6
Tinlɛ pe pe tafɛɛnlɛ ŋga buuro ŋga ki fna, mbe ndro wa Nyiɛkpɔɔ, ndee kee ŋga o e nyina kre kee sisaa ka ta mbe yo.
2 Tinlɛ mblɛ tafɛɛnlɛ pe pe Kristo sumifɛɛnlɛ pre waa shia pe tafɛɛnlɛ yiɛ le, ŋgi na hin? E ŋmbilɛ Kristo sumifɛɛnlɛ lɛ. Ki fna mbe e pe sumi kpɔɔ, ŋgi na hin? Mblɛ pe e tnu taa kre, shɔnlifɛɛnlɛ lɛ, a e pe kori. Kena yire kee nyjɛ ki fna mna leele nyina, mbra yi kpali.
3 Ŋmba we kee fɔŋgɔ ka nyina, a u n li o Tafun Yesu Kristo kpra kee kre na, ndee mu li o sumiɛ ŋga kee o nyina ŋga na kre,
4 kena uyɛ u kpɔɔri finfin, u fun n yaka chin, a u jawala n wa, kakra lie, na krɔ ni ufun wre paan. Yire kee nyjɛ krɛrɛ yenyjam, na kakrɔ, na tɛɛlɛɛ, na jawala sisaa ni yi paan.
5 Wre ndro wre kakrɔ nyjɛ yi n shian, na jawala fɔɔn yii wa u nu, a u n kpra kee kre chin. U jawala yi na sumiɛ pe swa chaara kolo.
6 Nyiɛkpɔɔ sumiɛ ŋga ki fraka tii mbe lewo yira kro ta, na ŋga mu ta chiɛri kre mu yiɛ nyi wala.
7 O nsra pan na yaka ni waŋgra ŋga nu, a waa jaa yaka wru tra ŋga nu mbe sɛ.
8 Kena na o o nyu sro na o yonyi ta kre, mbe o ti yire o yiɛ nyi.
9 La, mblɛ pe chaa mbe pe swafɛɛnlɛ kre, pe tuuri penlee nu, na tuuri jijiere na niŋge sisaa pɛɛlɛɛ nyjɛ yi n nyu mu lewo ŋga nu. Yire yi lewo tini na shie klamu nu.
10 Ŋgi na hin? Swa chaara yi sisam kro kolo. Plɛ yila ki chaara sisaa na mu laa Nyiɛkpɔɔ kro, mu tia fooro pe yii kpɔɔ.
Paara Nyinaa
11 La, ŋu rɛ, Nyiɛkpɔɔ ndro wi ŋu, kena laa yire kee nyjɛ krɛrɛ kro, mu fraka, mu Nyiɛkpɔɔ sumiɛ, na shɔnlie, na koroo, na frɔ, na nyjiimu yii kɛ shiin.
12 Shɔnlie wiire wi, mu blenyini ŋmaa kre yii kɛ shiin, kre na Nyiɛkpɔɔ na yila mu mu yeeri, nyjila ŋga ni mna yire dansiɛfɛɛnlɛ tataara yiɛ na, mna nyu nyaa mu yo na mu Kristo shɔ mu li kre.
13 Ni yire Nyiɛkpɔɔ ŋmba u yirɛ kro kaan ŋmaa, na Yesu Kristo ŋmba wra yire Pontius Pilate yiɛ na mna kpra yo wre yiɛ, na yuu mu pan na,
14 li ni kee nyjɛ ni yo mu pan nyjɛ kro na, maa shia ti mbe ndro mu kee sisaa ka ta mbe yo, mbe sɛ su na o Tafun Yesu Kristo wre we ndruu pan.
15 U paan kre we pe Nyiɛkpɔɔ wre titi nyjila ŋga u chaa nu. Nyiɛkpɔɔ wre, wre u dwamu kaan, a wre wi jaŋga kro Nyiɛkpɔɔ, wre wi Ŋulo kro Ŋunu, a tafɛɛnlɛ kro Tafun wi.
16 Wre chiin uu ŋmaa ni, a wa ku. Wre uu wa nyisee nu, a ndro wa jaa da u na. Ndro n da mu u nya tun, a wa wa daa u nya na nyini ni. Wre wo yi yɛnyiŋge na blenyini jaŋga! Ami.
17 Leele mblɛ pee swa ni waŋgra ŋga nu kre, yo pe pan na pia na peyɛ kpɔɔri, ndee mbe peyɛ wru mbe taa yirɛ waara nyjɛ na, la, pe peyɛ wru pe taa Nyiɛkpɔɔ na, wre u o kaan yirɛ nyjɛ yi o shian, o na oyɛ lii.
18 Yo pe pan mbe pra chichie pini, pe ti mbe pe kepele nyu, mbe pra yirɛ kee na lɛɛ nunu ni.
19 Na pe pe ma kre, kena pe lawee chichie chaa na teeri peyɛ pan nyjeeri. A pe tnimu we nyu mbe pe ŋga tra mna.
20 Timothy, kee ŋga pe le mu kɛɛ kre le chichie, muyɛ wɔ paaraa nyjɛ yi n fna, na jijiere kakra nyjɛ plɛ yeeri “Kachindɛ” kre nu.
21 Ŋgi na hin? Leele plɛ yuu na pee wa kre “Kachindɛ” kre ni, a ki tia pe fun Nyiɛkpɔɔ kolo na.
Yire na Nyiɛkpɔɔ dumiɛ e tni.