Ŋunɔ Na Kakrɔɛ
4
Ŋgi ki paan ŋunɛ na kakrɔɛ nyjɛ ni e nu ŋga hin? E sisam niŋge nyjɛ yii wa e lam, na wii e nu kre yi paan na yi ni.
2 E yirɛ chaa, la, e na yi ta, ki tia e na eyɛ kuu. E yiɛ nyinai yirɛ na, a yaa jaa yi ta, ki tia e na kakrɔ na ŋunɔ wii. E na yirɛ nyjɛ e chaa ta, ŋgi na, na e n na Nyiɛkpɔɔ tali.
3 Na e u tali kuraa kre, yaa yi ta, na e na u tali kolo ŋga wre titi chaa na, la, yire titi yɛshɔɔrɔ kolo yirɛ nyjɛ e chaa e u tali.
Nyiɛkpɔɔ Loŋgo
4 Ayɛtefɛɛnlɛ, e n chin na, na wa taa waŋgra yirɛ kro, we kaari Nyiɛkpɔɔ loŋgo ree? Kena ŋmba u chaa mbe taa waŋgra yirɛ kro kre, u uyɛ pini Nyiɛkpɔɔ loŋgo.
5 Yaa shia punu mbe jawa na Nyiɛkpɔɔ kee kre pe nyunɔ mu tɛɛ kre, na kee waara yi. Mbo, “Ŋumu ŋmba Nyiɛkpɔɔ tun na u paan tni o nu kre, Nyiɛkpɔɔ chiin pan u chaa mbe o tni.”
6 La, Nyiɛkpɔɔ o dumi kpɔɔ, imi na pe ki nyunɔ Nyiɛkpɔɔ hlɛ kre nu mu tɛɛ kre, mbo,
“Mblɛ pe peyɛ kpɔɔri pre,
Nyiɛkpɔɔ pe toni kolo,
na mblɛ pe peyɛ nyjiri,
pre dumi kpɔɔ.”a
7 Kena e eyɛ nyjii e Nyiɛkpɔɔ ŋga, e Sutna tɔ kolo, mbe u fɛ mbe laa e na.
8 Yire yiɛnyumufɛɛnlɛ e fɛ e pan Nyiɛkpɔɔ jaara, we mbra e na. E e kɛnyi je e yili nɛɛrɛ nu, e sisam kee wɔ e jawala nu.
9 E ti mbe e yiɛ je, mbe e na fooro lii, mbra nyɛni, e ti mbe e titɛɛrɛ kaari nyɛnɛɛ, mbe e yɛshɔɔrɔ kaari fooro e sisam kepele ndra na.
10 E eyɛ nyjii e Nyiɛkpɔɔ ŋga, we e kpɔɔ.
11 Ni wolo, wa waa shia paara mbe u ŋmbrɔ taan, ŋmba we paara mbe u ŋmbrɔ taan, ndee mbe u ŋmbrɔ gbun na pimi ni kre, kena ufun paara na Nyiɛkpɔɔ mbra yire taanla, na chaa mbe nyina u kee kre wɛ mbra yire na. La na e paara na mbra yire taanla kre, kena e n na lii mbra yire na.
12 Nyiɛkpɔɔ chiin u u mbra kaan, a wre chiin we jaa pimi kun. Wre chiin we jaa o ŋmaa shɔ, ndee na u chaa mbe u o kla. Kena kolo ŋgi ni ŋu nyi mbe jaa mu ŋmbrɔ gbun na pimi ni hin?
Lewo Ŋmaa
13 E le, yire mblɛ e yuu na aŋga, ndee baŋga oo sɛ chia ŋga imi sembremu na, oo li yɛlɛ, mbe tni wa mbe jafa li mbe swa ta kre,
14 e chin imi na nyiŋge we see? E n chin na pan e ŋmaa nyi na bnimi nyu sugbeŋge yi ree? Na ki wo maa, to na ki ndru mu fun yiɛ na.
15 Kee ŋga ki fna mbe e na yuu yi na, “Na o Tafun li ki na, oo ŋmaa ta, mbe yira ŋga imi sembremu pe.”
16 La, fuŋgaami ŋga, e ndra tna e na, a e na eyɛ kpɔɔri, a kre kpɔɔmu ŋga, ki pe Nyiɛkpɔɔ pan sisam.
17 Kena lewo ŋmba u chichie chin a u n ki pe kre, ki pe sisam mu u ŋga.