Tra Mna Suminyuŋgo Kre
9
Nyu nunu ŋga Nyiɛkpɔɔ na klu mu pe na lewo ni kre, kraa wa na mbra, na ndoo ŋga nu praa sumi ni tra mna.
2 Pra pe Suminyuŋgo kre sin, mna ki yɔ shiin na yoŋgo ni. Ŋga kraa wa nyu haa kre praa yeeri Cheche Lawee. Bawa kania, na tebru, na paanu ŋga praa teeri Nyiɛkpɔɔ pan kre na nyi.
3 A na mu yoŋgo shiin wo kre tro, nyuŋgo lam wo kre praa yeeri Cheche Lawee Titi.
4 Kre lam swanyiɛ sragbunu ŋga na praa tuwe ndiom taan sroi kre na nyi. A bawa Nyu-Nunu-Daka ŋga na pra swanyiɛ nya mu wo kre na nyi na.a Chɔ ŋga nu pra sro ŋga pe yeeri Manna le kre naa wa Nyu nunu daka kre lam. A Aaron kanyie ŋga kra wrɛ fun kre naa wa daka kre nu na.b Bawa chɔɔ dnɛ shiin kpɛfrɛ kpɛfrɛ nyjɛ na pra Nyiɛkpɔɔ mbra yire nyunɔ yire na nyi.c
5 Kre daka kre ndra na pra yurɛ shiin plɛ faanri na swa nyiɛ ni, a praa pe yeeri Cherubim, a pra yire na Nyiɛkpɔɔ yɛnyiŋge nyina, mu kuɛn nyaala mu fooro chin jɔɔn kre tɔ. La, nyjila ŋga nu ma oo yire kee nyjɛ nyina mbe sɛ yiɛ.
6 Kena na pe yire yirɛ nyjɛ pe krɛrɛ mu kɔ kre, mbe Judae srawɔfɛɛnlɛ pre sɛ le nyuŋgo jlewo kre nu. Blenyini ŋga praa lee wa na Nyiɛkpɔɔ tnumu tuni.
7 La, Judae srawɔfun lopom titi wre chiin wraa lee nyuŋgo lam wo kre nu. A yɛlɛ ŋga kie pan kpan, gbee nunu we le ki nu, a na u n yurɛ nyimi ta, wa le wa. Nyimi yire ni wraa wre titi, na u leele pre sisam nyjɛ praa pini, a pe nsra chin yire sra woni.
8 A yire kooloe nyjɛ na Kpra Ŋumu wre yire mu o nyina kee kre chasi, na ŋga nyuŋgo fimi wo kree wa mu yire tɛ kre, ki nyina na pe n ta mu Cheche Lawee Titi kre kolo nyaa tun.
9 Yire kee nyjɛ tia o chin fuŋgaami na yirɛ, na yurɛ sra wɔɔ mbe Nyiɛkpɔɔ ŋga kre, kia jaa sumifun loloŋgo pe cheche.
10 La, pe kooloe yire nɛɛrɛ na pe aliire, na gbɔɔ, na peyɛ jee paala. Yi krɛrɛ na pe wejiŋge haa paala kolo nyjɛ pra yii, mna sɛ su nyjila ŋga ni Yesu na pan, mna yirɛ kro pe fɔŋgɔ.
Yesu Sra Wɔɔ Ki Pe Chiriri
11 La, Yesu pan mu pe srawɔfun lopom titi yirɛ chichiele nyjɛ oo ta yire na. A u tro Suminyuŋgo cheche titi kre nu, lewo ma u ki sin, a tra mna ma ki nyi.
12 Ŋga Yesu na le Suminyuŋgo kre nu, mna tro mu le Cheche Ndoo Titi kre nu gbee nunu chom kre, u nsra le wa na sikaala nyimi, ndee nui biile nyimi ni mna sra wɔ, la, wre titi nyimi ni wra tɛɛ mna sra kre wɔ, mna blenyini ŋmaashɔmu kre ta mu o ŋga.
13 A kena na sikaala, na nablɛm pre nyimi, na nui biile mblɛ praa sroi kre tɔɔnrɔ praa nyaara mblɛ pe nsraa cheche pre na, mbe pe chiin pe cheche waa,
14 kena Yesu ŋmba wra yire u blenyini Kpra Ŋumu wre na mna uyɛ tɛɛ mu sra wɔ, a nɛɛrɛ ka nsraa wa u na kre, mni e jawa na nyimi yire we o pe hin? Yie o jawala laa kewɛɛ na, mbe o jaa na Nyiɛkpɔɔ ŋmba u le wre sumi.
Yesu Wi Lewo Na Nyiɛkpɔɔ Lalaa Yirefun
15 Kre kee ŋga ndra na, Yesu u yire lewo na Nyiɛkpɔɔ lalaa, mbe ki yire ki na mbe mblɛ Nyiɛkpɔɔ yeeri pre blenyini yirɛ chichiele nyjɛ nyu u yo yire ta. Leele yire Yesu kumu kre na mu laa sisam nyjɛ praa pini, nyjila ŋga ni praa wa nyu nunu jlewo kre nu yire na.
16 Mna krɔ yira nyi kre, na kifun n ku,
17 kolo n wa ki na mbe krɔlifun ki bali, fɔna yirafun wre ku tun.
18 Kre kra tia nyu nunu jlewo kre, a pra nyimi tɛɛ mna ki nɔɔ hle.
19 Ŋga Moses na leele pre nyina Nyiɛkpɔɔ mbra yire mu kɔ kre, wra nui biile nyimi, na sikaala nyimi, na nyumu chaa, mna mbɔɔ yooro nyiɛ yɛ pɔ kaan na, mna ki ni nyimi, na nyumu chaara yire nu mna nyaara mbra hlɛ kre, na leele pre kro na.
20 Mna kna mu yo pe pan mbo,
“Nyimi nyjɛ ni
Nyiɛkpɔɔ nyu nunu pini na e ni yi kre,
mbe e li ki na.”d
21 Kolo nunu kre na chɔɔ Moses na yire mnaa nyimi nyaara Suminyuŋgo kre, na yirɛ nyjɛ ni praa sumi yire na.
22 Kpra na, na o le Moses mbra yire nyjila kre, nyimi ni praa yirɛ tataara pini cheche. Na lewo we sisam tinkɛɛ ta kre, fɔna pie nyimi wo.
Yesu Sra Haŋa Wɔ
23 Kena ŋga yire yirɛ nyjɛ pe na nyjeeri wee titi yire wrumu yi kre, ki fna mbe pe yira kro pe cheche kre kolo kre na. La, ki fna mbe sra chichie wɔ mbe nyjeeri yirɛ yire ŋga, mbe ki wɛ Moses wo kre na.
24 Ŋgi na hin? Suminyuŋgo ŋga lewo sin na kɛ ni, a ki nyjeeri wo titi kre wru kre, kre nu ma Yesu na sɛ le. La, nyjeeri wa titi u sɛ tni. Bawa u sɛ yire o jeelee na Nyiɛkpɔɔ yiɛ.
25 Judae srawɔfɛɛnlɛ lopom titi wre naa lee Cheche Lawee Titi kre nu yɛlɛ kro nu na nyimi ni, wre titi nyimi ni ma ya. Yesu rɛ, gbee nunu chom wra sɛ uyɛ tɛɛ mna sra kre wɔ.
26 Na we naa sra kre woni yɛlɛ nyini kre, kaa mu yire waŋgra gbeele nyjila kre, pan we naa kala nyaa suwi. A imi na ki nyi kre, ŋga waŋgra nyjila paan mbe kɔ kre, wra uyɛ wɔ gbee nunu chom, mu tɛɛ mu sra wɔ mu o sisam pɔ mu laa o na.
27 Nyiɛkpɔɔ ki yo mu tɛɛ na lewo kro we ku gbee nunu chom, kre kɔkro ni, mbe pe u pimi na u tam kun.
28 Pan chɔɔ Yesu na uyɛ tɛɛ mna sra wɔ gbee nunu chom, mu lenɛɛrɛ sisam pɔ mu laa pe na. We ndru mbe pan shiinwo na, a kre rɛ, sisam ma we paan laa, la, mblɛ pe u sri pre we paan shɔ.