Yesu Wi Srawɔfun Lopom Titi Wre
7
Salem ŋunu na wi Melchizedek, a wra pe Nyiɛkpɔɔ ŋmba u wɛ yirɛ kro na wre srawɔfun. Ŋga Abraham na sɛ ŋunɔ, mna ŋulo gbo gbo na paan kre, Melchizedek na sɛ u fni mna u dwan.
2 A Abraham na yirɛ nyjɛ wra ta yire krɛrɛ yɔɔlɛ kɛ, mna u ŋga nunu. Melchizedek kre nɔɔ yi ŋunu ŋmba u fraka, a wra pe Salem ŋunu, a Salem kre nɔɔ yi wejinyiŋge.
3 Melchizedek nsraa lɛ, na lo ni. U n wa na nɔɔ leele ni, a u n seble ni, a u nsra ku. Pan u nyi na Nyiɛkpɔɔ Biblɔ wre wi, a u pe srawɔfun nyjila kro nu.
Melchizedek Wɛ Abraham Na
4 A e le imi na wra pe lekpɔɔ mu da, a o tolɛɛ lopom Abraham na u yirɛ nyjɛ wra sɛ ta ŋunɔ nu yire yɔɔlɛ kɛ, mna u ŋga nunu.
5 Levi sele leele mblɛ praa sra woni pre, Nyiɛkpɔɔ mbra yire na nyina pe pan na, ki fna mbe Israel leele pre na pe yirɛ nyjɛ pe taa kro yɔɔlɛ kɛ kɛ, mbra pe kaan nununu. A Abraham sele leele na lɛ pe kro.
6 La, Melchizedek rɛ, wre nsra yili Levi sele nu, a nde Abraham na yirɛ nyjɛ wra ta ŋunɔ nu kre yɔɔlɛ kɛ, mna u ŋga nunu, a wra Abraham ŋmba ni Nyiɛkpɔɔ na u nyu yo wre dwan.
7 A kakra n wa ki na, lewo ŋmba uu wa na jaŋga ni mbe dwamu ŋga kre, u wɛ ŋmba we dwan wre na.
Levi Naa Yirɛ Kɛ Kɛ Wee Kaan
8 Srawɔfɛɛnlɛ mblɛ praa yirɛ kɛ kɛ wee yire shio pre, praa kuu. A Melchizedek rɛ, wree wa nyjila kro nu, a nde pra u ŋga yirɛ nyjɛ praa yɔɔlɛ kɛ kɛ yire yɛ, imi na Nyiɛkpɔɔ kee kre nyina kre.
9 Wa we yo na, kena Levi ŋmba praa yirɛ kɛ kɛ wee yire woni na kaan wre kuraa,
10 nyjila ŋga ni pe nsra ta mu u se kre, wra yire Abraham na, mna yɛ wɔ mu Melchizedek ŋga, a Abraham nana wi Levi, a wre nu Judae srawɔfɛɛnlɛ pre yili.
Levi Srawɔfɛɛnlɛ Nsra Nyu Mu Kɔ
11 Levi srawɔfɛɛnlɛ pre na Nyiɛkpɔɔ na yire mna Israel leele pre ŋga mbra yire. Kena na tnumu ŋga Levi srawɔfɛɛnlɛ pre na tun kre na nyu, mna ja mbe ndro sisam laa u na peii kre, kaa srawɔfun fɔŋgɔ wra pan na Aaron wi, kaa wa wa na pan na Melchizedek wi na.
12 Kena na pe sra wɔɔ kolo kre chinɛ kre, pan ki fna mbe mbra yire chinɛ na.
13 A o Tafun ŋmba na ki yire a o na kee nyjɛ krɛrɛ yuu ŋga, u nsra yiri Levi sele nu, la, wra yiri sele ŋga nu ndro n da mu yiri mu pan mu srawɔɔ tnumu tun sragbuɛnlɛɛ yire na.
14 Ŋgi na hin? Pra ki chin na ki pe kpra na Judah sele nu pra Yesu wre se. A nyjila ŋga ni Moses naa sele ŋga nu Israel srawɔfɛɛnlɛ we na yilii kre nyina kre, u nsra Judah sele kre nyini.
15 A o kee kre nya chasi. Ŋgi na hin? Srawɔfun fɔŋgɔ pan na Melchizedek wi.
16 A ki n pe Levi sele nu wra yiri mna chin mu pe sra wɔfun, la, ŋmaa ŋga nu jaŋga nyi, a ki n wa na kɔhaa ni kre kolo na u yire mu pe sra wɔfun.
17 Ŋgi na hin? Nyiɛkpɔɔ kee kre pe nyunɔ mu tɛɛ kre yo mbo,
“Mu pe srawɔfun nyjila kro nu,
imi na Melchizedek nyi kre.”a
Levi Leele Srawɔɔ Nyu To
18 Kolo lɛɛ ŋga na praa yire na sra woni kre n wa na. Yaka ma ki tia, ki nsra jaŋga ta mu tnumu tun.
19 Moses mbra yire nsra ja mu yaka pe cheche, ki tia o kaanhaa fɔŋgɔ ta, ŋga na oo yire mbe sɛ Nyiɛkpɔɔ lawee.
20 Nyiɛkpɔɔ na da, mna chin mu Yesu pe sra wɔfun. La, Levi srawɔfɛɛnlɛ mblɛ praa yire Moses mbra yire na, na sra woni kre, Nyiɛkpɔɔ nsra da mna chin mu wa pe sra wɔfun.
21 La, Yesu rɛ, Nyiɛkpɔɔ na da mna chin mu u pe sra wɔfun mbo,
“Mi Nyiɛkpɔɔ,
ni da,
a mba ndruu,
ni jawala chinɛ na,
mbe mu pe srawɔfun,
nyjila kro nu.”b
22 Kre ki tia nyu nunu fɔŋgɔ kre nyu mu wɛ jlewo kre na, ŋga ki yire Yesu na na mu pan kre ndra na.
Yesu Pe Srawɔfun Ŋmba Wa Ku Fio
23 Fa Judae srawɔfɛɛnlɛ pre na nɛɛ. Ŋgi na hin? Praa kuu, mbe plɛ yirii tni pe titɛɛ.
24 A Yesu rɛ, wree wa nyjila kro nu, a u srawɔɔ tnumu kre na kna mbe sɛ ndro fɔŋgɔ pan.
25 Ki tia u ja na mblɛ pe yire u na na paan Nyiɛkpɔɔ jaara pre shio nyjila kro nu, ŋga uu wa nyjila kro nu, na tali na pe kaan kre ndra na.
Yesu Na Sra Wɔ Gbee Nunu Chom
26 Wre srawɔfun lopom titi ŋmba nyini ki fna mbe o ta. Ŋgi na hin? U pe cheche, a yaka n wa u na, a sisam n wa u nu. A pe u wɔ mu yili sisampefɛɛnlɛ nu, mu u ŋga kpɔɔmu lawee nyjeeri.
27 Wre n pe na Judae srawɔfɛɛnlɛ loplombo titie pre lɛ, pre pe peyɛ sisam, na pe leele pre sisam sra woni blenyini. La, Yesu na uyɛ tɛɛ mna sra kre wɔ gbee nunu chom.
28 Moses mbra yire kolo na kre, praa leele mblɛ pe n fraka woni na pe piin Judah srawɔfun lopom titi. La, Nyiɛkpɔɔ na nyu yo, mna da, a kra kɔ mu pan ma yɛŋgɛ. Moses mbra yire na pan, a kra chin mu pe. A wra u Biblɔ wre wɔ srawɔfun lopom titi, a u pe cheche nyjila kro nu.