Koroo
13
E eyɛ kori na nyjɔɔlɔ na chinlɛ lɛ yire nyjila kro nu.
2 E na fumblɔ yiri, e na pe le chichie. Ŋgi na hin? Kre kepele ŋga na plɛ na yire mna nyjeeri bitumblɔ le, a pe nsra chin na bitumblɔ lɛ.
3 E na mblɛ pe le nyuŋgo pre sɔɔnri, e pe na yire na pre ee wa nyuŋgo wa. A mblɛ pe kala nyaa kre, e na pe sɔɔnri, mbe pe kanyana pe e kanyana.
4 Yaa leŋgeere le yira fiɛn. E ki ŋga buuro, mbe wa waa shia leŋgeere tɔ na nɛɛrɛ ni. Ŋgi na hin? Tiɛrifɛɛnlɛ, na mblɛ pe leŋgeere klai pre krɛrɛ Nyiɛkpɔɔ we pe ndie tini.
E Taa Nyiɛkpɔɔ Kro
5 Yaa ti swa nyibinyiɛ pan e tnimu nu. Ŋga ee ta kpan, e ti mbe kre e yiɛ nyi. Ŋgi na hin? Nyiɛkpɔɔ yo mbo,
“Mba mu ti ma,
a mba laa mu kro fio.”a
6 Kena e ti mbe o gbun ta,
mbe yo na,
“Ni Tafun wre wi ni yafun.
Ki tia ni n na fiɛ,
ŋgi lewo na nyjuro we jaa ni pe hin?”b
7 E e loplombo mblɛ pra Nyiɛkpɔɔ ketaan kre yo e pan pre jawa, e pe tnimu ŋga nu pra nyi mna chin mu ku ku kre sɔɔnri, e pe shɔnlie tuan.
8 Yesu Kristo wre, imi na wra nyi aŋge kre, pan u nyi aŋga, a pan we kro nyjila kro nu.
9 Yaa shia ti mbe kee fɔnyi yɛ e jawala laa kpra kolo kre na. La, ki fna mbe Nyiɛkpɔɔ dumiɛ kre e lolonyi ŋga faŋga, ki n pe aliire mbra tataara kooloe na. Leele mblɛ pra taa yire mbra yire na kre nsra tnu ka ta.
10 Srawɔfɛɛnlɛ mblɛ praa tnumu tuni Judae Suminyuŋgo nu pre, pe n kolo ni na pie sra ŋga Yesu wɔ kre yaka le nyuu.
11 Judae srawɔfun lopom titi wre naa lee na yurɛ nyimi ni Cheche Lawee Titi kre nu, na sisam sra woni, la, yurɛ pre kaara yire rɛ, chia kre mbookrɔ praa yire sroi.
12 Kre kolo na chɔɔ Yesu na tro mna sɛ ku chia kre mbookrɔ, mna u nyimi tɛɛ mu leele sisam laa pe na.
13 Kena e ti mbe o sɛ u pan chia kre mbookrɔ, mbe nyifɛɛrɛ o kro gbo.
14 Ŋgi na hin? Chia kpiki n wa o pan tra ŋga na, la, chia ŋga kie pan kre na o yiɛ nyi.
15 Kena e ti o yire Yesu na mbra Nyiɛkpɔɔ kaan mɛɛ nyjila kro nu. Kre yi leele mblɛ pra taa Yesu na pre sra ŋga praa woni na Nyiɛkpɔɔ kaan.
16 E na chichie pini, e na eyɛ kee yirɛ, ŋgi na hin? Kre sra nyjɛ na Nyiɛkpɔɔ yiɛ shɔ.
17 E ndie tɛɛ e loplombo pan, e na lii pe nyu kee na. Ŋgi na hin? Pre kɛɛ e ŋmaa nyi, a pra e le, a pie sɛ pe tnumu kro nyu wɔ Nyiɛkpɔɔ yiɛ. Kena e ndie tɛɛ pe pan, mbe pe pe tnumu tun imi na ki fna. Na e pe kee ndru kre, pie pe tnumu tun yɛshɔɔrɔ ni, na kre ma, pe yiɛ we je.
Nyiɛtalaa
18 E na nyiɛtali e na o kaan. O jawala saan o na, ŋgi na hin? Nyjila kro nu o chaa mbe kee chichie pe.
19 A ni e tali tataara, mbe e na nyiɛtali mbra ni kaan, na Nyiɛkpɔɔ we ndruu ni tun e pan wa yaari.
Klaa
20 Wejinyiŋge Nyiɛkpɔɔ wre, ni u tali na e kaan, ŋmba wra yire nyu nunu pee nyimi ŋga kii wa nyjila kro nu kre na, mna o Tafun Yesu Kristo wre nyi mu yili kuulo nu, na u paan pe o lefun kpɔɔ wre.
21 Wre wra yire Yesu Kristo na mna e pe chasi, mbe e na ŋga u chaa, na ŋga na u yiɛshɔ pini. Wre Yesu Kristo wre wo yi yiɛnyiŋge nyjila kro nu. Ami.
Nyukɔɔrɔ
22 Ni wolo, ni e tali, mbe e ndie tɛɛ mbe ni kee nyjɛ ni yuu na e leni gbeŋmba ŋga loo. Ŋgi na hin? Ni hlɛ ŋga ni e nyunɔi kre n tnu.
23 Ni chaa mbe e chin na pe o ŋmbrɔ Timothy wre wɔ nyuŋgo. A na waa pan yaari mu ni da kre, mi na wre we chaa mbe pan.
24 E e loplombo pre kro, na Nyiɛkpɔɔ leele pre kro shaari o pan. O wolo mblɛ pe yiri Italy na pre e shaari kro.
25 Yire na Nyiɛkpɔɔ dumiɛ e tni kro. Ami.