Yesu Wi Shɔnlifun Chichio
12
Kena ŋga oo wa na dansiɛfɛɛnlɛ tataara mblɛ nyini ni, a pe fɛ mu o kun ŋga, e ti mbe o yirɛ, na sisam nyjɛ yie o yii, mbe o tɔ kolo yire kuun wa, mbe oyɛ yii mbe tafɛŋgɛ ŋga kii wa o yiɛ kre fɛ.
2 Mbe e ti mbe o oyɛ wru mbe taa Yesu na. Wre na ki yire a o shɔnlie ta mbe sɛ su ki nyukɔɔrɔ na. Wre Yesu wre wra yɛshɔɔrɔ ŋga kraa wa u yiɛ kre le, mna frɔ kanyana kumu kaan kre na, a u nsra nyifɛɛrɛ wru mu pe yaka, mna sɛ tni Nyiɛkpɔɔ ŋujɔɔn kre kalie.
U Kanyana Wɛ O Wo Na
3 E Yesu ŋmba wra kanyana tataara yire nya, mna frɔ ta wre sɔɔnri, imi nyini sisampefɛɛnlɛ na u pra mu da. Kena yaa shia ti mbe e sɔɔnrɔ ku, mbe e ndru kro.
4 Ŋgi na hin? Mu yire ŋga e wii na sisam taanla, e n ta mu wi mu da mna pe yire e gboo na tun.
5 Kee nyjɛ Nyiɛkpɔɔ na yo mna e le gbeŋmbaa na u biile lɛ yire kre, e yi fɛɛ ree? Mbo,
“Ni biblɔ, na ni mu ndie tinii kre,
maashia ki le kee fiɛn,
a na ni mu nyina sisaa ŋga mu pe,
maashia ti mu yiɛ je.a
6 Ŋgi na hin?
Lewo ŋmba ni kori wre,
wre ndie ni tinii,
na ŋmba ni yeeri ni pɔ wre,
na u gbuun fwa ni.”
Nyiɛkpɔɔ Koroo Nu Kanyana Yiri
7 Na e lɛ wre e ndie tinii, e na kala nyaa kre, e frɔ, ŋgi na hin? E kanyana nu Nyiɛkpɔɔ e nyina mbe e chin na u biile lɛ yire. Biblɔ ŋmbi uu wa, a u lɛ n da mu u ndie tini tun hin?
8 Na u n e ndie tini imi na u u biile pre kro ndie tinii kre, kena u lɛɛ lam biile ma yire.
9 O lɛɛlɛ mblɛ pee wa tra mna pre, pe o ndie tinii. A na pe o ndie tinii kre, o pe kaan buuro. Kena yira ŋgi kie ti mbe waa o lɛ Nyiɛkpɔɔ wre fiɛ kpɔɔ, mbe ŋmaa ta hin?
10 Nyjila chiɛri ka ni o lɛɛlɛ mblɛ pee wa tra mna pre teeri na o ndie tinii imi na pe chaa. La, Nyiɛkpɔɔ rɛ, wre ki pini o chichie ŋga oo ta na, imi kie pe mbe o pe cheche na wre wi.
11 Nyjila ŋga nu pe o ndie tinii kre, o yiɛ na shɔ, la, ndie tiniɛ kɔkro kre, mbe o fraka, mbe wejinyiŋge ta.
Yɛshɔɔrɔ Na Nyjiimu Na Dɔɔtaa
12 Kena e ti mbe e kɛnyi, na e kosie nyjɛ yi gblɛ e na yire sheli,
13 mbe e na nyaari kooloe nyjɛ yi fraka na, imi kie pe mbe mblɛ pe fuuru pre saanla mbe faŋga ta.
14 E gbeŋmba na yire na ndro kro we tni wejinyiŋge nu, mbe pe cheche e tnimu nu. Ŋgi na hin? Ndro n wa mbe o Tafun wre nya, fɔna u pe cheche.
15 E dɔɔta mbe wa waa shia laa Nyiɛkpɔɔ dumiɛ kre kro. E eyɛ le chichie, mbe sisaa waa shia wa pe na imi tiŋge sisaa fini tinyi nu, mbra yi ŋmbilɛ klai kre yi.
16 E dɔɔta mbe wa waa shia na tiɛri, ndee mbra waŋgra kee pini mbe Nyiɛkpɔɔ fɛɛ, imi na Esau na pe kre. Wre wra yila sro na mna u semu lopom prɛ.
17 Yire titi e chin na kre kee ŋga kɔkro kre, ŋga wraa u lɛ dwamu chaa kre, u n nsra ki ta. Wra kna mu kro tɔ, a na wa jaa u jawala chinɛ na. Kra u shian a wra nyɛni tataara.
Sinai Na Zion Nyuɛ
18 E n pan, imi na Israel leele na pan nyua ŋga na ee jaa kɛ taa kre jaara. Sinai nyua kre, kre kraa nyini kanhun, mu wɔ kprikpri, a fuflɛ naa gbuun ki na,
19 a bnɔɛ badɛnyi naa tini ki na, a leele paaraa naa wa ki na. Ŋga Israel leele pre na yi loo ma kre, pe nsraa chaa yi loo na.
20 Kee nyjɛ praa ndru yire na wɛ pe na mbo,
“Hali na yurɔ gbun nyua kre na,
pe u waari na dnɛ ni mbe gbo.”b
21 Lawee kre na pe fiɛrɛ ni mu tro,
a Moses titi na kna mbo,
“Mi titi, ni fiɛ,
ki tia ndaa seeri.”c
22 La, yire rɛ, nyua Zion jaara e pan. Nyiɛkpɔɔ ŋmba u le wre chia e pan, nyjeeri Jerusalem kre, mna nyjeeri bitumblɔ kagbenyi kagbenyi nyi kre.
23 E pan mu chaa Nyiɛkpɔɔ biile mblɛ u klu mu se pre yɛshɔɔrɔ fnindoo, pre mɛɛ u nyunɔ nyjeeri wa. E pan Nyiɛkpɔɔ ŋmba u leele kro kpra kuun kre lawee. E pan leele mblɛ pe fraka, a Nyiɛkpɔɔ pe pe cheche pre ŋumu lawee.
24 E pan Yesu, ŋmba u yire nyu nunu fɔŋgɔ na, mu yire lewo na Nyiɛkpɔɔ lalaa wre jaara. E pan nyimi ŋga pe nyaara, a kra kee chichie pini mu wɛ Abel nyimi na kre lawee.
Ki Shia Na Oo Ndie Tɛɛ
25 Kena e eyɛ le chichie, mbe yaa ŋmba u paara wre kee kre je. Leele mblɛ pra jaari tra mna kre na kee kre loo, mna ki je, a kra tia pe nsra shɔ u krɔkuɔn kre nu. Kena wre mblɛ pe yire nyjeeri na jaari kre, na o kee kre je kre, waa shɔ u kɛɛ.
26 Ŋga wra yire Sinai nyua kre na mna paara kre, tra na seeri. A fuŋgaami, u ki yo mu tɛɛ mbo,
“Mbe tra nyaara haŋa.
A tra chiin ma, la, nyjeeri we chaa.”d
27 Mbe ki nyaara haŋa, kre kee ŋga nyina chasi na, yirɛ nyjɛ u wa yire kro, we yi nyaara, mbe yi kla, kena nyjɛ wa nyaara kre, yie kro.
Mboo