Judae Srawɔfun Lopom Titi Kpan Lewo Wi
5
A Judae Srawɔfun Lopom titi kpan, u leele nu pe u woni, mbe u yire pe jeelee na mbra Nyiɛkpɔɔ kaan yirɛ, mbra pe sisam sra woni.
2 Ŋga u kooloe nyjɛ na u tro yire pe na u leele pre lɛ kre ndra na, we jaa uyɛ nyjii mbe mblɛ pe n chin, mu fun kolo kre na pre ŋga.
3 Ŋga u sisaa pini na leele pre lɛ kre ndra na, wre na u leele pre kro sisam sra u woni.
Nyiɛkpɔɔ U Srawɔfun Lopom Titi Woni
4 Ndro n wa mbe ja mbe uyɛ ŋga kpɔɔmu mbe pe srawɔfun lopom titi, fɔna Nyiɛkpɔɔ u ŋga ki yi, imi na Nyiɛkpɔɔ na Aaron ŋga ki yi kre.
5 Ki tia Kristo wre nsra uyɛ kpɔɔ, na we pe srawɔfun lopom titi, la, Nyiɛkpɔɔ wra u ŋga kre kpɔɔmu kre, mna yo u pan mbo,
“Ni Biblɔ wi ŋu, a mu Lɛ wi mi aŋga.”a
6 Imi na wra yo lawee fɔŋgɔ nu na kre mbo,
“Srawɔfun wi ŋu nyjila kro nu,
imi na Melchizedek na nyi kre.”b
Lewo Wi Yesu Kristo
7 Nyjila ŋga ni Yesu naa wa waŋgra nu kre, wra nyiɛtalaa, na nyɛnɛɛ kpɔɔ, na yetunyi tɛɛ mna Nyiɛkpɔɔ ŋmba wra ja mu u shɔ kumu kɛɛ wre tali. A imi na wra uyɛ nyjii mu Nyiɛkpɔɔ ŋga kre ndra na, kra tia wra loo u pan.
8 Nyiɛkpɔɔ Biblɔ na wi, wra yire u kanyana ŋga wra nya kre na mna buuro tuan.
9 Kra tia wra nyu Nyiɛkpɔɔ pan, mbe lewo ŋmba we li u kee na kro tro u na, mbe blenyini ŋmaa ta.
10 A Nyiɛkpɔɔ u pe srawɔfun lopom titi, imi na Melchizedek na nyi kre.
Jajaara
11 Kaa oo wa na kaalɛɛ ni mbe yo tataara, kee nyjɛ o yo nyjɛ haa, a na e kala nɔɔloo haa sheli kre ndra na, ki tia kee kre nɔɔ nyinaa sheli.
12 E da mbra pe nyinafɛɛnlɛ, a nde ki fna mbe ndro e nyina kejle yire tun. Mna e da da kre, ki fna mbe e naa sro shelee lii, a nde nyinimi nyumu e ŋgoorii tɛ.
13 A lewo ŋmba u ŋgoorii kpan, u pe pɔ Nyiɛkpɔɔ kee kre nu. U n chichie, na sisaa lalaa chin.
14 Loplombo mblɛ pe twan mu chichie na sisaa chin kre, pre pe sro shelee lii.