Lewo Fna Mbe U Paaraa Dɔɔta
3
Ni wolo, yaa ti mbe e nɛɛrɛ pe nyinafɛɛnlɛ. Ŋgi na hin? Wre mblɛ o leele nyina kooloe nyjɛ na ki fna pe tro kre, oo kee nɛɛrɛ nyu wɔ Nyiɛkpɔɔ yiɛ imi na ki fna.
2 Ŋgi na hin? O kro punu kooloe tataara na, a ŋmba u pe lewo chiriri wi lewo ŋmba wraa punu u paaraa nu, kpra na, wre u jani na uyɛ dɔɔ taa kooloe kro na.
3 Pan ki nyi, na lewo chaa mbe soo pe imi u chaa kre, krafi we le u nyu na, mbe krafi kre ti u sɛ chichie.
4 E yiɛ wa e krɔɛ kpɔɛ nyjɛ yi tro epo yiɛ na ŋga le, imi na yi kpɔɔ kpɔɔ mu da, a fuflɛ kpɔɔ ja na yi ŋunɔ, la, yiɛ kna yirɛ fiɛn fiɛn wa yi pan, a yi ŋmaafɛɛnlɛ pre na teeri na yi ŋmaai na shie mna pre titi chaa.
5 Pan chɔɔ lewo ndile ŋga kii wa u nyuu ŋga nyi na, pan ki nyi fiɛn imi, a nde ki kekpɔɛ yuu. A e le, imi na nyaa kpɔɔ mu da kpan, kanhun fiɛn we jaa ti ki shɔ.
Sisam Ŋga Ndile Pini
6 Pan lewo ndile nyi na kanhun yi u nyuu, kre nu waŋgra sisam kee kro ŋga yilii na paan, a kii wa tnihaa ni o nu, mu na paan sisam ni o tnimu nu, mu na nɛɛrɛ teeri na o toni. A ndile sisam kee kro Sutna lawee ki yiri na paan.
7 Lewo jani na yurɛ nyina kee, puɛ yurɛ, hanyiɛlɛ, gbun fulo yurɛ, na lɔɔ yurɛ kro,
8 la, lewo wa jaa u ndile ŋga kii wa u nyuu nyina ŋga ki fna ki pe. Ki pe yira ŋga ki sisam pini nyjila kro nu, kraa wuu ndee mbe jaa tni komm, ki pe yira sisaa ŋga ki paan na kumu ni.
9 Lewo ndile ŋga, kre ni u o Tafun na o Lɛ Nyiɛkpɔɔ kaan mɛɛ, kre ni chɔɔ u leele mblɛ Nyiɛkpɔɔ gbeele wre titi wrumu na kre tɛɛlɛ.
10 Nyu ŋga lam ndile nyi kre, bawa fɔɔn na chichie yilii na paan. Ni wolo, ki n fna mbe pan ma.
11 Ŋgi na hin? Nyumu taan na nyumu susrom wa jaa chaa yili blo nunu nu.
12 Ni wolo, fig tiŋge wa ja Olive sɛ, a Olive tiŋge wa jaa fig sɛ. Pan chɔɔ ma jaa nyumu chichie ko mbe yili nyumu fɔɔn lawee.
Kachindɛ Chiriri
13 Na waa wa e nu mu kala chin kre, e ti mbe u kepele chichie na u nyjiimu ki nyina na kachiŋu wi.
14 La, na ufun lam sro, a uu wa na nyibinyiɛ sisaa ni, na uyɛ kpɔɔ kre, kena waa na u gbun sini mbra kala fnɛ kpra kre yiɛ.
15 Ŋgi na hin? Kre kachindɛ ŋga sembremu, Nyiɛkpɔɔ pan ma ki yiri, waŋgra kachindɛ yi, Sutna pan ki yiri.
16 Mna nyibinyiɛ sisaa nyi, a ndro kro na wii wre nunu yira na kre, mu chin na nyu nunu n wa bawa, sisam nyininyini kro mu yi nya wa.
17 La, kachindɛ ŋga ki yiri Nyiɛkpɔɔ pan kre pe cheche, na wejinyiŋge chaa, na ki yɛ nyjiri, na lewo chaa, mu lewo fooro chin tataara, na kee chiriri pini nyjila kro nu, a kra ki jawala pe shiin, mbra lewo fana.
18 A mblɛ pe paan na wejinyiŋge ni kre, pie wejinyiŋge sɛŋgɛ luu, a sɛŋgɛ ŋga ki pe cheche pie kun.