Nyjeeri Srawɔɔ
8
Kee ŋga o yuu kre kro yi na, Kristo ŋmba srawɔɔ kee o yuu ŋga, wre wi o srawɔfun lopom titi fuŋgaami. A uu wa mu tni yɛnyiŋge kpɔɔfun wre ŋujɔɔn kre kalie nyjeeri.
2 Bawa u sɛ pe srawɔfun lopom, Cheche Ndoo kre nu, Suminyuŋgo ŋga Nyiɛkpɔɔ wre titi pe, a ki n pe lewo kɛ nyu tnumu kre.
3 A Judae srawɔfun lopom kro, woni pe u woni mbe wra yirɛ, na yurɛ sra woni mbra Nyiɛkpɔɔ kaan, kena ki fna mbe Kristo yaka ta mbe sra wɔ na.
4 Na wre Yesu wre naa wa tra ŋga na kre, wa na pe Judae srawɔfun, ŋgi na hin? Judae srawɔfɛɛnlɛ mblɛ pee wa tra ŋga na kre, Judae mbra yire na praa yire na tnumu tuni.
5 Sra wɔɔ tnumu ŋga praa tuni kre, nyjeeri wo kre kra wru. Pan ki nyi to, na imi na Nyiɛkpɔɔ na yo Moses pan, nyjila ŋga ni wra yo we nyuŋgo sin Nyiɛkpɔɔ pan, a wra yo u pan mbo,
“Le chichie,
mu ki yira kro pe,
mbe ki pe na ŋga ndaa mu nyina,
nyua Sinai na kre yi.”a
6 La, imi na ki nyi kre, Kristo srawɔɔ tnumu ŋga u tuni kre nyu badaaŋga mu wɛ fa Judae srawɔfɛɛnlɛ pre wo na. Yaka ma ki tia, Nyiɛkpɔɔ nyu nunu ŋga u yo kre, ki mbakɔ yirɛ nyjɛ oo ta yire nyu mu wɛ Moses mbra yire na. Ŋgi na hin? Yesu u yire wre na Nyiɛkpɔɔ lalaa kre nyu nunu ŋga nu.
Nyu Nunu Fɔŋgɔ
7 A na kala ka nsraa wa nyu nunu jle wo kre na, kaa wa na shiin wo yo na.
8 La, Nyiɛkpɔɔ na u leele pre nya kolo sisaa na, mna yo pe pan mbo,
“Ble yɛ paan,
mbe ni nyu nunu fɔŋgɔ pe,
Israel na Judah leele ni.
9 Kre nyu nunu ŋga,
kia pe na ŋga ndaa pe na pe tolɛɛlɛ ni,
ŋga ble ndaa pe yii,
mna pe wɔ mu yili Egypt tra nu kre yi.
Pe nsra li ni nyu nunu,
ŋga o na pe kre na,
ki tia ni nsra ndie tɛɛ pe pan.
10 Kena nyu nunu ŋga mbe pe,
Israel leele ni,
ble nyjɛ yi paan yire nu kre yi na.
Mbe ni mbra le pe jawala nu,
mbe yi nyunɔ pe lolonyi nu.
Mbe ni pe pe Nyiɛkpɔɔ,
mbe pre pe ni leele.
11 Ndro wa u chia ndro,
ndee u waŋgra ndro nyina,
na u Nyiɛkpɔɔ chin.
Ŋgi na hin? Pe kro we ni chin,
mbe yire pe fiɛn fiɛn na,
mbe sɛ su pe lekpɔɛ na kro.
12 Mbe pe fooro le,
mbe mba pe sisam sɔɔnri na.”b
13 Kena na Nyiɛkpɔɔ nyu nunu fɔŋgɔ kee yuu waa, mu chin na jle wo kre lɛ, a kia jaa yaka pe na. Kena pie ki tɛɛ mbɛɛ na.