3 Shɔnlie ki tia o ki nɔɔloo na, Nyiɛkpɔɔ, u nyu kayolo na wra yire mna waŋgra ŋga wa, a ki tia o chin na yaka nsraa wa jle gbamm kre, a wra chin mu yirɛ nyjɛ o nyaa ŋga kro gbeele.

4 Abel shɔnlie kra tia u sra ŋga wra wɔ mu Nyiɛkpɔɔ ŋga kre na nyu mu wɛ u nyjɔ Cain wo na. Abel shɔnlie kre na Nyiɛkpɔɔ na yire, mna u le na u fraka. Ŋgi na hin? Nyiɛkpɔɔ na u sra kre shɔ mna u pni. Abel ku, a u shɔnlie kre ndra, na uu wa na paara tɛ.^a

5 Enoch shɔnlie kra tia Nyiɛkpɔɔ na u wru mu sɛ nyjeeri, a u nsra ku, a ndro nsra u nya. Ŋgi na hin? Nyiɛkpɔɔ wra u bali. U yiɛ na shɔ u na, a wra chin mu u bali.

6 A na shɔnlie n wa kre, Nyiɛkpɔɔ yiɛ wa jaa shɔ lewo na. Ki tia ŋmba we pan Nyiɛkpɔɔ jaara kpan, u fna mbe shɔ mbe li na Nyiɛkpɔɔ wa, a mblɛ pe u haa chaa titi kre, u pe kaan fɔtɔɔrɔ chichie.^b

7 A Noah shɔnlie kra tia ŋga Nyiɛkpɔɔ na u jaari kee nyjɛ u n da mu nya tun na kre, a wra ki loo, mna ki shɔ mu li, mna krɔ badaaŋga ka pe, mna u sele leele kro ŋmaa shɔ. Kra tia wra waŋgra leele kro gbun na pimi ni, a Nyiɛkpɔɔ na u wɔ a wra fraka, u shɔnlie kre ndra na.^c

8 Abraham shɔnlie kra tia ŋga Nyiɛkpɔɔ na u yeeri, mna yo u sɛ tra ŋga nyu wra yo na we u ŋga kre na kre, a wra ki loo mna yili u chia na shie, a nde u nsra chin mna u shie.

9 U shɔnlie kre ndra na, wra sɛ tni tra kre na na fuŋu wi. Bawa wre na u leele Isaac, na Jacob, mblɛ pra Nyiɛkpɔɔ nyu yoo kre ta na kre, na tni yonyi nyinyi nu.

10 Abraham na nyjɛ krɛrɛ pe, na Nyiɛkpɔɔ wre titi chia ŋga u sin kre sri, kre chia kre wa jaa kla fio.^d

11 A Sarah shɔnlie kra tia wra ja mna siire ta, nyjila ŋga ni wra lɛ mu tro biseere na. Ŋgi na hin? Wra ŋmba wra nyu yo u pan wre shɔ mu li, na kprafun wi.

12 A Abraham na lɛ mu da kumu na, a nde wre blɔ ŋmba nu sele tataara yili, mu nɛɛ tataara na wɔɛlɛɛ, na epo nyu tanyiɛ yi, a pia jaa tɔɔnri kre.

13 Shɔnlie kre nu pre leele mblɛ krɛrɛ na ku ku, a pe nsra yirɛ nyjɛ Nyiɛkpɔɔ na yo we pe ŋga yire ta, la, pra shɔnlie tɛɛ mna nya lee, a kra tna pe pan, a praa yuu na fumblɔ lɛ, waŋgra ŋga nu.

14 Mblɛ pe yire kee nyjɛ yuu pre nyina na, pe yiɛɛ wa pre titi waŋgra na.

15 Pe nsra tra ŋga na pra yiri mu pan kre kee sɔɔnri. Na pra ki sɔɔnri, pie naa chaa mbe ndru pe kro.

16 Waŋgra chichie ŋga kii wa nyjeeri kre na pe yiɛ na nyi. Ki tia ki nsra pe pe nyifɛɛrɛ na pie Nyiɛkpɔɔ yeeri pe Nyiɛkpɔɔ. Ki tia wra chia gbeele pe pan.

17 Abraham shɔnlie kra tia ŋga Nyiɛkpɔɔ na u penle kre, a wra u pɔ Isaac bali na shie mbe sɛ sra wɔ. Abraham pan Nyiɛkpɔɔ na u nyu kre yo, a wra ki loo chɔɔ, mnaa shie mbe sɛ u pɔ nunu chom wre tɛɛ mbe sra wɔ.

18 Na Nyiɛkpɔɔ klu mu yo u pan mbo,

20 Isaac shɔnlie kra tia wra u biile Jacob, na Esau ŋga mbakɔ dwamu.^f

21 A Jacob shɔnlie kra tia ŋga wraa paan mbe ku kre, a wra Joseph biile shiin pre dwan, mna ndra soo u kanyie na, mna Nyiɛkpɔɔ ŋga mɛɛ.^g

22 Joseph shɔnlie kra tia ŋga wraa paan mbe ku kre, a wra Israel leele yilee ŋga pie yili Egypt tra nu kre kee yo, mna imi pie u gboo pe krɛrɛ nyina pe pan.^h

23 Shɔnlie kra tia ŋga pra Moses se kre, a u lo, na u lɛ na sɛ u ndra nyiɛpɔ taarɛ. Pra nya na wra nyu, a pe nsraa fiɛ na pie ŋunu wre mbra yire wra le yire taan.

24 Moses shɔnlie kra tia ŋga u yiɛ na kun kre, a u nsraa chaa mbe pe u yeeri ŋunu Pharaoh nana.

25 La, wraa chaa mbe kala nya Nyiɛkpɔɔ leele pre ni, mu wɛ ŋga we yɛshɔɔrɔ tɛɛ mbe tni sisam nu nyjila chiɛri nu na.

26 Wra Kristo kanyana kre wru mu pe yira kpɔɔ mu wɛ Egypt yirɛ chichiele nyjɛ we ta yire na. Ŋgi na hin? U yiɛ naa wa mbakɔ fɔtɔɔrɔ ŋga we ta na.

27 A Moses shɔnlie kra tia wra yili Egypt tra nu, a u nsra ŋunu Pharaoh krɔkuɔn fiɛ, a u nsra ndru u kro, mna uyɛ pe na u Nyiɛkpɔɔ ŋmba pe n na yaa nyini wre nya.

28 A Moses shɔnlie kra tia wra ja mna Klɛntro ble yire li, mna nyimi nyaara Israel leele krɔɛ na, mbe nyjeeri bituŋu ŋmba wraa paan mbe yurɛ, na leele bijloe kro gbo kre, mbe wa Israel wolo pre gbo.

29 A shɔnlie kra tia epo nyiɛ kre na peeri, a Israel leele pre na nyaari tra waa na mu tro ki lam. A ŋga Egypt leele pre naa chaa mbe tro na kre, epo kre na pe li kro.

30 A shɔnlie kra tia ŋga Israel leele na fɛ mna Jericho chia kre kun ble kɔɔnashin kre, a mboo ŋga pra sin mu chia kre fɛ mu kun kre na juari.

31 Rahab na pe tɛtiɛrɔɔ, la, wra leele mblɛ Israel leele na tun, a pra ndra mu pan chia lehaa pre shɔ mu tɛɛ, a u shɔnlie kre na tia ŋga praa leele mblɛ pe nsra Nyiɛkpɔɔ shɔ mu li pre kuu kre, a pe nsra wre gbo ka.ⁱ

32 Ni plɛ nyini mbe ya ree? A na nyjila n wa mbe ni taa tɛɛ mbe Gideon, na Barak, na Samson, na Jephthah, na David, na Samuel na Nyiɛkpɔɔ keenyanyofɛɛnlɛ pre kee yo.

33 Pre pra yire shɔnlie na mna ŋunɔ wi na waŋgrɛ tataara ni mna pe ja. A pra kee nyjɛ yira fraka pe, mna Nyiɛkpɔɔ nyu ŋga wra yo kre ta, mna tia blɛkpɔɛ na nyu nyaala mu pra,

34 a kanhun nsra ja mu pe plɛ shɔ, a plɛ na ja mu yili brɔfiɛn yiɛshiin kɛɛ. Pe nsra sheli, a nde praa faŋga taa ŋunɛ nu, na pe loŋgoolo tataara jani.

35 A chiɛlɛ plɛ shɔnlie saara na, pe sele wolo plɛ na ku, a pe shɔnlie na tia pra nyi. A plɛ na yila ŋga pie ku, mbe kɔɔ nyi mbakɔ mbe ŋmaa chiriri ta ndra na, pra tia pra pe fiŋge mu pe gbo gbo. Pre titi nsraa chaa mbe pe pe wa.

36 A pra plɛ tɛɛlɛ, mna plɛ gbun, mna plɛ pɔ mu sɛ pe le nyuŋgo.

37 A pra pe plɛ waari na dnɛ ni, mna plɛ le kanyana nu mu pe penle, mna plɛ yɔɔlɛ shiin shiin na sraraa ni, mna plɛ gbo gbo brɔfiɛn yiɛshiin ni. Shɔnlifɛɛnlɛ pre plɛ naa sikaala, na mbaala hlɛ toni na kila na tro, mna shian imi na ki fna, mnaa wejiwrɛ, na kanyana tataara nyaa.

38 Pre leele mblɛ, waŋgra nsra tna pe na. Pe nsraa titɛɛ ni na jiin. Tablɔ trɛ, na nyuɛ na praa tro, na jiin dnɛ weele, na tra lam weele nu.

39 Pre leele mblɛ krɛrɛ na yire shɔnlie na, mu kee pe mu tɛɛ, nde pe nsra Nyiɛkpɔɔ nyu ŋga wra yo mu tɛɛ kre ta.

40 Ŋgi na hin? Nyiɛkpɔɔ na o jawa na jawala chiriri ni, na we wre na pre leele mblɛ kee o yuu ŋga kro chaa, mbe o pe chichie.