Waŋgra Swafɛɛnlɛ Taahaa
5
E le, yire swafɛɛnlɛ, e na gble leni, e na nyɛni, kanyana badɛnyi paan e na.
2 E yirɛ nyjɛ e ta yire kro kla, a dumblɔ e yonyi ka.
3 E swa nyiɛ yirɛ na e swa finyi yirɛ nyjɛ e ta yirɛ kro, sepe u chɔ gbo mu wo yi na, a yi kla, e yirɛ nyjɛ e tɛɛ a yi kla kre, yie e dansiɛrɛ li na e sisam pe, a yie pan na kanyana tataara ni e na. Ŋgi na hin? Ŋga nu waŋgra paan mbe kla kre, kre nyjila kre nu e yirɛ le le mu tɛɛ e nyinyi nu.
4 E le, leele mblɛ pe e tnumu tuni e sele nu kre, e n pe fɔɔlɛɛ tɔ chiriri, ki tia a pra nyɛni, a pe nyɛnɛɛ le o Tafun jaŋgafun wre ndie.
5 E swa ndra na e eyɛ lii e tnimu nu tra ŋga na. Imi na nuu kaa mbe kpɔɔ mbe pe u gbo kre, pan chɔɔ e eyɛ li mu kpɔɔ kpɔɔ na shie Nyiɛkpɔɔ kpra kuun ble kre nu.
6 Yire e leele mblɛ pe fraka kre yii, mu yo na ki fna pe ku ku, a pe n paara a e sɛ pe gbo gbo.
Kristo We Pan
7 Kena ni wolo, e frɔ e tni e na o Tafun paan kre sri. Na falifun chaa mbe u yirɛ nyu chiriri kre, e le imi na u frɔ na dani, we frɔ mbe yirɛ luu nyiɛ jle ni, mbe frɔ, na nyiɛ hɛnyi pan mu kun kre, mbe u chiin yi kun.
8 Pan ki fna mbe e frɔ, e eyɛ yii e tni komm. Ŋgi na hin? O Tafun pan ble kre dani.
9 Ni wolo, yaa na taanri eyɛ na, mbe Nyiɛkpɔɔ waa shia e gbun pimi ni. E le, kpra kunfun wree wa mu yire e jlonwee nyu na.
10 Ni wolo, e Nyiɛkpɔɔ kee nyanyofɛɛnlɛ mblɛ pra pan mu paara o Tafun wre mɛɛ nu kre sɔɔnri, e pe kepele tuan.
11 Pe frɔ ŋga pra ta kre ndra na o pe yeeri yɛshɔɔrɔ tafɛɛnlɛ. E Job frɔ ŋga wra ta u kanyana nyjila nu kre loo. A e loo imi na o Tafun wre na kɔ mna u le mu da. O Tafun wre, u lewo kee chaa, a u fooro chiɛn kpɔɔ.
Kpra Paaraa
12 Nyjɛ kɔkro kre, ni wolo, wa waa shia Nyiɛkpɔɔ, ndee tra da, ndee mbe yira ka na ki nyini da. La, e ti mbe e “Ɛnhɛɛn” pe ɛnhɛɛn, mbe e “Ɔɔhɔn” pe ɔɔhɔn, mbe wa waa kɔɔ to Nyiɛkpɔɔ kpra kuun kre nu.
13 E waa wa kanyana nu ree? Kena e ti mbe u Nyiɛkpɔɔ tali. Na waa wa e nu a u yiɛ shɔ kre, ufun u mɛɛ kɔ mbe Nyiɛkpɔɔ ŋga.
14 A na waa wa e nu na yaa kre, ufun u sumifɛɛnlɛ pre loplombo yeeri, mbe pe paan nyiɛtali mbe u ŋga, mbe u fa na simi ni o Tafun mɛɛ ni.
15 Shɔnlie nyiɛtalaa we ti mbe yaŋu wre saanla. O Tafun wre we u ŋga faŋga, na u sisam ka pe kuraa kre, we ki ti mbe u kɛ.
16 Kena e na eyɛ sisam yuu eyɛ pan. E na nyiɛtali e na eyɛ kaan, kre ee saanla. Jaŋgaa wa lewo ŋmba u fraka nyiɛtalaa nu, na tnumu tuni.
17 Lewo na wi Elijah chɔɔ na wre lɛ. A wra nyiɛtali kpɔɔ na nyiɛ waa pan tra na, a nyiɛ yire nsra pan yɛlɛ taarɛ na nyiɛpɔ kɔɔnanu.
18 A wra ndru mu nyiɛtali na, a nyiɛ yire na ndru mu pan. A yirɛ kro na ndru mu nyu tra na.
Ŋmaashɔmu Na Ki Dwamu