, mbe oyɛ kori, imi na Kristo wre yo na o pe kre.
24 Ŋmba we li kee ŋga Nyiɛkpɔɔ yo o pe na kre, uu wa Nyiɛkpɔɔ nu, a Nyiɛkpɔɔ wree wa o nu. A Kpra Ŋumu ŋmba Nyiɛkpɔɔ o ŋga wre ndra na, o chin na Nyiɛkpɔɔ wree wa o nu.