Moses Nyjila Sra Wɔɔ
10
Moses mbra yire ma yirɛ chichiele nyjɛ yie pan yire. La, yirɛ chichiele nyjɛ Yesu naa paan mbe o ŋga yire yi wru. Ŋgi na hin? Sra nyjɛ praa woni nyjila kro nu yɛlɛ nyini kre, yi nsra ja mbe mblɛ praa wa mbra yire jaara pre pe cheche.
2 Kena na mblɛ praa Nyiɛkpɔɔ sumi mbra yire kolo na kre na pe cheche, a pe sisam na laa pe na kre, kaa pe chin na pe n sisam pimi ka li na, kaa sisam sra ka n wa mbe praa woni na.
3 A nde pra je na sra yire woni yɛlɛ nyini, na pe sisam sɔɔnri.
4 A nablɛm, na sikaala nyimi wa jaa sisam jee laa lewo na fio.
Nyiɛkpɔɔ Chaa Mbe Lewo Uyɛ Wru Mbe Sra Wɔ
5 Kre ndra na, ŋga Yesu na pan waŋgra nu kre, wra yo Nyiɛkpɔɔ pan mbo,
“Mu n na yurɛ,
na yirɛ srawɔɔ chaa,
la, mu ni ŋga wejiŋge.
Ŋgi na hin?
6 Yurɛ mblɛ pe sroi sragbuɛnlɛɛ na,
na sisam sra nyjɛ pe woni yire,
mu yiɛ n shɔ yi na.”
7 Ki tia ni yo na,
“Mi wi kre Nyiɛkpɔɔ,
mbe ŋga mu chaa kro pe,
imi na mu ki nyunɔ mu tɛɛ kre.”a
8 Ŋga wra yo na u n na yurɛ, na yirɛ, na yurɛ sro, na sisam srawɔɔ chaa, imi Moses mbra nyina kre,
9 ki tia wra yo mbo, “Ni we Nyiɛkpɔɔ, ni pan mbe ŋga mu yo ni pe kre pe.” Kre kee ŋga ndra na sra lɛɛlɛ yire kro Nyiɛkpɔɔ yi wa, mu Yesu srawɔɔ kre le yi titɛɛ.
10 Ŋga Yesu na Nyiɛkpɔɔ chaara pe kre ndra na, ki tia o kro pe cheche u wejiŋge ŋga wra wru mu ŋga gbee nunu chom kre na.
Yesu Sra Wɔ Gbee Nunu Chom
11 Judae srawɔfɛɛnlɛ naa pe tnumu tuni blenyini, na sra nunu kre woni nyjila kro nu, la, kre sra kre wa jaa sisam laa lewo na.
12 Yesu wra sisam sra wɔ gbee nunu chom, a kii wa nyjila kro nu, ŋga wra kɔ kre, a wra sɛ tni Nyiɛkpɔɔ kalie.
13 Bawa u nyi mu tni fuŋgaami, na sri mbe sɛ su nyjila ŋga Nyiɛkpɔɔ we u loŋgoolo yii mbe le u jaŋga tapan.
14 A u sra ŋga u wɔ gbee nunu kre tia mblɛ u pe cheche mu yili sisam nu pre nyu nyjila kro nu.
Nyiɛkpɔɔ U Mbra Le Lewo Loloŋgo Nu
15 Kpra Ŋumu wre na u dansiɛrɛ li,
imi na o Tafun Nyiɛkpɔɔ,
na klu mu yo kre, mbo,
16 “Nyu nunu ŋga mbe pe na pe ni
ble nyjɛ yi paan yire nu yi kre,
mbe ni mbra le pe lolonyi,
na pe jawala nu.”b
17 A wra ndru mu yo na mbo,
“A mba pe sisam sɔɔnri na.”c
18 Kena na kre sisam tinkɛɛ ŋga sembremu waa pan kre, mu chin na sisam srawɔɔ n wa na.
Yesu Na Oo Yire Mbe Sɛ Nyiɛkpɔɔ Yiɛ
19 Kena ni wolo, o gbun ta mbe yire Yesu Kristo nyimi yire na mbe le Cheche Lawee Titi kre nu.
20 Yesu u wejiŋge tɛɛ mu kolo fɔŋgɔ, ŋga ki pe ŋmaa kolo kre nyaa mu o ŋga, mbe o le Cheche Lawee Titi kre nu.
21 Kena oo wa na srawɔfun kpɔɔ titi ni, a wra Nyiɛkpɔɔ katoo kre le.
22 E ti o sɛ Nyiɛkpɔɔ jaara na kpra, na shɔnlie gbiŋmbi ni. Ŋgi na hin? Yesu nyimi yire sisam jawala wɔ o nu, mu o weli nyumu chichie ni.
23 Kena e ti mbe o o kaanhaa ŋga o shɔnli kre yii kɛ shiin, mbe waa ndru kro na, ŋgi na hin? Nyiɛkpɔɔ ŋmba u nyu yo o pan wre pe kprafun.
24 Kena e ti mbe oyɛ kee oyɛ shian, mbra yaa oyɛ na, mbe oyɛ kori, mbra chichie pini.
25 Mbe e ti mbe o na fni na oyɛ ni, mbe waa na pini imi na plɛ pini kre, la, mbe o na oyɛ leni gbeŋmba nyjila kro nu. Ŋgi na hin? O chin na o Tafun ble kre mbra mna.
26 A na o ta mu kpra kolo kre chin, mu tuwi na sisaa pini kre, kre sra n wa ŋga kie ja mbe o sisam laa o na.
27 La, ŋga ki kro yi na, oo na Nyiɛkpɔɔ kprakuɔn kanhun ŋga ki paan mbe Nyiɛkpɔɔ loŋgoolo kla kre sri.
28 Nyjila ŋga ni Nyiɛkpɔɔ na Moses ŋga mbra yire kre, na ndro fun mbra yire na, praa yire leele shiin, ndee taarɛ dansiɛrɛ na, mbe ufun gbo, a fooro chiɛn nsraa wa ki nu.
29 Kena ŋmba u Nyiɛkpɔɔ Biblɔ wre yiɛ taan, mu na paara na dumiɛ Ŋumu wre tɛɛlɛ, mu na nyimi nyu nunu pee ŋga ki ufun wre sisam laa u na kre jawa na yira waara yi kre, fɔtɔɔrɔ ŋgi sembremu ki fna na u ni hin?
30 O kro Nyiɛkpɔɔ ŋmba wra kee ŋga yo wre chin, wre wra yo mbo,
“Mi ni sisam teeri na sisam fɔlɔ toni,
a nii wa mbe sisam fɔtɔɔrɔ ŋga tɛ.”
A wra ndru mu yo na mbo,
“Mi Nyiɛkpɔɔ, mbe ni leele kpra kun.”d
31 Ki pe fiɛrɛ kee kpɔɔ mu tro, na mu to Nyiɛkpɔɔ ŋmba u le wre kɛɛ.
Frɔ
32 E jawa, e ble nyjɛ nu e na Nyiɛkpɔɔ kolo kre nya jle kre sɔɔnri, na yire ble yire nu, e na kanyana tataara nya, mna ja mu eyɛ yii mu tni yi nu.
33 Praa e tɛɛlɛ, na e frɔ lete na. Hali nyjila ka nu kuraa kre, mblɛ pe shɔ mu li na pre, praa pe tɛɛlɛ, na e yaa pe na.
34 A mblɛ praa yiri na leni nyuŋgo pre fooro naa wa e na, na pe e yirɛ nyjɛ yii wa e pan shɔ kre, e yiɛ naa shio. Ŋgi na hin? E kaan yɛ na, nyjɛ yie tni nyjila kro nu, mu wɛ nyjɛ pe shio e pan yire na.
Fɔtɔɔrɔ
35 Kena yaa shia frɔ ŋga e ta kre wa. Ŋgi na hin? Kre na ee yire mbe fɔtɔɔrɔ badaaŋga ta.
36 Kena e frɔ ta, e ŋga Nyiɛkpɔɔ chaa kre pe, mbe yaa shia u nyu kee ŋga wra yo mu tɛɛ kre la.
37 Imi na Nyiɛkpɔɔ kee kre nyina kre mbo,
“Kia mu, mbe ndro ŋmba u paan wre pan.”e
38 “A ni wolo mblɛ pe fraka pre,
we shɔ mbe li, mbe ŋmaa ta,
a na wa waa ndru kro kre,
ni yiɛ wa shɔ ufun na.”f
39 Wre rɛ, o n pe na mblɛ pie ndru kro mbe fun pre lɛ, la, oo wa shɔnlie ni, ki tia oo ŋmaa ta.