Kristo Leele Lopokee Twan
6
Fuŋga ma oo nɔɔ hle mbe yo oo fa kewɛɛ, na jawala chinɛɛ, na Nyiɛkpɔɔ shɔnlie kee yo, la, ki fna mbe o sɛ yiɛ, mbe lopokee twan mbe ya yire kejle yire na.
2 Ndrɛ jee, na imi pe kɛnyi taari shɔnlifɛɛnlɛ na, mbe pe Kpra Ŋumu ta, na kunnyiɛ, na Nyiɛkpɔɔ kprakuɔn, waa kro yire kee nyjɛ na.
3 E ti o sɛ yiɛ. Na Nyiɛkpɔɔ li ki na, ŋga oo pe yi na oo sɛ yiɛ.
Jaaraa
4 A kia jaa pan na mblɛ pe da mu Nyiɛkpɔɔ kee kre loo, mu ndru mu laa ki kro kre, na pie ja mbe pe jawala chinɛ na. Ŋgi na hin? Pe da mu Nyiɛkpɔɔ kaniɛ kre nya. A kɛyirɛ nyjɛ yi yiri nyjeeri kre, pe da mu ka ta, mu da mu Kpra Ŋumu wre ta.
5 A pe chin na Nyiɛkpɔɔ nyu kee kre tna, a pe da mu blenyini ŋmaa ŋga kie pan na kre jaŋga kee loo.
6 Kena na pe je mu laa kee kre kro kre, kia jaa pan na pie pe jawala chinɛ na. Pan ki nyi na pe ndru na Nyiɛkpɔɔ Biblɔ wre kani kaan kre na na, mu tia nyifɛɛrɛ u gbo lete na.
7 Nyiɛkpɔɔ u tra ŋga na nyiɛ paan, mbe ki yɔɔ kre dwan, mbe yirɛ nyjɛ pe luu yire jaa nyu mbe yi luufun ŋga.
8 La, na tra kre waa wuuro, na nyaa bribri fin, kena tnu ka wa pe ki nu na, kena ki da mbe pe ki sun. A ki kɔlɔ yi na pie kanhun le ki na, mbe ki shɔ.
Gbeŋmbafun We Yirɛ Chichiele Nyjɛ Yie Pan Kre Ta
9 Wolo, na o paara e pan imi kre, o n na e jawa na sisaa ni. E ŋmaashɔmu kre ndra na, o chin na e dwamu ta.
10 A Nyiɛkpɔɔ rɛ, u fraka, ki tia tnumu ŋga e tun kre, wa ki fɛɛ, ndee imi na e e koroo nyina Nyiɛkpɔɔ pan mu na e wolo Kristo leele pre le kre, wa ki fɛɛ.
11 Kee ŋga na o yiɛ nyina mbe e pe yi na, e kro we yiɛnyina e gbeŋmbaa kre ni ma, mbe sɛ su waŋgra kɔ ble.
12 O n na chaa mbe gbashia le wa nu, la, o chaa mbe e pe na mblɛ pra yire shɔnlie, na frɔ na, mna Nyiɛkpɔɔ nyu ŋga wra yo kre ta pre lɛ.
Nyiɛkpɔɔ Nyu Yoo
13 Ŋga Nyiɛkpɔɔ na u nyu yo Abraham pan fa kre, a ndro nsraa wa mu da na u ni mbe u u da kre ndra na, wre Nyiɛkpɔɔ titi mɛɛ ni wra da mu uyɛ ŋga.
14 Mna yo Abraham pan mbo,
“Kpra na, mbe mu dwan,
mbe ti mbe mu sele leele nɛɛ.”a
15 Abraham na frɔ, ki tia wra Nyiɛkpɔɔ nyu ŋga wra yo u pan kre yira ta.
16 Na lewo yo we da kre, lekpɔɔ ŋmba u wɛ u na u dani. Daŋga rɛ, kre ki kakra tataara nyu kuu.
17 Kena ŋga Nyiɛkpɔɔ naa chaa mbe mblɛ pie u nyu kee ŋga u yo kre ta kre chin na wa u kee kre chinɛ kre ndra na, wra uyɛ da mu ya kee kre na.
18 Yire kee shiin nyjɛ, u nyu yoo, na u daŋga kre, yia jaa chinɛ, a Nyiɛkpɔɔ wa kɔ yi na mbe pe kafnu. Ki tia wre mblɛ o fɛ mu pan u shɔmu nu kre, o yirehaa ta, mbe o kaan haa ŋga kii wa o yiɛ kre yii chiriri.
19 Oo wa na yirehaa gbiŋmbi ni, o shɔmu ŋga na o kaan kre na. O danknafun wre sɛ le nyjeeri Cheche lawee titi kre nu.
20 Bawa Yesu yila o na mu yiɛklu, mu sɛ pe srawɔfun lopom titi Melchizedek sra wɔɔ kolo na.